លោកនាយករដ្ឋមន្ត្រី ហ៊ុន សែន បានបញ្ជាក់ជំហរថា បក្សកាន់អំណាចនៅតែបន្តដើរលើមាគា៌ប្រជាធិបតេយ្យនិងនីតិរដ្ឋដោយឥតងាករេ ស្របតាមបរិបទសង្គមកម្ពុជា ដើម្បីឆ្លើយតបទៅនឹងបំណងប្រាថ្នារបស់ប្រជាពលរដ្ឋ ដែលការបញ្ជាក់នេះ ស្របពេលសហគមន៍អន្តរជាតិបន្តទាមទារឱ្យកម្ពុជាស្តារប្រជាធិបតេយ្យឡើងវិញ ក្រោយមានការរំលាយគណបក្សប្រឆាំង។
ក្នុងពិធីប្រារព្ធខួប៧១ឆ្នាំ នៃថ្ងៃកំណើតគណបក្សប្រជាជនកម្ពុជាដែលធ្វើឡើងក្នុងរាជធានីភ្នំពេញ នាថ្ងៃអង្គារនេះ លោកនាយករដ្ឋមន្ត្រី ហ៊ុន សែន ថ្លែងថា ការដែលប្រជាពលរដ្ឋបោះឆ្នោតគាំទ្រឱ្យគណបក្សនេះបានបន្តដឹកនាំប្រទេសជាបន្តបន្ទាប់រហូតដល់បច្ចុប្បន្ន ដោយសារតែប្រជាពលរដ្ឋមានជំនឿលើការដឹកនាំរបស់គណបក្សនេះ។
លោកបន្តថា ជ័យជម្នះថ្មីទៀតនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ដែលបានបិទបញ្ចប់ទៅកាលពីថ្ងៃទី៥ ខែមិថុនា ឆ្នាំ២០២២នេះ កាន់តែបង្ហាញច្បាស់ថា ប្រជាជនកម្ពុជាត្រូវការគណបក្សនេះចាំបាច់ តាំងពីថ្នាក់ជាតិ រហូតដល់ថ្នាក់មូលដ្ឋាន ហើយថាដំណើរបោះឆ្នោតនេះក៏បង្ហាញផងដែរពីគ្រឹះសន្តិភាព និងការចាក់គ្រឹះប្រជាធិបតេយ្យនៅកម្ពុជា។
លោកថា៖ «គណបក្សប្រជាជនកម្ពុជាបន្តដើរទៅមុខឥតងាករេលើមាគា៌ប្រជាធិបតេយ្យ សេរីពហុបក្ស និងនីតិរដ្ឋ ដែលស្របទៅនឹងបរិបទសង្គមកម្ពុជា និងឆ្លើយតបទាំងស្រុងទៅនឹងបំណងប្រាថ្នាដ៏ពិសិដ្ឋរបស់ប្រជាជន»។
អតីតតំណាងរាស្ត្រគណបក្សប្រឆាំង ដែលបច្ចុប្បន្នជាអនុប្រធានបណ្ដោះអាសន្នគណបក្សកែទម្រង់កម្ពុជា លោក អ៊ូ ច័ន្ទរ័ត្ន កត់សម្គាល់ថា សាររបស់មេដឹកនាំបក្សអំណាចពេលនេះ ហាក់ស៊ីចង្វាក់គ្នាទៅនឹងការជំរុញរបស់សហគមន៍អន្តរជាតិដែលចង់ឃើញកម្ពុជាវិលទៅស្តារប្រជាធិបតេយ្យឡើងវិញ ក្រោយគណបក្សប្រឆាំងធំមួយមានអ្នកគាំទ្រជិតពាក់កណ្តាលប្រទេសត្រូវបានគេរំលាយ។
ប៉ុន្តែលោកចោទសួរថា តើសារនេះជាការប្តេជ្ញាចិត្តប្រកបដោយឆន្ទៈពិតដើម្បីស្តារប្រជាធិបតេយ្យ ឬជាសារនយោបាយដើម្បីបន្លំភ្នែកជាតិនិងអន្តរជាតិ ដូចបញ្ហាដែលបានកើតឡើង៥ឆ្នាំមកនេះ។
លោកថា៖ «ខ្ញុំដូចនៅចាំបានថា មិនមែនមានតែម្តងនេះទេ ដែលមេដឹកនាំគណបក្សប្រជាជនយល់ស្របថាត្រូវតែធ្វើទៅតាមរដ្ឋធម្មនុញ្ញ ដែលចែងថា ប្រទេសកម្ពុជាត្រូវតែអនុវត្តគោលការណ៍ប្រជាធិបតេយ្យសេរីពហុបក្សនោះ។ ប៉ុន្តែយើងដឹងទាំងអស់គ្នាថា ប៉ុន្មានឆ្នាំមុននេះ គណបក្សមួយត្រូវរំលាយបាត់ទៅ។ ហើយកន្លងមក ៥ឆ្នាំនេះ គណបក្សប្រជាជនដឹកនាំរដ្ឋាភិបាលម្នាក់ឯង សភាម្នាក់ឯង ព្រមទាំងមានឥទ្ធិពលមកលើប្រព័ន្ធតុលាការទៀត»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង យល់ឃើញថា បើទោះជាមានការបញ្ជាក់តាមរយៈសាររបស់មេដឹកនាំបក្សកាន់អំណាចនេះ ប៉ុន្តែលោកនៅតែមានក្តីបារម្ភពីការរួមតូចនៃលំហប្រជាធិបតេយ្យនៅកម្ពុជា ដោយសម្អាងថា ដរាបណាសេរីភាពអ្នកសារព័ត៌មាន សង្គមស៊ីវិល និងក្រុមអ្នកនយោបាយជំទាស់ មិនត្រូវបានធ្វើឡើងក្រោមការអនុវត្តជាក់ស្តែងនោះទេ។
លោកថា៖ «រឿងសំខាន់មួយទៀត ក្នុងដំណើរការប្រជាធិបតេយ្យនេះ វាសំខាន់ខ្លាំងណាស់ក្នុងការលើកកម្ពស់តួនាទីបក្សប្រឆាំងនៅក្នុងការចូលរួមអភិវឌ្ឍប្រទេសជាតិ តាមរយៈការត្រួតពិនិត្យអំណាច ពីព្រោះថា កាលណាគាត់ធ្វើការត្រួតពិនិត្យអំណាចបានជាមួយនឹងគណបក្សកាន់អំណាច វាធ្វើឱ្យដំណើរការប្រជាធិបតេយ្យ វាដំណើរការល្អ ហើយវាធ្វើឱ្យអភិបាលកិច្ចមូលដ្ឋានហ្នឹង វាដំណើរការទៅបានល្អដែរ»។
សហភាពអឺរ៉ុប កាលពីចុងឆ្នាំ២០២០ បានសម្រេចដកប្រព័ន្ធអនុគ្រោះពន្ធ «អ្វីៗគ្រប់យ៉ាង លើកលែងតែអាវុធហៅ (EBA)» ២០ភាគរយពីកម្ពុជា មុនកាលកំណត់ ដោយសម្អាងថា សិទ្ធិមនុស្ស សិទ្ធិនយោបាយ និងសិទ្ធិការងារ ជាដើម ត្រូវបានរំលោភបំពានជាប្រព័ន្ធ។
នៅប៉ុន្មានខែមុននេះ សភាអឺរ៉ុបបានព្រមានថ្មីទៀតថា កម្ពុជានឹងបាត់បង់ប្រព័ន្ធអនុគ្រោះពន្ធនេះទាំងស្រុង បើក្រោយការបោះឆ្នោតជាតិឆ្នាំ២០២៣ខាងមុខ លំហប្រជាធិបតេយ្យនៅកម្ពុជានៅតែបន្តរួមតូច ជាពិសេសសិទ្ធិចូលរួមប្រកួតការបោះឆ្នោតឡើងវិញរបស់គណបក្សប្រឆាំង ដើម្បីឱ្យការបោះឆ្នោតដំណើរការទៅដោយសេរី ត្រឹមត្រូវ និងយុត្តិធម៌នោះ៕