ក្រុមស្ត្រីថ្ងៃសុក្រ ជាភរិយានិងសាច់ញាតិសកម្មជនគណបក្សសង្គ្រោះជាតិដែលតុលាការបានរំលាយ បាននាំគ្នាទៅដាក់ញត្តិនៅសហភាពអឺរ៉ុប នៅថ្ងៃសុក្រនេះ ដើម្បីស្នើដល់មន្ត្រីទូតជួយជំរុញទៅរដ្ឋាភិបាលកម្ពុជាឱ្យមានការដោះលែងក្រុមគ្រួសាររបស់ពួកគាត់ដែលត្រូវបានតុលាការកាត់ទោសឱ្យជាប់ពន្ធនាគារចន្លោះពី៣ឆ្នាំដល់៦ឆ្នាំ ក្រោមបទ «ញុះញង់ និងរួមគំនិតក្បត់»។
ក្នុងការប្រមូលផ្តុំនេះដែរ ក៏មានការតាមឃ្លាំមើលពីសំណាក់ក្រុមសន្តិសុខខណ្ឌដូនពេញផងដែរ ក្នុងនោះក៏មានការប៉ះទង្គិចពាក្យសម្តីគ្នា ខណៈក្រុមសន្តិសុខមិនអនុញ្ញាតឱ្យក្រុមស្ត្រីជិត១០នាក់លើកបដានៅមុខសហភាពអឺរ៉ុបនោះឡើយ។
ភរិយាលោក ស៊ុន ធន់ អតីតមន្ត្រីគណបក្សសង្គ្រោះជាតិដែលត្រូវបានតុលាការរំលាយ គឺអ្នកស្រី សេង ចាន់ថន មានប្រសាសន៍នៅមុនពេលដាក់ញត្តិថា ពួកគាត់មិនចង់ដើរដាក់ញត្តិនៅតាមបណ្តាស្ថានទូតនិងស្ថាប័នផ្សេងៗបែបនេះទេ ប៉ុន្តែដោយសារតែគ្រួសាររបស់ពួកគាត់រងនូវភាពអយុត្តិធម៌ ព្រោះតែស្វាមីរបស់គាត់ត្រូវតុលាការផ្តន្ទាទោសដាក់ពន្ធនាគារជាង៣ឆ្នាំ។
ករណីនេះ អ្នកស្រីបានស្នើដល់មន្ត្រីទូតនៃបណ្តាប្រទេសក្នុងសហភាពអឺរ៉ុបជួយអន្តរាគមន៍ទៅរដ្ឋាភិបាលកម្ពុជា ដើម្បីឱ្យមានការដោះលែងស្វាមីនិងសកម្មជនបក្សប្រឆាំងដែលត្រូវតុលាការបានរំលាយ ឱ្យមានសេរីភាពវិញ។
អ្នកស្រីក៏បានបង្ហាញការខកចិត្ត ដែលក្រុមសន្តិសុខខណ្ឌដូនពេញមិនអនុញ្ញាតឱ្យពួកគាត់លើកបដានៅទីសាធារណៈនេះផងដែរ។
កាលពីពេលកន្លងមក ក្រុមស្ត្រីថ្ងៃសុក្រ ក៏នាំគ្នារកកិច្ចអន្តរាគមន៍ពីប្រទេសលោកសេរីមួយចំនួនប្រចាំកម្ពុជាឱ្យជួយជំរុញទៅរដ្ឋាភិបាលនិងតុលាការទម្លាក់ចោលបទចោទប្រកាន់ទាំងអស់ និងដោះលែងគ្រួសាររបស់ពួកគេឱ្យមានសេរីភាពវិញ។
សកម្មជនគណបក្សសង្គ្រោះជាតិដែលត្រូវតុលាការរំលាយកាលពីឆ្នាំ២០១៧ ត្រូវបានចៅក្រមសាលាដំបូងរាជធានីភ្នំពេញចោទប្រកាន់ពីបទ «ញុះញង់ និងរួមគំនិតក្បត់» ពាក់ព័ន្ធនឹងការគាំទ្រដំណើរវិលត្រលប់របស់លោក សម រង្ស៊ី និងមន្ត្រីបក្សប្រឆាំងផ្សេងទៀត។
កាលពីថ្ងៃទី១៤ ខែមិថុនា ឆ្នាំ២០២២ តុលាការសាលាដំបូងរាជធានីភ្នំពេញ បានសម្រេចផ្តន្ទាទោសមេដឹកនាំ និងអ្នកគាំទ្របក្សប្រឆាំងដែលតុលាការបានរំលាយ រួមទាំងកញ្ញា សេង ធារី មេធាវីខ្មែរអាមេរិក ដាក់ពន្ធនាគារចន្លោះពី៣ឆ្នាំទៅ៨ឆ្នាំ។
បន្ទាប់ពីមានការកាត់ទោសក្រុមបក្សជំទាស់ក្នុងទ្រង់ទ្រាយធំនេះ អ្នកជំនាញសិទ្ធិមនុស្សនៅអង្គការសហប្រជាជាតិ កាលពីថ្ងៃពុធ ក្នុងសប្តាហ៍នេះ បានស្នើរដ្ឋាភិបាលកម្ពុជាពិនិត្យឡើងវិញលើករណីនេះ ដោយសម្អាងថា វិធាននោះមិនបានភ្ជាប់កាតព្វកិច្ចនៃការគោរពសិទ្ធិមនុស្សអន្តរជាតិ និងលំហនយោបាយពហុបក្ស៕