ពលរដ្ឋដែលកំពុងរងផលប៉ះពាល់ពីគម្រោងអភិវឌ្ឍន៍ព្រលានយន្តហោះថ្មី ស្ថិតក្នុងស្រុកកណ្ដាលស្ទឹង ខេត្តកណ្ដាល បានប្រមូលផ្តុំគ្នាយកញត្តិដាក់នៅគេហដ្ឋានកូនប្រុសច្បងលោកនាយករដ្ឋមន្ត្រីហ៊ុន សែន ដើម្បីសុំកិច្ចអន្តរាគមន៍ជួយពន្លឿនដោះស្រាយបញ្ហាដីធ្លីជូនពួកគាត់ឱ្យបានឆាប់ ខណៈពួកគេបារម្ភខ្លាចក្រុមហ៊ុនមិនផ្តល់សំណងសមរម្យដល់ពួកគេ។
លោក អ៊ឹម ដារ៉ា ដែលអះអាងថា ជាតំណាងប្រជាពលរដ្ឋចំនួន៣ភូមិ រួមមានភូមិពុតស ភូមិព្រែកស្លែង និងភូមិបឹងខ្យាង បានឱ្យដឹងនៅថ្ងៃសៅរិ៍នេះថា ដើមចមដែលនាំឱ្យពួកគាត់ជិត១០០នាក់ប្រមូលផ្តុំយកញត្តិដាក់ដល់ផ្ទះលោក ហ៊ុន ម៉ាណែត នៅក្បែរផ្សារមាន់អាំង ស្ថិតក្នុងខណ្ឌទួលគោក នៅព្រឹកថ្ងៃនេះ ដោយសាររយៈពេល៤ឆ្នាំហើយ អាជ្ញាធរមូលដ្ឋានចាប់ពីថ្នាក់ក្រោមជាតិដល់ថ្នាក់ជាតិ រួមទាំងស្ថាប័នរដ្ឋមួយចំនួន មិនព្រមដោះស្រាយបញ្ហាដីធ្លីជូនពួកគាត់នៅឡើយ។
លោកបន្តថា នៅពេលទៅដល់ផ្ទះលោក ហ៊ុន ម៉ាណែត ស្រាប់តែអភិបាលខណ្ឌទួលគោក លោក ជា ពិសី បានចេញមកទទួលយកញត្តិជំនួស ដោយអះអាងថា គាត់ទទួលបញ្ជាពីលោក ហ៊ុន ម៉ាណែត។ មិនត្រឹមតែប៉ុណ្ណោះលោកថា លោក ជា ពិសី បានសន្យាជាមួយពលរដ្ឋថា នឹងយកញត្តិនេះប្រគល់ឱ្យដល់ដៃលោក ហ៊ុន ម៉ាណែត ដើម្បីពិនិត្យនិងសម្រេចនៅពេលក្រោយទៀតផង។
តំណាងពលរដ្ឋរូបនោះបង្ហាញជំនឿថា លោក ហ៊ុន ម៉ាណែត នឹងជួយដោះស្រាយបញ្ហាដីធ្លីជូនពួកគាត់នៅពេលឆាប់ៗនេះ។
លោកនិយាយថា៖ «ពួកខ្ញុំយកញត្តិដាក់ដល់ផ្ទះឯកឧត្តម ហ៊ុន ម៉ាណែត ដែលជាជម្រើសចុងក្រោយ ឱ្យគាត់ជួយដោះស្រាយ ដោយសារពួកខ្ញុំធ្លាប់ដាក់ញត្តិនៅរដ្ឋសភា ព្រឹទ្ធសភា ក្រសួងដែនដី និងអភិបាលខេត្តកណ្តាលដែរ ប៉ុន្តែអត់មានដំណោះស្រាយ»។
លោកបន្ថែមថា ដីប្រជាពលរដ្ឋដែលត្រូវបានក្រុមហ៊ុនអភិវឌ្ឍន៍ព្រលានយន្តហោះយកនោះ បានកំណត់តម្លៃ១ម៉ែត្រការ៉េ ចំនួន៨ដុល្លារជូនពលរដ្ឋតែប៉ុណ្ណោះ ខណៈពួកគាត់ទាមទារ១ការ៉េចន្លោះពី៥០ដុល្លារ ទៅ១០០ដុល្លារ ទើបស្របតាមតម្លៃទីផ្សារបច្ចុប្បន្ននេះ។
កាលពីខែកញ្ញា ឆ្នាំ២០២១ អង្គការសង្គមស៊ីវិលចំនួន៣១ស្ថាប័នបានចេញសេចក្ដីថ្លែងការណ៍មួយស្នើដល់ស្ថាប័នពាក់ព័ន្ធផ្ដល់សំណងឱ្យបានសមស្របតាមតម្លៃទីផ្សារ ជូនប្រជាពលរដ្ឋដែលកំពុងរងផលប៉ះពាល់ដីធ្លីពីគម្រោងអភិវឌ្ឍន៍ព្រលានយន្តហោះអន្តរជាតិថ្មីនេះ និងចៀសវាងនូវកិច្ចព្រមព្រៀងដោយមានការបង្ខិតបង្ខំ ដើម្បីរក្សានូវការគោរពសិទ្ធិមនុស្សដែលទទួលស្គាល់ដោយរដ្ឋធម្មនុញ្ញកម្ពុជា។
ក្រុមអង្គការទាំងនេះក៏បានស្នើដល់ភាគីពាក់ព័ន្ធ ជាពិសេសរដ្ឋាភិបាល ត្រូវដោះស្រាយបញ្ហាជម្លោះដីធ្លីនេះតាមនីតិវិធី ដោយកោះហៅភាគីទំនាស់មកចរចាគ្នា ដោយឈរលើផលប្រយោជន៍និងសេចក្ដីត្រូវការរបស់គ្រប់ភាគី ហើយភាគីទំនាស់និងអាជ្ញាធរគួររក្សាឱ្យបាននូវភាពអហិង្សា។
កាលពីខែកក្កដា ឆ្នាំ២០២១ ក្រុមពលរដ្ឋបានចេញលិខិតចំហមួយច្បាប់ ដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ នេះ បានធ្វើឱ្យប៉ះពាល់ប្រជាពលរដ្ឋ ៣៣០គ្រួសារ មកពីឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ នៅស្រុកបាទី ខេត្តតាកែវ ដែលមានក្បាលដីទំហំជាង ១លានម៉ែត្រការ៉េ។
មាត្រា៤៤ នៃរដ្ឋធម្មនុញ្ញ បានចែងថា ពលរដ្ឋកម្ពុជាគ្រប់រូប ទោះជាបុគ្គលក្ដី ជាសមូហភាពក្ដី គឺមានសិទ្ធិជាម្ចាស់កម្មសិទ្ធិ។ កម្មសិទ្ធិឯកជនស្របច្បាប់ស្ថិតនៅក្រោមការគាំពារនៃច្បាប់នេះ ដែលនឹងត្រូវដកហូតដើម្បីជាប្រយោជន៍សាធារណៈបាន លុះត្រាតែមានការផ្ដល់សំណងជាមុនដោយសមរម្យនិងយុត្តិធម៌។
ចំណែកមាត្រា២២ នៃច្បាប់អស្សាមិករណ៍ បានចែងថា ប្រាក់សំណងដែលត្រូវផ្ដល់ឱ្យម្ចាស់អចលនវត្ថុ ឬម្ចាស់កម្មសិទ្ធិ ត្រូវគិតតាមថ្លៃទីផ្សារ ឬថ្លៃជំនួសនូវកាលបរិច្ឆេទនៃការចេញសេចក្ដីប្រកាសស្ដីពី «គម្រោងអស្សាមិករណ៍»។ ជាងនេះទៅទៀត សំណងត្រូវទូទាត់ជាសាច់ប្រាក់ ជាទ្រព្យ ឬជាសិទ្ធិជំនួសទៅតាមភាពជាក់ស្ដែង ដោយមានការយល់ព្រមពីម្ចាស់អចលនវត្ថុ ឬម្ចាស់កម្មសិទ្ធិ និងពីគណៈកម្មការអស្សាមិករណ៍ តាមមាត្រា២៤ នៃច្បាប់ដដែលនេះផងដែរ៕
