ពលរដ្ឋជាង១០០គ្រួសារ នៅស្រុកគូលែន ខេត្តព្រះវិហារ ចោទក្រុមហ៊ុនឯកជនមួយថាកំពុងដាក់គ្រឿងចក្រឈូសឆាយប៉ះពាល់ដីធ្លីរបស់ពួកគាត់ដែលបានកាន់កាប់និងអាស្រ័យផលជាង២០ឆ្នាំ។
លោក ឡេង ពីន អាយុ៤២ឆ្នាំ រស់នៅភូមិព្យួរជ្រូក ឃុំគូលែន ស្រុកគូលែន ប្រាប់វីអូឌីនៅថ្ងៃចន្ទនេះថា ពលរដ្ឋប្រមាណ១៣០គ្រួសារ នៅឃុំគូលែន មានជម្លោះដីធ្លីរ៉ាំរ៉ៃជាមួយក្រុមហ៊ុន «ខេមបូឌា ប៊្លូ ហេវិន លីមីធីត» តាំងពីឆ្នាំ២០១៣ រហូតមកដល់បច្ចុប្បន្ន ក្រោយក្រុមហ៊ុននេះទទួលបានដីសម្បទានសេដ្ឋកិច្ចពីរដ្ឋាភិបាលកាលពីឆ្នាំ២០១២។
ពលរដ្ឋរូបនេះអះអាងថា ពួកគាត់មានដីចន្លោះពី៣ទៅ៥ហិកតាក្នុងមួយគ្រួសារ ដោយបានចូលអាស្រ័យផលធ្វើស្រែនិងដាំដំណាំដំឡូងមីតាំងពីឆ្នាំ២០០០ មុនក្រុមហ៊ុនចូលមកវិនិយោគ។ លោកថា កាលពីចុងខែមុននេះ ក្រុមហ៊ុនបានដាក់គ្រឿងចក្រឈូសឆាយព្រំដីនិងក្បាលដីប្រជាពលរដ្ឋ ប៉ុន្តែត្រូវបានអ្នកភូមិនាំគ្នាតវ៉ាប្រឆាំង ដើម្បីស្វែងរកការដោះស្រាយពីអាជ្ញាធរពាក់ព័ន្ធ។
លោកបន្ថែមថា៖ «ខ្ញុំសុំសំណូមពរដល់អាជ្ញាធរពាក់ព័ន្ធ ជាពិសេសរដ្ឋាភិបាលចុះដោះស្រាយជូនពលរដ្ឋ កាត់ឆ្វៀលដីឱ្យដាច់ចេញពីដីក្រុមហ៊ុន វាស់វែង និងចេញបណ្ណកម្មសិទ្ធិជូនពលរដ្ឋ កុំឱ្យក្រុមហ៊ុនគំរាមកំហែងលើពលរដ្ឋទៀត។ កន្លងមក ក្រុមហ៊ុនតែងតែគំរាមកំហែងវាយខ្នោះនិងប្ដឹងពលរដ្ឋដាក់គុក»។
លោក ផេង ផល ជាប្រជាពលរដ្ឋរស់នៅឃុំគូលែនម្នាក់ទៀតដែលមានដី៥ហិកតា និយាយថា ក្រុមហ៊ុនមិនត្រឹមតែឈូសឆាយដីបំពានលើដីពលរដ្ឋប៉ុណ្ណោះទេ ថែមទាំងបានប្តឹងតំណាងពលរដ្ឋ១០នាក់ទៅអាជ្ញាធរឃុំ ទាមទារសំណងក្នុងម្នាក់១ ៥០០ដុល្លារ ទាំងអយុត្តិធម៌ថែមទៀត។
ពលរដ្ឋរូបនេះបន្តថា ពលរដ្ឋដែលកំពុងមានជម្លោះដីធ្លីជាមួយក្រុមហ៊ុន ភាគច្រើនជាពលរដ្ឋក្រីក្រ និងមានមុខរបរធ្វើស្រែចម្ការ។ លោកថា ប្រសិនបើក្រុមហ៊ុនរំលោភយកដីធ្លីអស់ អ្នកភូមិនឹងជួបការលំបាកក្នុងជីវភាពគ្រួសារ ដោយសារគ្មានដីធ្លីសម្រាប់បង្កបង្កើនផល។
លោក ផេង ផល ឱ្យដឹងទៀតថា កន្លងមក អាជ្ញាធរមូលដ្ឋានតែងតែសន្យាជួយដោះស្រាយជម្លោះដីធ្លីរវាងពលរដ្ឋនិងក្រុមហ៊ុនដែរ នៅពេលមានការបោះឆ្នោតម្តងៗ ប៉ុន្តែក្រោយបោះឆ្នោតរួច អាជ្ញាធរមិនដែលអនុវត្តបានឡើយ ហើយតែងតែនិយាយការពារក្រុមហ៊ុនទៅវិញ។
លោកបន្ថែមថា៖ «អាជ្ញាធរកាលពីមុនបោះឆ្នោត គាត់សន្យាថាចាំបោះឆ្នោតរួច គាត់នឹងដោះស្រាយឱ្យ ប៉ុន្តែរយៈកាលកន្លងមក ការសន្យានេះ វាហាក់បីដូចជាមិនមានលទ្ធផលអី ហើយបងប្អូនប្រជាពលរដ្ឋចេះតែចាំមើល»។
វីអូឌី មិនអាចរកការឆ្លើយតបពីតំណាងក្រុមហ៊ុន «ខេមបូឌា ប៊្លូ ហេវិន» បានទេពាក់ព័ន្ធការចោទប្រកាន់នេះ ខណៈមេឃុំគូលែន លោក លាម សាងីម និងមេភូមិព្យួរជ្រូក លោក ឃាន រ៉ុម មិនទទួលទូរសព្ទ។
អភិបាលខេត្តព្រះវិហារ លោក ប្រាក់ សុវណ្ណ ប្រាប់វីអូឌីថា លោកមិនទាន់ទទួលបានព័ត៌មានជុំវិញជម្លោះដីធ្លីទេ ប៉ុន្តែលោកថានឹងឱ្យមន្ត្រីចុះពិនិត្យមើលករណីនេះ។
មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ឡោ ចាន់ មានប្រសាសន៍ថា ជម្លោះដីធ្លីរវាងពលរដ្ឋ និងក្រុមហ៊ុន ខេមបូឌា ប៊្លូ ហេវិន បានកើតឡើងជាច្រើនឆ្នាំមកហើយ ហើយអាជ្ញាធរពាក់ព័ន្ធមិនបានយកចិត្តទុកដាក់ដោះស្រាយបញ្ចប់នោះទេ។ លោកថា ការដោះស្រាយកន្លងមក អាជ្ញាធរហាក់មានភាពលម្អៀង ឬការពារផលប្រយោជន៍ក្រុមហ៊ុនជាងការពារផលប្រយោជន៍ប្រជាពលរដ្ឋរងគ្រោះ ដោយលោកបានដាក់ការសង្ស័យថា អាជ្ញាធរអាចទទួលបានផលប្រយោជន៍ណាមួយពីក្រុមហ៊ុន។
មន្ត្រីសិទ្ធិមនុស្សរូបនេះបន្តថា ករណីអាជ្ញាធរមិនយកចិត្តទុកដាក់ដោះស្រាយជូនពលរដ្ឋនេះ នឹងធ្វើឱ្យពលរដ្ឋបន្តរងទុក្ខលំបាក និងរងការគំរាមកំហែង។
លោកបន្ថែមថា៖ «កន្លងមក យើងឃើញក្រុមហ៊ុន ប៊្លូ ហេវិន បានធ្វើឱ្យប៉ះពាល់ដីធ្លីរបស់ប្រជាពលរដ្ឋនិងព្រៃឈើនៅតំបន់ព្យួរជ្រុកហ្នឹង ដល់ពេលប្រជាពលរដ្ឋនាំគ្នាតវ៉ា ក៏ត្រូវបានខាងក្រុមហ៊ុននិងអាជ្ញាធរធ្វើការរារាំងនិងគំរាមកំហែងប្រជាពលរដ្ឋដែរ។ នេះគ្រាន់តែជាការវិភាគរបស់ខ្ញុំទេ ខ្ញុំអត់ភស្តុតាងទេ ប្រសិនជាអាជ្ញាធរគាត់អត់មានប្រយោជន៍ពីក្រុមហ៊ុន ហើយហេតុអីគាត់កាន់ជើងក្រុមហ៊ុន?»
បើតាមលោក ឡោ ចាន់ កន្លងមក ក្រុមហ៊ុន «ខេមបូឌា ប៊្លូ ហេវិន» ក៏សកម្មក្នុងការកាប់និងដឹកឈើចេញពីតំបន់កំពុងមានជម្លោះនោះដែរ ហើយប្រជាពលរដ្ឋតែងតែតវ៉ាប្រឆាំងករណីនេះ។
បើតាមអនុក្រឹត្យកាលពីឆ្នាំ២០១២ ក្រុមហ៊ុន «ខេមបូឌា ប៊្លូ ហេវិន លីមីធីត» ទទួលបានដីសម្បទានសេដ្ឋកិច្ចពីរដ្ឋាភិបាលលើដីទំហំ៩ ១៩២ហិកតា ដើម្បីធ្វើការវិនិយោគ ស្ថិតនៅឃុំគូលែន ស្រុកគូលែន ខេត្តព្រះវិហារ ប៉ុន្តែអ្នកភូមិអះអាងថា រហូតមកដល់ពេលនេះ ក្រុមហ៊ុនមិនទាន់អភិវឌ្ឍអ្វីមួយនៅឡើយទេ ក្រៅតែពីការដាំស្លឹកគ្រៃ និងឈូសឆាយដីព្រៃទុកចោល៕
