ពលរដ្ឋនៅស្រុកស្វាយលើ ខេត្តសៀមរាប ប្តឹងមន្ត្រីបរិស្ថាន៤នាក់ទៅតុលាការ ពាក់ព័ន្ធការបំផ្លាញទ្រព្យសម្បត្តិ និងការរំលោភបំពានដីធ្លីរបស់ពួកគាត់។
កាលពីថ្ងៃទី១៤ ខែមិថុនា ឆ្នាំ២០២២ មន្ត្រីឧទ្យានុរក្ស៤នាក់នៃមន្ទីរបរិស្ថានខេត្តសៀមរាប បានចុះដកបង្គោលរបងលើដីរបស់ប្រជាពលរដ្ឋប្រមាណ៦០ដើម ក្រោមហេតុផលថា ពលរដ្ឋបានបោះបង្គោលរបងហ៊ុមព័ទ្ធដីព្រៃ «តំបន់ការពារធម្មជាតិជប់សោម» ដោយខុសច្បាប់។
លោក សាន សិទ្ធ ដែលអះអាងថាជាតំណាងប្រជាពលរដ្ឋ ប្រាប់វីអូឌីនៅថ្ងៃសុក្រនេះថា ដីដែលហ៊ុមព័ទ្ធដោយបង្គោលរបងនោះជាដីរបស់លោកបានអាស្រ័យផលជាង១០ឆ្នាំ និងកាន់កាប់ដោយមានការទទួលស្គាល់ពីអាជ្ញាធរឃុំនិងស្រុកត្រឹមត្រូវ។ លោកថា ករណីមន្ត្រីបរិស្ថានចុះដកបង្គោលរបងរបស់លោកនេះ គឺលោកបានប្តឹងមន្ត្រីបរិស្ថានចំនួន៤នាក់ទៅតុលាការ រួមមាន លោក ហួត តូ, លោក សៅ ឃាន, លោក សៀម ប៉ុន និងលោក ហោ ស៊ីវែង នៅថ្ងៃទី១៧ ខែមិថុនា ឆ្នាំ២០២២នេះ ក្រោយគ្មានដំណោះស្រាយពីអាជ្ញាធរពាក់ព័ន្ធ។
លោកបន្ថែមថា៖ «ខ្ញុំមានទាំងច្បាប់ឈូសឆាយ មានទាំងប្លង់ដី ការស្នើសុំធ្វើកសិកម្មហ្នឹងក៏មាន។ តែខ្ញុំមិនយល់ហេតុអីគេមកបំផ្លិចបំផ្លាញរបស់ខ្ញុំទៀតអ៊ីចឹង។ ខ្ញុំលិខិតស្នាមត្រឹមត្រូវរបស់ខ្ញុំ។ អ៊ីចឹងខ្ញុំទៅប្តឹងតុលាការនៅថ្ងៃនេះ»។
លោក ញ៉ែម ផល្លា រស់នៅភូមិសែនជ័យ ឃុំកន្ទួត ឱ្យដឹងថា បច្ចុប្បន្នមានពលរដ្ឋប្រហែល២០០គ្រួសារកំពុងមានបញ្ហាជម្លោះដីជាមួយមន្ត្រីបរិស្ថាន អាជ្ញាធរមូលដ្ឋាន។ លោកថា មន្ត្រីអាជ្ញាធរមូលដ្ឋានទាំងនេះបានបង្កើតសហគមន៍មួយដោយគ្មានការចូលរួមពីប្រជាពលរដ្ឋឡើយ ដើម្បីគប់គិតគ្នាយកដីធ្លីរបស់ប្រជាពលរដ្ឋដែលបានអាស្រ័យផលជាង១០ឆ្នាំ។
ពលរដ្ឋរូបនេះអះអាងថា អ្នកភូមិបានចូលទៅអាស្រ័យផលដោយដាំស្វាយ ខ្នុរ ចេក និងដំណាំហូបផ្លែផ្សេងៗ តាំងពីឆ្នាំ២០០០ រហូតមកដល់ឆ្នាំ២០២២នេះ ដោយកន្លងមក ដីនោះធ្លាប់មានជម្លោះជាមួយក្រុមទាហាន អាជ្ញាធរមូលដ្ឋានមួយចំនួន និងចុងក្រោយនេះជាមួយមន្ត្រីបរិស្ថាន ហើយពលរដ្ឋធ្លាប់ប្តឹងមន្ត្រីអាជ្ញាធរទាំងនោះទៅតុលាការជាបន្តបន្ទាប់ដែរ ប៉ុន្តែមិនត្រូវបានតុលាការចាត់ការឡើយ។
លោក ញ៉ែម ផល្លា បន្តថា អាជ្ញាធរមូលដ្ឋាន និងមន្ត្រីបរិស្ថាន មិនត្រឹមតែធ្វើទុក្ខបុកម្នេញលើប្រជាពលរដ្ឋទេ ថែមទាំងបានប្តឹងពួកគាត់ទៅតុលាការថែមទៀត។
លោកបន្ថែមថា៖ «មិនយុត្តិធម៌ទេ ពួកគេធ្វើបាបតែប្រជាពលរដ្ឋ។ រឿងជម្លោះដីធ្លីនេះ យើងធ្លាប់បានប្តឹងទៅតុលាការសាលាឧទ្ធរណ៍ហើយ។ ហើយមួយផ្នែកទៀតជាមួយមន្ត្រីបរិស្ថាននេះ យើងប្តឹងទៅសាលាដំបូងខេត្តទៀត បើគេមិនចាត់ការ យើងនឹងប្តឹងទៅសាលាឧទ្ធរណ៍ទៀត»។
បើតាមរបាយការណ៍របស់ប្រធានស្នាក់ការ នៃការិយាល័យដែនជម្រកសត្វព្រៃគូលែនព្រហ្មទេព លោក សឿន តូ ដែលផ្ញើទៅអភិបាលស្រុកស្វាយលើបានឱ្យដឹងថា កាលពីថ្ងៃទី១៤ ខែមិថុនា ឆ្នាំ២០២២ មន្ត្រីឧទ្យានុរក្ស៤នាក់បានសហការជាមួយកម្លាំងយោធាចុះល្បាតដីសហគមន៍ជប់សោម ស្ថិតនៅ ភូមិសែនជ័យ ឃុំកន្ទួត ស្រុកស្វាយលើ ខេត្តសៀមរាប បានជួបប្រទះការបោះបង្គោលរបងហ៊ុមព័ទ្ធដីព្រៃសហគមន៍ដើម្បីធ្វើកម្មសិទ្ធិ ដែលមានលោក សាន សិទ្ធ ជាម្ចាស់។
របាយការណ៍ដដែលបន្តថា កម្លាំងល្បាតបានដកចោលបង្គោលរបងនោះអស់ចំនួន៦០បង្គោល និងបានកសាងសំណុំរឿងបញ្ជូនជនសង្ស័យ៦នាក់ទៅតុលាការផងដែរ។
ប្រធានស្នាក់ការ នៃការិយាល័យដែនជម្រកសត្វព្រៃគូលែនព្រហ្មទេព លោក សឿន តូ ស្នើឱ្យវីអូឌីដាក់លិខិតទៅមន្ទីរបរិស្ថាន និងក្រសួងបរិស្ថាន ដើម្បីលោកអាចឆ្លើយតបបន្ថែមជុំវិញរឿងនេះ។
មេភូមិសែនជ័យ លោក ផាន ផល អះអាងថា នៅភូមិសែនជ័យមានពលរដ្ឋប្រហែល៤០គ្រួសារប៉ុណ្ណោះកំពុងមានជម្លោះដីធ្លីជាមួយសហគមន៍។ លោកថា ពលរដ្ឋបានចូលទៅអាស្រ័យលើដីសហគមន៍ដោយខុសច្បាប់ ខណៈសហគមន៍នេះបានបង្កើតឡើងតាំងពីមុនឆ្នាំ២០០០ម៉្លេះ។ យ៉ាងណាលោកទទួលស្គាល់ថា ពលរដ្ឋមួយចំនួនពិតជាបានចូលទៅអាស្រ័យផលលើដីកំពុងមានជម្លោះនោះតាំងពីអំឡុងឆ្នាំ២០០០មែន។
មេភូមិរូបនេះបន្តថា គណៈកម្មការសហគមន៍ជប់សោម មានពលរដ្ឋ១២នាក់ចូលរួមជាសមាជិក ក្រៅពីនោះជាមន្ត្រីអាជ្ញាធរពាក់ព័ន្ធ។
លោកបន្ថែមថា៖ «បងចង់ដឹងថាមូលហេតុអីបានជាប្រជាជនមួយចំនួនគាត់ធ្វើអត់បាន មកពីប្រជាជនគាត់ទុកដីចោល ឈើព្រៃដុះឡើងវិញ គាត់រវល់ទៅណា ក្រោយមកគាត់ចូលទៅអាស្រ័យផលវិញ ស្របពេលព្រៃឈើវាដុះច្រើន ដល់សហគមន៍ បរិស្ថានគេមិនការពារព្រៃឈើ! ព្រោះប្រជាជនយើងចូលទៅអាស្រ័យផលហ្នឹង គឺនៅក្នុងដីសហគមន៍ ដោយសារគាត់អត់ដឹងថា ព្រៃនេះគេចូលជាសហគមន៍តាំងពីសម្តេចសីហនុនៅរស់ម្ល៉េះ»។
កាលពីថ្ងៃទី១៤ ខែមិថុនា ឆ្នាំ២០២២ ប្រជាពលរដ្ឋដែលមានដីនៅភូមិសែនជ័យ ឃុំកន្ទួត ស្រុកស្វាយលើ ខេត្តសៀមរាប ចោទអាជ្ញាធរមូលដ្ឋានថា បានគប់គិតគ្នាបង្កើតសហគមន៍ចង់យកដីធ្លីពួកគេ។ ពលរដ្ឋលើកឡើងថា ថ្នាក់ដឹកនាំគណៈកម្មការសហគមន៍ភាគច្រើនគឺជាអាជ្ញាធរ និងពុំមានការចូលរួមនិងគាំទ្រពីប្រជាពលរដ្ឋនៅមូលដ្ឋានឡើយ៕