មន្ត្រីជំនាញកសិកម្ម និងព្រៃឈើខេត្តសៀមរាប អះអាងថា ខាងជំនាញកំពុងរៀបចំដំណើរការដាក់កាមេរ៉ាលើដើមក្រញូងក្នុងនៅតំបន់អភិរក្សព្រៃឈើមួយកន្លែងក្នុងស្រុកស្វាយលើ និងស្រុកបន្ទាយស្រី បន្ទាប់ពីមានការចូលលួចកាប់ដើមឈើក្រញូងចំនួន៤ដើម កាលពីពាក់កណ្ដាលខែមិថុនាកន្លងទៅ ដោយមិនទាន់រកជនល្មើសឃើញនៅឡើយ។
នាយខណ្ឌរដ្ឋបាលព្រៃឈើខេត្តសៀមរាប លោក ម៉ុង ប៊ុនលីម ថ្លែងប្រាប់វីអូឌីនៅថ្ងៃពុធនេះថា មកដល់ពេលនេះ អាជ្ញាធរមិនទាន់រកឃើញជនល្មើសដែលលួចកាប់ដើមក្រញូងចំនួន៤ដើមនៅក្នុងតំបន់ស្ដារនិងអភិវឌ្ឍន៍ព្រៃឈើនៅក្នុងខេត្តសៀមរាបនៅឡើយទេ។
តែយ៉ាងណា លោកបន្ដថា អាជ្ញាធរកំពុងបន្ដស្វែងរកជនល្មើសដែលលួចកាប់ឈើទាំងនោះរហូត ដោយមិនបិទបញ្ចប់នោះឡើយ។
លោកថា៖ «អត់បិទទេ! ឃើញថ្ងៃណា អនុវត្តថ្ងៃហ្នឹង! ជនល្មើសនៅតែជាជនល្មើស! ឱ្យតែឃើញ យើងអនុវត្តច្បាប់តែប៉ុណ្ណឹង!»
នាយខណ្ឌរដ្ឋបាលព្រៃឈើខេត្តសៀមរាបរូបនេះបានឱ្យដឹងទៀតថា បន្ទាប់ពីមានករណីលួចកាប់ដើមឈើពូជក្រញូងចំនួន៤ដើមនេះមក អាជ្ញាធរបានដាក់កម្លាំងស៊ើបអង្កេត និងកំពុងរៀបចំដាក់កាមេរ៉ាលើដើមក្រញូងមួយចំនួន ដើម្បីការពារការលួចកាប់ប្រភេទឈើប្រណិតនេះបន្តទៀត។
លោកថា៖ «យើងដាក់កម្លាំងស៊ើបអង្កេត ហើយជាពិសេសយើងដាក់កាមេរ៉ា»។
លោកបន្ដថា៖ «យើងដាក់តែក្រញូងមាន៥៥២[ដើម] បាត់អស់បួនដើម សល់ប៉ុន្មានយើងដាក់[កាមេរ៉ា]»។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប លោក ទា គឹមសុទ្ធ ក៏បានឱ្យដឹងនៅថ្ងៃនេះដែរថា អាជ្ញាធរកំពុងតែរៀបដំណើរការក្នុងការដាក់កាមេរ៉ា ដើម្បីជួយការពារព្រៃឈើនៅតំបន់អភិរក្សនេះ។ បើទោះជាតំបន់នេះមិនមានសេវាគ្រប់គ្រាន់ និងមានការពិបាកក្នុងការដាក់កាមេរ៉ាសុវត្ថិភាពយ៉ាងណាក៏ដោយ តែអាជ្ញាធរកំពុងដំណើរការរៀបចំ។
លោកថា៖ «តំបន់នោះអត់សេវាផង កាមេរ៉ាក៏ពិបាកដាក់។ ឥលូវកំពុងរៀបចំដាក់បណ្ដើរៗហើយ»។
លោកបន្ដថា ការដាក់កាមេរ៉ានេះ អាជ្ញាធរគ្រាន់តែដឹងនៅពេលមានជនល្មើសកាប់ឈើក្នុងតំបន់នេះប៉ុណ្ណោះ។ យ៉ាងណា លោកថា ការការពារនេះ វាគ្រាន់តែជារឿងមួយប៉ុណ្ណោះ ប៉ុន្ដែអ្វីដែលសំខាន់បំផុត គឺស្មារតីនៃការចូលរួមរបស់ប្រជាពលរដ្ឋក្នុងការថែរក្សាព្រៃឈើទុកដល់កូនចៅជំនាន់ក្រោយ។
ទាក់ទិនទៅនឹងរឿងនេះ ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង យល់ឃើញថា អាជ្ញាធរគួរតែពន្លឿននីតិវិធីក្នុងការស៊ើបអង្កេត ចំពោះការលួចកាប់ដើមក្រញូងក្នុងតំបន់អភិរក្សដែលមិនទាន់រកឃើញជនល្មើសនេះ។ លោកជឿជាក់ថា ប្រសិនបើអាជ្ញាធរមានឆន្ទៈពិតប្រាកដក្នុងការស្វែងរកជនល្មើស ប្រាកដជាអាចធ្វើបានក្នុងរយៈពេលខ្លី។
ចំពោះការដាក់កាមេរ៉ាឃ្លាំមើលព្រៃឈើរបស់អាជ្ញាធរពេលនេះ លោក ហេង គឹមហុង យល់ឃើញថា វាជារឿងល្អដែលអាជ្ញាធរបង្ហាញនូវការយកចិត្តទុកដាក់ក្នុងការការពារព្រៃឈើ ប៉ុន្តែនេះជាការចំណាយធនធានដ៏ច្រើនមួយដែរ។ លោកបន្ថែមថា មន្ត្រីជំនាញត្រូវពង្រឹងគុណភាពនិងប្រសិទ្ធភាពមន្ត្រីរបស់ខ្លួនល្អជាជាង។
លោកថា៖ «ខ្ញុំគិតថា វាការចំណាយធនធានមួយច្រើនដែរ ខណៈនេះការចំណាយមិនចាំបាច់មួយចំនួន យើងមិនចាំបាច់ចំណាយនោះទេ ប៉ុន្តែគ្រាន់ពង្រឹងគុណភាពនិងប្រសិទ្ធភាពរបស់មន្រ្ដី»។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្តាញយុវជនកម្ពុជារូបនេះ លើកឡើងថា ក្នុងករណីមានបទល្មើសនៅតំបន់អភិរក្សនេះ មន្ត្រីប្រចាំការនៅទីនោះគួរតែជាអ្នកទទួលខុសត្រូវមុនគេ ទាំងផ្នែកពិន័យរដ្ឋបាលនិងផ្លូវច្បាប់ ដើម្បីជាគំរូភាពនៃការអនុវត្តច្បាប់ឱ្យកាន់តែមានប្រសិទ្ធភាព។
មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប កាលពីថ្ងៃទី១៦ ខែមិថុនា ឆ្នាំ២០២២ បានឱ្យដឹងថា មានជនខិលខូចចូលលួចកាប់ឈើពូជក្រញូងចំនួន៤ដើមដែលមានអាយុកាលប្រមាណ៥០ឆ្នាំ។ មន្ទីរជំនាញមួយនេះក៏បានចេញសេចក្ដីប្រកាសផ្ដល់រង្វាន់ជាទឹកប្រាក់ចំនួន១ ០០០ដុល្លារដល់សាធារណជនដែលបានស្គាល់និងជូនដណឹងពាក់ព័ន្ធនឹងជនល្មើស ហើយផ្ដល់ព័ត៌មានដល់សមត្ថកិច្ចរហូតចាប់ជនល្មើសនោះបាន។ បន្ថែមពីនេះ ព័ត៌មានត្រូវបានរក្សាជាការសម្ងាត់ មិនឱ្យមានបញ្ហាដល់អ្នកដែលបានផ្ដល់ព័ត៌មាននោះទេ។
បើតាមមន្ត្រីជំនាញខេត្តសៀមរាប ឱ្យដឹងថា តំបន់ស្ដារ និងអភិវឌ្ឍន៍ព្រៃឈើ មានផ្ទៃដីជិត២ ០០០ហិតា ដែលបានទទួលស្គាល់ជាតំបន់ការពារពីក្រសួងកសិកម្ម កាលពីឆ្នាំ២០១៦ និងមានមន្ត្រីជំនាញដើម្បីការពារប្រមាណ១០នាក់៕