ក្រសួងពាណិជ្ជកម្ម បានឱ្យដឹងថា តម្លៃលក់រាយប្រេងសាំងធម្មតា ចាប់ពីថ្ងៃអង្គារ ដល់ចុងខែនេះ មានតម្លៃដដែល គឺ៥ ៨០០រៀលក្នុងមួយលីត្រ ខណៈប្រេងម៉ាស៊ូតបានឡើងថ្លៃខ្ពស់ជាងមុន២០០រៀលក្នុងមួយលីត្រ។
ក្នុងសេចក្ដីជូនដំណឹងរបស់ក្រសួងពាណិជ្ជកម្ម ចុះថ្ងៃទី២១ ខែមិថុនា ឆ្នាំ២០២២ ស្ដីពីតម្លៃលក់រាយប្រេងឥន្ធនៈនៅតាមស្ថានីយ បានឱ្យដឹងថា ចាប់ពីថ្ងៃទី២១ ដល់ថ្ងៃទី៣០ ខែមិថុនានេះ តម្លៃលក់រាយប្រេងឥន្ធនៈ ត្រូវបានកំណត់៥ ៨០០រៀលក្នុង១លីត្រសម្រាប់សាំងធម្មតា និង ៦ ៣០០រៀលក្នុងមួយលីត្រសម្រាប់ប្រេងម៉ាស៊ូត។
បើតាមសេចក្តីជូនដំណឹងនេះ តម្លៃសាំងធម្មតានៅតម្លៃ៥ ៨០០រៀលក្នុង១លីត្រដដែល ខណៈប្រេងម៉ាស៊ូតឡើងពី៦ ១០០រៀលក្នុងមួយលីត្រ ទៅ ៦ ៣០០រៀលក្នុងមួយលីត្រ នេះបើធៀបនឹងតម្លៃលក់រាយប្រេងឥន្ធនៈ កាលពី១០ថ្ងៃមុន។
ជាមួយគ្នានេះដែរ សេចក្តីជូនដំណឹងនេះបញ្ជាក់ថា ក្រសួងពាណិជ្ជកម្ម មិនមែនជាអ្នកកំណត់តម្លៃលក់រាយនៅកម្ពុជាទេ ដោយក្រសួងគ្រាន់តែស្រង់តម្លៃឡើងចុះនៃប្រេងតាមទីផ្សារអន្ដរជាតិ។
ក្រសួងបន្តថា កន្លងមក ដើម្បីជួយសម្រួលដល់ជីវភាពប្រជាពលរដ្ឋ និងមានការចែករំលែកពីក្រុមហ៊ុនប្រេងឥន្ធនៈនៅកម្ពុជា រដ្ឋាភិបាលបានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន៦,៥សេនដុល្លារ/លីត្រ៕