លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បានប្ដេជ្ញាចិត្តធ្វើឱ្យឃុំសង្កាត់មានភាពរីកចម្រើន និងធ្វើឱ្យប្រជាពលរដ្ឋរស់នៅក្នុងភាពសុខដុមរមនា ទាំងក្នុងសហគមន៍និងសង្គមជាតិ ដើម្បីឆ្លើយតបទៅនឹងការសន្យារបស់ខ្លួននាពេលឃោសនារកសំឡេងឆ្នោតថ្មីៗនេះ។
ការថ្លែងរបស់លោក ហ៊ុន សែន នេះធ្វើឡើងក្នុងពិធីប្រារព្ធខួប៧១ឆ្នាំ នៃថ្ងៃកំណើតគណបក្សប្រជាជនកម្ពុជា ដែលធ្វើឡើងនៅស្នាក់ការកណ្ដាលគណបក្ស រាជធានីភ្នំពេញ នាថ្ងៃអង្គារនេះ។
ក្នុងពិធីនោះ លោកនាយករដ្ឋមន្ត្រី ហ៊ុន សែន បានថ្លែងថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ កាលពីថ្ងៃទី៥ ខែមិថុនា ឆ្នាំ២០២២នេះ បានប្រព្រឹត្តទៅដោយជោគជ័យ ក្នុងបរិយាកាសនយោបាយ អព្យាក្រឹត្យ សេរី និងសុខសុវត្ថិភាព។ លោកបន្តថា ការបោះឆ្នោតនេះ មានប្រជាពលរដ្ឋចេញទៅបោះឆ្នោតច្រើនកុះករនៅតាមការិយាល័យបោះឆ្នោតនីមួយៗ ប្រកបដោយភាពថ្លៃថ្នូរ សប្បាយរីករាយ និងតាមឆន្ទៈរបស់ពួកគេ ដើម្បីបន្តជ្រើសរើសមេដឹកនាំនៅមូលដ្ឋាន។
លោកនាយករដ្ឋមន្ត្រី ហ៊ុន សែន បញ្ជាក់ថា ជ័យជម្នះរបស់គណបក្សប្រជាជនកម្ពុជានាពេលនេះ ជាមូលដ្ឋានជំរុញដល់ការប្តេជ្ញាចិត្តអនុវត្តគោលនយោបាយដែលបានសន្យាអំឡុងពេលឃោសនារកសំឡេងឆ្នោត។
លោកថា៖ «គណបក្សសូមប្ដេជ្ញាប្រឹងប្រែងពេញទំហឹង ដើម្បីអភិវឌ្ឍគោលនយោបាយឃុំសង្កាត់ឆ្នាំ២០២២-២០២៧ ដែលបានប្រកាសជូនបងប្អូនជនរួមជាតិរួចមកហើយនោះឱ្យសម្រេចជោគជ័យ ធ្វើឱ្យឃុំសង្កាត់នៅទូទាំងប្រទេសកាន់តែមានការរីកចម្រើនឡើងលើគ្រប់វិស័យ ប្រជាជនកាន់តែមានជីវភាពធូរធារ ហើយបន្តរស់នៅយ៉ាងសុខដុមរមនាទាំងក្នុងគ្រួសារ ទាំងក្នុងសហគមន៍ ក៏ដូចជាសង្គមជាតិទាំងមូល»។
បើតាមលទ្ធផលផ្លូវការដែលគណៈកម្មាធិការជាតិរៀបចំការបោះឆ្នោតបានប្រកាសកាលពីថ្ងៃទី២៦ ខែមិថុនានេះ គណបក្សប្រជាជនកម្ពុជានៅបន្តគ្រប់គ្រងតំណែងមេឃុំចៅសង្កាត់ភាគច្រើននៅទូទាំងប្រទេស ក្នុងចំណោមគណបក្សសរុបទាំង១៧ដែលបានចូលរួមប្រកួត។
គណបក្សប្រជាជនកម្ពុជានៅបន្តគ្រប់គ្រងតំណែងក្រុមប្រឹក្សាឃុំសង្កាត់ចំនួន៩ ៣៧៦តំណែង ជាមេឃុំ-ចៅសង្កាត់ចំនួន១ ៦៤៨ ក្នុងចំណោមតំណែងក្រុមប្រឹក្សាសរុប១១ ៦២២។
ចំណែកគណបក្សដេញតាមពីក្រោយស្ថិតនៅលេខរៀងទី២ គឺគណបក្សភ្លើងទៀន ទទួលបានតំណែងក្រុមប្រឹក្សាចំនួន២ ១៩៨ និងមេឃុំ-ចៅសង្កាត់ចំនួន៤៕
