យោងតាមវីដេអូមួយដែលត្រូវបានបង្ហោះក្នុងគណនីហ្វេសប៊ុករបស់មន្រ្តីសមាគមអាដហុកមួយរូប បានបង្ហាញឱ្យឃើញពីសកម្មភាពរបស់អភិបាលខេត្តបន្ទាយមានជ័យ លោក អ៊ុំ រាត្រី ដែលបានស្តីបន្ទោសខ្លាំងៗលើអភិបាលស្រុកភ្នំស្រុក លោក ជូ បុត្រ ទាក់ទងនឹងការរៀបចំបញ្ជីឈ្មោះពលរដ្ឋមិនគ្រប់គ្រាន់ដើម្បីចូលរួមពិធីមួយដែលនឹងត្រូវចូលរួមដោយលោកនាយករដ្ឋមន្ត្រីនៅក្នុងសប្ដាហ៍នេះ។
អភិបាលខេត្តខាងលើនេះមានការខឹងសម្បាយ៉ាងខ្លាំងចំពោះការបំពេញការងារមិនល្អរបស់លោក ជូ បុត្រ ក្នុងការរៀបចំបញ្ជីឈ្មោះពលរដ្ឋក្នុងស្រុករបស់ខ្លួនឱ្យបានគ្រប់គ្រាន់ ដើម្បីចូលរួមក្នុងពិធីលែងកូនត្រីដែលនឹងត្រូវធ្វើឡើងនៅថ្ងៃទី១ ខែកក្កដា ខាងមុខនេះ ក្រោមអធិបតីភាពលោកនាយករដ្ឋមន្ត្រី ហ៊ុន សែន។
វីដេអូដដែលនេះបានបង្ហាញឱ្យឃើញទៀតថា លោក អ៊ុំ រាត្រី ហាក់ដូចជាមានការខឹងសម្បាចំពោះបញ្ជីឈ្មោះនៃចំនួនពលរដ្ឋដែលអភិបាលស្រុកភ្នំស្រុកបានដាក់ជូន ក៏ដូចជាភាពមិនច្បាស់លាស់របស់អភិបាលស្រុករូបនេះជុំវិញចំនួនអ្នកចូលរួមក្នុងពិធីនេះផងដែរ។
ថ្លែងបន្ទាប់ពីពិនិត្យតួលេខពលរដ្ឋចំនួន៣ឃុំ ក្នុងស្រុកភ្នំស្រុក ដែលនឹងត្រូវចូលរួម លោក អ៊ុំ រាត្រី បានប្រើពាក្យសម្ដីខ្លាំងៗទៅកាន់លោក ជូ បុត្រ ថា៖ «ខ្ញុំធ្លាប់បានប្រាប់លោកពីតួលេខនេះយ៉ាងច្បាស់ ហេតុអ្វីបានលោកស្ដាប់មិនបាន»។
នៅចុងបញ្ចប់នៃវីដេអូដែលមានរយៈពេលខ្លីនេះ គេសង្កេតឃើញថា លោក ជូ បុត្រ បានដើរចេញពីទីតាំងដោយឱនក្បាលចុះក្រោម។
ទាក់ទិននឹងករណីនេះ វីអូឌីមិនអាចធ្វើការទាក់ទងទៅកាន់លោក អ៊ុំ រាត្រី និងលោក ជូ បុត្រ ដើម្បីសុំការអធិប្បាយបន្ថែមបានទេ កាលពីថ្ងៃចន្ទម្សិលមិញនេះ។
ទោះជាយ៉ាងណា មេឃុំស្រះជីក លោក ជូប ថាន ដែលបានចូលរួមក្នុងហេតុការណ៍នេះ បានបញ្ជាក់ថា ករណីស្ដីបន្ទោសនេះពិតជាបានកើតឡើងមែនកាលពីថ្ងៃអាទិត្យ។
លោកថា កិច្ចប្រជុំខាងលើនេះត្រូវបានរៀបចំឡើងក្នុងគោលបំណងពិភាក្សាអំពីការរៀបចំពិធីលែងកូនត្រីទៅក្នុងអាងស្តុកទឹកមួយ ដែលនឹងត្រូវធ្វើឡើងនៅថ្ងៃសុក្រនេះ។
ទាក់ទិននឹងសំណួរថាតើមានករណីឈ្លោះប្រកែកគ្នាឬយ៉ាងណានោះ មេឃុំខាងលើនេះហាក់ស្ទាក់ស្ទើរក្នុងការធ្វើអត្ថាធិប្បាយអំពីករណីនេះ។
លោកថា៖ «វាមិនមែនជារឿងចម្លែកនោះទេ សម្រាប់មន្រ្តីថ្នាក់ធំ [ក្នុងករណីស្ដីបន្ទោសនេះ]។ រាល់ពេលដែលយើងធ្វើអ្វីមួយមានកំហុស វាតែងតែមានការស្ដីបន្ទោសតិចតួចហើយ។ វាជារឿងធម្មតានោះទេ»។
លោកបន្ថែមថា៖ «នៅពេលដែលថ្នាក់ដឹកនាំដាក់ការងារឱ្យយើងបំពេញ គឺយើងត្រូវតែខិតខំប្រឹងប្រឹងអនុវត្តគោលនយោបាយនិងគោលការណ៍ទាំងនោះ»។
ជាមួយគ្នានេះ អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តបន្ទាយមានជ័យ លោក ស៊ុំ ចន្ទគា ដែលជាអ្នកបង្ហោះវីដេអូខាងលើនេះ បានលើកឡើងថា អភិបាលខេត្តគួរតែធ្វើជាគំរូដល់មន្ត្រីរដ្ឋាភិបាលផ្សេងទៀត ខណៈលោកសុំមិនធ្វើការអត្ថាធិប្បាយទាក់ទងនឹងអាកប្បកិរិយារបស់លោក អ៊ុំ រាត្រី ឡើយ។
លោកថា៖ «[យើង] មិនចង់ធ្វើការអត្ថាធិប្បាយលើរឿងនេះទេ ប៉ុន្តែយើងចង់និយាយថា ថ្នាក់ដឹកនាំគំរូល្អមួយគឺជាបុគ្គលដែលមានសីលធម៌ខ្ពស់ ដែលគួរតែធ្វើឱ្យអ្នកដទៃអនុវត្តតាមពួកគេ ហើយធ្វើតែអំពើល្អ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Banteay Meanchey Governor Lambasts Local Official Over Fish Event