អង្គការសហប្រជាជាតិ និងបណ្ដាប្រទេសមួយចំនួននៅលើពិភពលោក បានថ្កោលទោសរបបយោធាមីយ៉ាន់ម៉ា ដែលបានប្រហារជីវិតសកម្មជនបក្សប្រឆាំងចំនួន៤រូប ដោយពួកគេចាត់ទុកករណីនេះថាជាការរំលោភសិទ្ធិមនុស្សធ្ងន់ធ្ងរ និងជាអំពើដ៏ឃោរឃៅមួយ។
ដកស្រង់ចេញពីសារព័ត៌មាន Reuters ប្រធានផ្នែកសិទ្ធិមនុស្សនៃអង្គការសហប្រជាជាតិ លោកស្រី មីឆែល បាឆេលែត (Michelle Bachelet) បានហៅការប្រហារជីវិតនេះថា «អំពើដ៏ឃោរឃៅ»។
អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតធឺរ៉េស (Antonio Guterres) បានថ្កោលទោសយ៉ាងដាច់អហង្ការចំពោះការប្រហារជីវិតនេះ ហើយបានអំពាវនាវជាថ្មីម្តងទៀតដល់របបយោធាមីយ៉ាន់ម៉ាឱ្យមានការដោះលែងអ្នកទោសដែលត្រូវបានឃុំខ្លួនតាមអំពើចិត្តទាំងអស់ រួមទាំងលោកស្រី អ៊ុងសាន ស៊ូជី (Aung San Suu Kyi) ផងដែរ។
នៅក្នុងសេចក្ដីថ្លែងការណ៍រួមមួយ សហភាពអឺរ៉ុប ប្រទេសអូស្ត្រាលី កាណាដា ជប៉ុន នូវែលសេឡង់ ន័រវេស កូរ៉េខាងត្បូង អង់គ្លេស និងសហរដ្ឋអាមេរិក បានពណ៌នាការប្រហារជីវិតនេះថាជាអំពើហិង្សាដែលមិនអាចអត់ឱនបាន ដែលបង្ហាញពីការមិនគោរពសិទ្ធិមនុស្ស និងការមិនគោរពច្បាប់របស់របបនេះ។
ចំណែកតំណាងអង្គការលើកលែងទោសអន្តរជាតិ (Amnesty International) លោក ឆៃរ៉ា សាន់ចចជីអូ (Chiara Sangiorgio) បាននិយាយថា ការប្រហារជីវិតនេះ គឺជាការដើរថយក្រោយ ហើយថារបបយោធានឹងមិនបញ្ឈប់ទង្វើនេះទេ។
លោក អេឡែន ភាសុន (Elaine Pearson) នាយកស្តីទីនៃអង្គការឃ្លាំមើលសិទ្ធិមនុស្ស (Human Rights Watch) ប្រចាំតំបន់អាស៊ី បាននិយាយថា វាគឺជាអំពើឃោរឃៅបំផុតដែលមានគោលបំណងបង្ក្រាបចលនាតវ៉ាប្រឆាំងរដ្ឋប្រហារ។
គួរបញ្ជាក់ថា អាជ្ញាធរយោធារបស់ប្រទេសមីយ៉ាន់ម៉ាបានប្រហារជីវិតសកម្មជនប្រជាធិបតេយ្យចំនួន៤នាក់ ដែលត្រូវបានចោទប្រកាន់ថាបានចូលរួមអនុវត្ត «អំពើភេរវកម្ម» នៅក្នុងប្រទេស។
តាមរយៈការកាត់ទោសប្រហារជីវិតក្នុងសវនាការបិទទ្វារ កាលពីខែមករាកន្លងទៅ បុគ្គលទាំង៤នាក់នេះត្រូវបានតុលាការចោទប្រកាន់ថាបានចូលរួមចំណែកជួយដល់កងជីវពល ក្នុងការប្រយុទ្ធដោយបង្ហូរឈាមតទល់នឹងកងទ័ពដែលទទួលបានអំណាចតាមរយៈរដ្ឋប្រហារ កាលពីឆ្នាំមុន។
យោងតាមសារព័ត៌មានរបស់មីយ៉ាន់ម៉ា Global New Light ក្នុងចំណោមអ្នកដែលត្រូវបានប្រហារជីវិតដោយព្យួរកទាំងនោះ រួមមាន សកម្មជនប្រជាធិបតេយ្យដ៏លេចធ្លោម្នាក់ លោក ក្យរ មីនយូ (Kyaw Min Yu) ឬត្រូវបានគេស្គាល់ថា ជីមី (Jimmy) អតីតសមាជិកគណបក្សរបស់លោកស្រី អ៊ុងសាន ស៊ូជី លោក ភ្យូ ហ្សេយ៉ា ថរ (Phyo Zeya Thaw) និងពីរនាក់ផ្សេងទៀត គឺលោក ឡា មីយូ អោង (Hla Myo Aung) និងលោក អោង ធូរ៉ា ហ្ស (Aung Thura Zaw)៕
