ពលរដ្ឋជាង៤០គ្រួសារ រស់នៅឃុំស្វាយរមៀត ស្រុកខ្សាច់កណ្ដាល ខេត្តកណ្ដាល ចោទអាជ្ញាធរថាបានដាក់គ្រឿងចក្រឈូសឆាយដីធ្វើផ្លូវប៉ះពាល់ដល់ដីធ្លី និងផលដំណាំរបស់ពួកគាត់ ដោយគ្មានការជូនដំណឹងជាមុន និងដោះស្រាយសំណងណាមួយដល់ពួកគាត់ឡើយ។
លោក សេង វ៉ន អាយុ៦៣ឆ្នាំ អះអាងថាជាប្រជាពលរដ្ឋរស់នៅភូមិកណ្ដាល ឃុំស្វាយរមៀត ប្រាប់វីអូឌីនៅថ្ងៃចន្ទនេះថា អាជ្ញាធរបានដាក់គ្រឿងចក្រកាយ និងឈូសឆាយដីនៅក្នុងសហគមន៍ ដើម្បីធ្វើផ្លូវ ដោយមិនបានជូនដំណឹងជាមុនអំពីគម្រោងឈូសឆាយនេះទេ។ លោកបន្តថា ការឈូសឆាយដីនោះបានធ្វើឱ្យប៉ះពាល់ដល់ក្បាលដីប្រជាពលរដ្ឋជាង៤០គ្រួសារ នៅភូមិកណ្ដាល ភូមិស្វាយតំណាក់ ភូមិឈើទាល នៃឃុំស្វាយរមៀត ដោយក្នុងមួយគ្រួសារប៉ះពាល់ក្បាលដីចន្លោះពី១០ទៅ៥០ម៉ែត្រ និងប៉ះពាល់ដល់ដំណាំហូបផ្លែផងដែរ។
លោក សេង វ៉ន បន្តទៀតថា លោកមិនជំទាស់នឹងគម្រោងអភិវឌ្ឍន៍របស់រដ្ឋាភិបាលនោះទេ ប៉ុន្តែលោកទាមទារឱ្យអាជ្ញាធរពាក់ព័ន្ធត្រូវជូនដំណឹង និងពិភាក្សាជាមួយប្រជាពលរដ្ឋជាមុន អំពីបញ្ហាផលប៉ះពាល់ដីធ្លី និងផលដំណាំរបស់ពួកគាត់។
លោកបន្ថែមថា៖ «ខ្ញុំទាមទារដោះស្រាយជាសំណងជាលុយ ខ្ញុំមិនប្រឆាំងនឹងគម្រោងអភិវឌ្ឍន៍ទេ ប៉ុន្តែដីនេះខ្ញុំទិញគេ។ ខ្ញុំយកលុយធនាគារមកទិញ មិនទាន់បង់សងគេអស់ផង។ ចុះបើមកយកឆៅៗអ៊ីចឹង ខ្ញុំបានអី?»
លោក សួន តាំង ប្រជាពលរដ្ឋរស់នៅភូមិស្វាយតំណាក់ និយាយថា គ្រួសារលោកបានខ្ចីលុយពីធនាគារមកទិញដីនេះសម្រាប់បង្កបង្កើនផល ដោយមិនទាន់សងធនាគារគ្រប់នៅឡើយទេ ខណៈអាជ្ញាធរបានចាក់ដីលុបដីស្រែរបស់លោកអស់ជាង១០ទៅ២០ម៉ែត្រទៅហើយ និងសំណងមិនត្រូវបានដោះស្រាយ។
ពលរដ្ឋរូបនេះបន្តថា ថ្មីៗនេះ អ្នកភូមិបានដាក់បណ្ដឹងមួយទៅសាលាឃុំស្វាយរមៀត ដើម្បីសុំឱ្យជួយរកដំណោះស្រាយ ប៉ុន្តែអាជ្ញាធរមូលដ្ឋានមិនអើពើក្នុងការដោះស្រាយជូនពលរដ្ឋឡើយ។
លោកបន្ថែមថា៖ «ខ្ញុំសុំឱ្យអាជ្ញាធរដោះស្រាយជូនពួកខ្ញុំ ព្រោះដីខ្ញុំ ខ្ញុំខ្ចីលុយធនាគារទិញ បង់គេមិនទាន់រួចផង។ ឥលូវគេយកគ្រឿងចក្រកាយយកដីខ្ញុំអស់១០ទៅ២០ម៉ែត្រទទេ ដោយអត់ជូនដំណឹងយើងមួយម៉ាត់ផង»។
មេឃុំស្វាយរមៀត លោក លឹម គាង មានប្រសាសន៍ថា សកម្មភាពឈូសឆាយនោះ គឺក្រសួងធនធានទឹក កំពុងអភិវឌ្ឍធ្វើប្រឡាយទប់ទឹកផង និងធ្វើផ្លូវលំសម្រាប់ប្រជាពលរដ្ឋក្នុងឃុំធ្វើដំណើរផង។ មេឃុំរូបនេះបន្តថា ជុំវិញការឈូសឆាយនេះ លោកបានសួរទៅខាងក្រសួងធនធានទឹកដែរ អំពីសំណងផលប៉ះពាល់ក្បាលដីពលរដ្ឋ ប៉ុន្តែខាងក្រសួងបញ្ជាក់ថាគ្មានគោលការណ៍ដោះស្រាយសំណងជូនពលរដ្ឋនោះទេ។
លោកបន្ថែមថា៖ «ខាងក្រសួងធនធានទឹក គាត់ជាអ្នកអនុវត្តគម្រោងហ្នឹង ទី១ គឺការពារព្រែក ទី២ បានផ្លូវដល់ប្រជាជនសម្រាប់ធ្វើដំណើរ ទី៣ គឺដីរបស់ប្រជាជននៅជាប់ហ្នឹងលែងកាត់ចូលព្រែកទៀតហើយ។ អ៊ីចឹងនេះជាគោលការណ៍របស់ក្រសួងទេ មិនមែនរបស់ឃុំទេ។ ខ្ញុំបានសួរក្រសួងរួចហើយ គ្មានគោលការណ៍ដោះស្រាយសំណងផលប៉ះពាល់ជូនពលរដ្ឋទេ»។
វីអូឌី មិនទាន់អាចសុំការបញ្ជាក់ជុំវិញករណីនេះពីអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានទេ នៅថ្ងៃចន្ទនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ប្រសិនបើការសាងសង់ទំនប់ ឬផ្លូវ ដោយរដ្ឋាភិបាលបានចេញអនុក្រឹត្យកំណត់អ័ក្សផ្លូវរួចហើយ គឺរដ្ឋអាចធ្វើផ្លូវនោះដោយគ្មានការដោះស្រាយសំណងជូនពលរដ្ឋទេ។ ប៉ុន្តែ លោកថា បើការអភិវឌ្ឍនេះបានប៉ះពាល់ដល់ដីពលរដ្ឋដែលមានបណ្ណកម្មសិទ្ធិស្របច្បាប់ និងមិនស្ថិតក្នុងអ័ក្សផ្លូវដែលបានកំណត់ដោយអនុក្រឹត្យទេ គឺរដ្ឋត្រូវដោះស្រាយសំណងជូនពលរដ្ឋ។
លោកបន្ថែមថា៖ «ពលរដ្ឋមានសិទ្ធិក្នុងការ[ព្រមព្រៀងឱ្យរដ្ឋ]ដកហូតអចលនទ្រព្យរបស់ខ្លួន ដើម្បីផលប្រយោជន៍សាធារណៈ ប៉ុន្តែត្រូវមានការវាយតម្លៃផលប៉ះពាល់បរិស្ថានសង្គមជាមុន ហើយត្រូវមានការយល់ព្រមពីម្ចាស់ដីពីប្រជាពលរដ្ឋទៅតាមតម្លៃសមរម្យដែលគាត់អាចទទួលបាន នេះបើតាមច្បាប់អស្សាមិករណ៍យើង»៕
