ប្រជាពលរដ្ឋចំនួន១៣១គ្រួសារ នៅស្រុកគូលែន ខេត្តព្រះវិហារ បារម្ភពីការបណ្ដេញចេញទាំងបង្ខំ ក្រោយអាជ្ញាធរដាក់គ្រឿងចក្រឈូសឆាយផ្ទះនិងផលដំណាំ ដែលពួកគេអះអាងថាបានអាស្រ័យផលជាង១០ឆ្នាំមកហើយ។
ប្រជាពលរដ្ឋរស់នៅភូមិ-ឃុំស្រយ៉ង់ ស្រុកគូលែន លោក ភ្លូ បោន ប្រាប់វីអូឌីនៅថ្ងៃព្រហស្បតិ៍នេះថា អ្នកភូមិ១៣១គ្រួសារ នៅឃុំស្រយ៉ង់ និងឃុំត្បែងពីរ កំពុងបារម្ភពីការបណ្ដេញចេញទាំងបង្ខំ ក្រោយអាជ្ញាធរប្រកាសថា ពួកគាត់រស់នៅនិងអាស្រ័យផលលើដីរបស់ក្រុមហ៊ុន «សិលាដាម៉ិច» ដោយខុសច្បាប់។ លោកថា នៅថ្ងៃនេះ អ្នកភូមិប្រហែល៤០នាក់ តំណាងឱ្យពលរដ្ឋទាំង១៣១គ្រួសារ បានប្រមូលផ្តុំគ្នាលើដីចម្ការ ដើម្បីតវ៉ា ក្រោយអាជ្ញាធរប្រកាសដាក់គ្រឿងចក្រឈូសឆាយផលដំណាំនិងផ្ទះសម្បែងរបស់ពួកគាត់ជាថ្មី។
ពលរដ្ឋរូបនេះអះអាងថា អ្នកភូមិបានចូលទៅរស់នៅនិងអាស្រ័យផលលើដីកំពុងមានជម្លោះនេះតាំងពីឆ្នាំ២០១២ ដោយបានបង្កបង្កើនផលដាំដំណាំហូបផ្លែ ដូចជា ចេក ស្វាយ ខ្នុរ ដំឡូងមី ធ្វើស្រែ និងដំណាំផ្សេងៗទៀត រហូតមកដល់បច្ចុប្បន្ន។ លោកថា ចាប់តាំងពីពលរដ្ឋចូលអាស្រ័យផលរហូតមកដល់បច្ចុប្បន្ននេះ គឺមិនធ្លាប់មានបញ្ហាអ្វីនោះទេ ទើបតែនៅដើមខែមីនា ឆ្នាំ២០២២នេះ អាជ្ញាធរខេត្តព្រះវិហារបានដាក់គ្រឿងចក្រឈូសឆាយផ្ទះពលរដ្ឋអស់ប្រហែល៦០ខ្នង និងផលដំណាំប្រហែល៤៥០ហិកតា។
លោក ភ្លូ បោន បន្ថែមថា ករណីអាជ្ញាធរខេត្តព្រះវិហារដាក់គ្រឿងចក្រឈូសឆាយផ្ទះនិងផលដំណាំរបស់ពលរដ្ឋនេះ គឺមិនបានជូនដំណឹងជាមុននោះទេ ហើយក្រោយការឈូសឆាយកាលពីខែមីនា ឆ្នាំ២០២២នោះ អ្នកភូមិនាំគ្នាទៅដាក់ញត្តិនៅខុទ្ទកាល័យនាយករដ្ឋមន្ត្រី ក្រសួងរៀបចំដែនដី រដ្ឋសភា ក្រសួងមហាផ្ទៃ និងស្ថាប័នរដ្ឋផ្សេងទៀត ដើម្បីសុំអន្តរាគមន៍ដោះស្រាយ ប៉ុន្តែរហូតមកដល់ពេលនេះ ពុំមានដំណោះស្រាយណាមួយសម្រាប់ពួកគាត់ឡើយ។
លោកបន្ថែមថា៖ «ដំណាំដាំដុះរបស់ប្រជាពលរដ្ឋនិងផ្ទះមានប៉ុន្មាន គេឈូសចោលទាំងអស់។ មុនៗ ប្រជាពលរដ្ឋគាត់បង្កបង្កើនផលដាំដុះ មិនដែលមានអ្នកណាមករំខានអីទេ។ ឥលូវនេះ ខ្ញុំមិនទាន់ដឹងថា ខាងរដ្ឋបាលខេត្តគេចុះមកនេះ គេដោះស្រាយតាមរបៀបណា ខ្ញុំមិនដឹងទេ! ប៉ុន្តែបើការដោះស្រាយនោះមិនសមរម្យទេ ពួកខ្ញុំជាប្រជាពលរដ្ឋក៏មិនព្រមដែរ ព្រោះពួកខ្ញុំបានអាស្រ័យផលដាំដុះច្រើនឆ្នាំមកហើយ។ ពួកខ្ញុំនឹងឡើងទៅរកកិច្ចអន្តរាគមន៍ពីសម្តេច ហ៊ុន សែន បន្តទៀត»។
លោក ឃ្លោក លាំ ជាពលដ្ឋរស់នៅឃុំត្រយ៉ង់ដែរនោះ និយាយថា ការចុះឈូសឆាយដំណាំនិងផ្ទះពលរដ្ឋកន្លងមក គឺអាជ្ញាធរបានគំរាមកំហែងចាប់ និងប្តឹងពលរដ្ឋទៅតុលាការ ប្រសិនបើពលរដ្ឋហ៊ានតវ៉ា និងថតរូបភាពអំពីសកម្មភាពឈូសឆាយនោះ។
ពលរដ្ឋរូបនេះឱ្យដឹងថា គ្រួសារលោកមានផ្ទះនិងដីចម្ការចំនួន៦ហិកតា ពេញដោយដំណាំហូបផ្លែ ត្រូវបានអាជ្ញាធរខេត្តព្រះវិហារដាក់គ្រឿងចក្រអមដោយកម្លាំងសមត្ថកិច្ចចម្រុះ ប្រដាប់ដោយកាំភ្លើង ចុះឈូសឆាយចោល កាលពីខែមីនា ឆ្នាំ២០២២នេះ ដោយមិនបានដោះស្រាយសំណងជូនគាត់ឡើយ។
លោកបន្ថែមថា៖ «កាលពីថ្ងៃឈូសឆាយនោះ អាជ្ញាធរគេគំរាមថា បើប្រជាពលរដ្ឋយើងហ៊ានតែចូលទៅតវ៉ា គេនឹងចាប់ដាក់គុក។ ដល់អ៊ីចឹងពលរដ្ឋគាត់អត់ហ៊ាន ឱ្យគេឈូសឆាយតាមចិត្ត។ បើទូរសព្ទវិញ បើអ្នកណាមាន គេចាប់ដកហូតអស់ គេអត់ឱ្យថតរូបទេ ទុកឱ្យគេឈូសតាមដំណើររបស់គេ។ ពលរដ្ឋម្នាក់ៗបានយំស្រែកមិនដឹងធ្វើម៉េច បើយើងអត់មានសិទ្ធិមានអំណាចដូចគេ មិនដឹងធ្វើអីគេកើត»។
កាលពីថ្ងៃទី៤ ខែមីនា ឆ្នាំ២០២២ ប្រជាពលរដ្ឋចំនួន១៣១គ្រួសារ និងមានដីសរុប៦៤៩ហិកតា នៅភូមិក្ដាក់ ឃុំត្បែងពីរ និងភូមិម្រេច ភូមិស្រយ៉ង់ត្បូង ឃុំស្រយ៉ង់ ស្រុកគូលែន ខេត្តព្រះវិហារ បាននាំគ្នាដាក់ញត្តិនៅរដ្ឋសភា ក្រសួងមហាផ្ទៃ និងខុទ្ទកាល័យនាយករដ្ឋមន្ត្រី ដើម្បីសុំឱ្យស្ថាប័នទាំងនេះ អន្តរាគមន៍ទៅរដ្ឋបាលខេត្តព្រះវិហារដោះស្រាយដីធ្លីជូនពួកគេ។
ក្នុងញត្តិនោះបានឱ្យដឹងថា កាលពីថ្ងៃទី១ ខែមីនា ឆ្នាំ២០២២ កម្លាំងអាជ្ញាធរចម្រុះ ដឹកនាំដោយអភិបាលរងខេត្តព្រះវិហារ លោក អ៊ុង វុទ្ធី បានបញ្ជាកម្លាំងនិងគ្រឿងចក្រឈូសឆាយបំផ្លាញផ្ទះសម្បែងនិងផលដំណាំរបស់ពលរដ្ឋអស់គ្មានសល់ ហើយបានបណ្តេញពលរដ្ឋចេញពីលំនៅ និងបានគំរាមប្តឹងនិងចាប់ពលរដ្ឋដាក់ពន្ធនាគារថែមទៀត។
វីអូឌី មិនអាចសុំការឆ្លើយតបជុំវិញការចោទប្រកាន់នេះពីអភិបាលខេត្តព្រះវិហារ លោក ប្រាក់ សុវណ្ណ ខណៈអភិបាលរងខេត្ត លោក អ៊ុង វុទ្ធី បដិសេធឆ្លើយតបតាមទូរសព្ទ ដោយតម្រូវឱ្យអ្នកសារព័ត៌មានទៅជួបផ្ទាល់។
មន្រ្តីសម្របសម្រួលសមាគមការពារសិទ្ធិមនុស្សអាហុកប្រចាំខេត្តព្រះវិហារ លោក ឡោ ចាន់ មានប្រសាសន៍ថា ករណីអាជ្ញាធរដាក់គ្រឿងចក្រឈូសឆាយផ្ទះនិងដំណាំពលរដ្ឋនោះ ជាទង្វើរំលោភសិទ្ធិពលរដ្ឋធ្ងន់ធ្ងរក្នុងការទទួលបានដីធ្លី ដែលធានាដោយរដ្ឋធម្មនុញ្ញ និងច្បាប់អន្តរជាតិ។
មន្ត្រីសិទ្ធិមនុស្សរូបនេះបន្តថា នៅខេត្តព្រះវិហារ ភាគច្រើនក្រុមហ៊ុននិងអាជ្ញាធរជាអ្នកដែលទៅរំលោភបំពានយកដីធ្លីរបស់ប្រជាពលរដ្ឋ និងតែងតែប្រើប្រាស់កម្លាំងបង្ក្រាបលើទៅពលរដ្ឋ។
លោកបន្ថែមថា ៖«អាជ្ញាធរគួរតែកោះហៅពលរដ្ឋមកប្រជុំ ដើម្បីរកដំណោះស្រាយជូនពួកគាត់ គឺអាជ្ញាធរមិនត្រូវប្រើកម្លាំង ប្រើអំណាចទៅឈូសឆាយដីធ្លីរបស់ពួកគាត់នោះទេ។ អាជ្ញាធរគួរណារកដំណោះស្រាយដោយសន្តិវិធី ជាជាងប្រើហិង្សាលើពលរដ្ឋ។ ប៉ុន្តែយើងឃើញថា កន្លងមក អាជ្ញាធរខេត្តព្រះវិហារមិនដែលហៅពលរដ្ឋមកដោះស្រាយតាមនីតិវិធីនោះទេ ទោះពួកគាត់បានដាក់ញត្តិក៏ដោយ»។
ប្រធានក្រុមហ៊ុនសិលាដាម៉ិច លោក សំណាង សីម៉ា ប្រាប់កាសែតភ្នំពេញប៉ុស្តិ៍ កាលពីឆ្នាំ២០១៥ ថាក្រុមហ៊ុននេះបានទទួលដីសម្បទានសេដ្ឋកិច្ចពីរដ្ឋាភិបាលនៅឆ្នាំ២០០៩ លើផ្ទៃដីទំហំ៩ ០០០ហិកតា ដើម្បីធ្វើការអភិវឌ្ឍដាំកៅស៊ូ ស្ថិតក្នុងស្រុកគូលែន ខេត្តព្រះវិហារ។ ប៉ុន្តែមន្ត្រីសង្គមស៊ីវិល រកឃើញថា គម្រោងអភិវឌ្ឍន៍របស់ក្រុមហ៊ុននេះបានធ្វើឱ្យប៉ះពាល់ដល់សិទ្ធិមនុស្សធ្ងន់ធ្ងរ ជាពិសេសសិទ្ធិទទួលបានការកាន់កាប់ដីធ្លី និងបញ្ចេញមតិ៕