សហភាពសហជីពកម្ពុជា ស្នើឱ្យរដ្ឋាភិបាលចាត់វិធានការតាមរយៈការកាត់បន្ថយពន្ធនាំចូលប្រេងឥន្ធនៈ និងបញ្ចេញកញ្ចប់ថវិកា ដើម្បីទប់ស្កាត់កុំឱ្យតម្លៃប្រេងបន្ដហក់ឡើងថែមទៀត។
នៅក្នុងសេចក្ដីថ្លែងការណ៍មួយរបស់សហភាពសហជីពកម្ពុជា ចុះថ្ងៃទី២២ ខែមិថុនា ឆ្នាំ២០២២ បានលើកឡើងថា បច្ចុប្បន្ននេះ តម្លៃប្រេងឥន្ធនៈមានការហក់ឡើងខ្ពស់ ដែលធ្វើឱ្យប្រជាពលរដ្ឋភាគច្រើនមានការប្រឈម និងទទួលផលប៉ះពាល់យ៉ាងធ្ងន់ធ្ងរចំពោះជីវភាពរស់នៅប្រចាំថ្ងៃរបស់ប្រជាពលរដ្ឋ ហើយរដ្ឋាភិបាលហាក់មិនបានខ្វល់អំពីតម្លៃប្រេងឥន្ធនៈនេះឡើយ។
សហភាពសហជីពកម្ពុជា បានបន្តថា តម្លៃប្រេងឥន្ធនៈហក់ឡើងខ្ពស់ នាំឱ្យតម្លៃទំនិញគ្រប់មុខលើទីផ្សារក៏ហក់ឡើងខ្ពស់ដែរ ដែលធ្វើឱ្យប្រជាពលរដ្ឋដែលមានប្រាក់ចំណូលទាប និងមធ្យម ដូចជា មន្រ្ដីរាជការ អាជីវករ កម្មករ អ្នកលក់ដូរមិនរៀបរយ និងកសិករ ជាដើម ទទួលរងផលប៉ះពាល់ធ្ងន់ធ្ងរក្នុងជីវភាពប្រចាំថ្ងៃរបស់ពួកគេ។
សេចក្តីថ្លែងការណ៍ដដែលបានគូសបញ្ជាក់ថា៖ «ចំពោះបញ្ហាតម្លៃប្រេងឥន្ធនៈដែលមានតម្លៃហក់ឡើងខ្ពស់នេះ បណ្ដាលមកពីសង្គ្រាមអ៊ុយក្រែនយ៉ាងណាក៏ដោយ រដ្ឋាភិបាលត្រូវចាត់វិធានការបញ្ចុះតម្លៃនៃការនាំប្រេងចូល និងបញ្ចេញកញ្ចប់ថវិកាជាតិ ដើម្បីទប់ស្កាត់តម្លៃប្រេងឥន្ធនៈឱ្យមានតម្លៃសមរម្យ មិនត្រូវទុកឱ្យតម្លៃប្រេងបន្ដហក់ឡើងតទៅទៀតទេ»។
ករណីនេះ សហភាពសហជីពកម្ពុជា ស្នើដល់រដ្ឋាភិបាលកាត់បន្ថយពន្ធលើការនាំចូលប្រេងឥន្ធនៈ និងបញ្ចេញកញ្ចប់ថវិកាជាតិ ដើម្បីទប់ស្កាត់និងបញ្ចុះតម្លៃប្រេងឥន្ធនៈត្រឹមតម្លៃមួយសមរម្យ ក្នុងការសម្រួលដល់ការប្រើប្រាស់ និងជីវភាពរស់នៅរបស់ប្រជាពលរដ្ឋខ្មែរ។
បើតាមសេចក្តីជូនដំណឹងរបស់ក្រសួងពាណិជ្ជកម្ម ចុះថ្ងៃទី២១ ខែមិថុនា ឆ្នាំ២០២២ ស្ដីពី ថ្លៃលក់រាយប្រេងឥន្ធនៈនៅតាមស្ថានីយ បានឱ្យដឹងថា ចាប់ពីថ្ងៃទី២១ ដល់ថ្ងៃទី៣០ ខែមិថុនានេះ តម្លៃលក់រាយប្រេងឥន្ធនៈ ត្រូវបានកំណត់ ៥ ៨០០រៀលក្នុង១លីត្រ សម្រាប់សាំងធម្មតា និង ៦ ៣០០រៀលក្នុងមួយលីត្រសម្រាប់ប្រេងម៉ាស៊ូត។ បើធៀបនឹងតម្លៃលក់រាយប្រេងឥន្ធនៈកាលពី១០ថ្ងៃមុន ប្រេងសាំងធម្មតាមានតម្លៃថេរ ខណៈតម្លៃប្រេងម៉ាស៊ូត បានកើនឡើងចំនួន២០០រៀល៕
