ពលរដ្ឋអះអាងថា ពួកគាត់ជាង៣០០នាក់ តំណាងឱ្យអ្នកភូមិជិត១ ០០០គ្រួសារ មកពីឃុំចំនួន៤ នៃស្រុកស្រែអំបិល ខេត្តកោះកុង បានប្រមូលផ្ដុំគ្នាមុខសាលាស្រុក នៅថ្ងៃចន្ទនេះ ដើម្បីជំរុញទៅអាជ្ញាធរពន្លឿនការដោះស្រាយដីសម្បទានសង្គមកិច្ចដល់ពួកគាត់ ខណៈពួកគាត់កំពុងខ្វះដីសម្រាប់បង្កបង្កើនផល។
ពលរដ្ឋម្នាក់នៅឃុំដងពែង លោក ឡាំង ចៀវ ប្រាប់វីអូឌីនៅថ្ងៃទី២៥ ខែកក្កដានេះថា អ្នកភូមិចំនួន៩៥៥គ្រួសារ នៅឃុំដងពែង ឃុំជីខលើ ឃុំជីខក្រោម និងឃុំបឹងព្រាវ ស្រុកស្រែអំបិល ខេត្តកោះកុង បានដាក់ពាក្យស្នើសុំដីសម្បទានសង្គមកិច្ចទៅអាជ្ញាធរស្រុកនិងខេត្តរយៈពេល៤ឆ្នាំមកហើយ ប៉ុន្តែរហូតពេលនេះ អាជ្ញាធរទាំងនោះមិនទាន់មានការដោះស្រាយណាមួយសម្រាប់ពលរដ្ឋឡើយ។
ពលរដ្ឋរូបនេះបន្តថា អ្នកភូមិជាង៣០០នាក់បានប្រមូលផ្ដុំនៅមុខសាលាស្រុកស្រែអំបិល ថ្ងៃចន្ទនេះ ដើម្បីតាមដានញត្តិរបស់ពួកគាត់ និងជំរុញទៅអាជ្ញាធរឱ្យពន្លឿនការដោះស្រាយជូនពលរដ្ឋ។
លោកបន្ថែមថា៖ «ដោយសារប្រជាពលរដ្ឋយើងកំពុងខ្វះខាតដីសម្រាប់បង្កបង្កើនផលធ្វើស្រែចម្ការ ហើយកូនចៅរបស់ពួកគាត់ក៏ច្រើន។ អ្នកខ្លះគាត់អត់មានដីសម្រាប់ធ្វើលំនៅឋាន អ្នកខ្លះទៀតកំពុងរស់នៅលើចំណីព្រែករបស់រដ្ឋ ដោយពួកគាត់គ្មានដីសម្រាប់ការរស់នៅ»។
ពលរដ្ឋនៅឃុំដងពែងម្នាក់ទៀត លោក ចី រឿន និយាយថា គ្រួសារលោកមានដីសម្រាប់ធ្វើស្រែតិចតួចប៉ុណ្ណោះ ខណៈសមាជិកគ្រួសារមានចំនួនច្រើន និងកំពុងមានជីវភាពខ្វះខាត។ លោកថា នៅខេត្តកោះកុងមានដីទំនេរជាច្រើនកន្លែង ដែលរដ្ឋគួរតែបែងចែកជាដីសម្បទានសង្គមកិច្ចជូនពលរដ្ឋកំពុងខ្វះខាតដីអាស្រ័យផល ដើម្បីឱ្យពួកគាត់បានបង្កបង្កើនផលធ្វើស្រែចម្ការផ្គត់ផ្គង់ជីវភាពគ្រួសារ។
លោកបន្ថែមថា៖ «ខ្ញុំរាល់ថ្ងៃនេះប្រកបមុខរបរធ្វើស្រែបន្តិចបន្តួច ខ្វះមុខខ្វះក្រោយ ហើយប្រជាពលរដ្ឋយើងដែលស្នើដីសម្បទានសង្គមកិច្ចហ្នឹង ព្រោះយើងវាអត់។ អត់មានដីធ្លីសម្រាប់កសិកម្មបង្កបង្កើនផល។ អ៊ីចឹងខ្ញុំសូមអំពាវនាវដល់អាជ្ញាធរពាក់ព័ន្ធជួយដោះស្រាយដីធ្លីជូនពួកខ្ញុំបានបង្កបង្កើនផលផង»៕
សូមលោកអ្នកនាងរង់ចាំតាមដានព័ត៌មានពិស្តារអំពីរឿងនេះនៅពេលបន្តបន្ទាប់។
