អតីតមន្ត្រីមកពីគណបក្សសាធារណរដ្ឋ និងគណបក្សប្រជាធិបតេយ្យនៅសហរដ្ឋអាមេរិករាប់សិបនាក់ បានប្រកាសកាលពីថ្ងៃពុធ អំពីការបង្កើតគណបក្សនយោបាយជាតិថ្មីមួយទៀត ដើម្បីអំពាវនាវដល់ម្ចាស់ឆ្នោតរាប់លាននាក់ដែលខកចិត្តជាមួយនឹងប្រព័ន្ធគណបក្សពីរដែលមិនដំណើរការរបស់ អាមេរិក។ នេះបើយោងតាមការផ្សាយរបស់សារព័ត៌មាន Reuters កាលពីថ្ងៃទី២៨ ខែកក្កដា។
គណបក្សថ្មីដែលមានឈ្មោះថា Forward នឹងមានសហប្រធានជាអតីតបេក្ខជនប្រធានាធិបតីមកពីគណបក្សប្រជាធិបតេយ្យ លោក អែនឌ្រូ យ៉ាង (Andrew Yang) និងអ្នកស្រី គ្រីស្ទីន ថុត វីតមែន (Christine Todd Whitman) អតីតអភិបាលរដ្ឋញូឆើស៊ី (New Jersey) មកពីគណបក្សសាធារណរដ្ឋ។ សមាជិកស្ថាបនិកគណបក្សនេះបង្ហាញក្ដីសង្ឃឹមថា គណបក្សនេះនឹងក្លាយជាជម្រើសមួយសម្រាប់ពលរដ្ឋអាមេរិក។
ប្រធានគណបក្សថ្មីនេះនឹងរៀបចំព្រឹត្តិការណ៍ជាបន្តបន្ទាប់នៅក្នុងទីក្រុងចំនួនពីរ នៅរដូវស្លឹកឈើជ្រុះនេះ ដើម្បីចាប់ផ្តើមកម្មវិធីរបស់ខ្លួន និងទាក់ទាញការគាំទ្រ។ ពួកគេនឹងរៀបចំពិធីសម្ពោធបង្កើតគណបក្សជាផ្លូវការ នៅទីក្រុងហ៊ូស្តុន (Houston) នៅថ្ងៃទី២៤ ខែកញ្ញា និងសន្និបាតជាតិលើកដំបូងរបស់គណបក្ស នៅក្នុងទីក្រុងធំមួយរបស់សហរដ្ឋអាមេរិក នៅរដូវក្ដៅក្រោយ។
សសរស្ដម្ភពីរនៃកម្មវិធីនយោបាយរបស់គណបក្សថ្មីនេះ គឺការពង្រឹងសេដ្ឋកិច្ចប្រកបដោយយុត្តិធម៌និងរីកចម្រើន និងផ្តល់ឱ្យប្រជាជនអាមេរិកនូវជម្រើសកាន់តែច្រើននៅក្នុងការបោះឆ្នោត។
គណបក្សថ្មីនេះ គឺជាគណបក្សកណ្ដាលនិយម។ គេរំពឹងថា មេដឹកនាំគណបក្សថ្មីនេះនឹងថ្លែងអំពីកម្មវិធីនយោបាយរបស់ខ្លួននៅក្នុងពិធីសម្ពោធបើកគណបក្សនៅថ្ងៃព្រហស្បតិ៍ខាងមុខ។
មិនមានភាពច្បាស់លាស់ទេ ថាតើគណបក្ស Forward អាចជះឥទ្ធិពលដល់លទ្ធផលនៃការបោះឆ្នោតរបស់គណបក្សណាមួយនៅអាមេរិក។ តែទោះជាយ៉ាងណាក៏ដោយ អ្នកវិភាគនយោបាយប៉ាន់ប្រមាណថា គណបក្សនេះនឹងទទួលបានជោគជ័យ។
មានប្រតិកម្មជាច្រើនពីសាធារណជននៅលើបណ្ដាញសង្គម Twitter។ អ្នកប្រជាធិបតេយ្យនិយមជាច្រើននាក់នៅលើបណ្ដាញសង្គមមួយនេះ បានសម្តែងការព្រួយបារម្ភថា គណបក្សថ្មីនេះនឹងទាញយកសន្លឹកឆ្នោតបានច្រើនពីគណបក្សប្រជាធិបតេយ្យ ជាជាងគណបក្សសាធារណរដ្ឋ និងអាចជួយឱ្យគណបក្សសាធារណរដ្ឋទទួលបានសន្លឹកឆ្នោតយ៉ាងប្រកៀក។
គណបក្ស Forward រំពឹងថាទទួលបានសន្លឹកឆ្នោតនៅក្នុងរដ្ឋចំនួន៣០ នៅចុងឆ្នាំ២០២៣ និងនៅក្នុងរដ្ឋទាំង៥០ នៅចុងឆ្នាំ២០២៤ ដែលជាពេលវេលាសម្រាប់ការបោះឆ្នោតជ្រើសរើសប្រធានាធិបតី និងរដ្ឋសភា នៅក្នុងឆ្នាំ២០២៤។ គណបក្សនេះមានគោលបំណងដាក់បេក្ខជនសម្រាប់ការប្រកួតប្រជែងក្នុងតំបន់ ដូចជា ក្រុមប្រឹក្សាសាលារៀន ក្រុមប្រឹក្សាក្រុង រដ្ឋសភាសហរដ្ឋអាមេរិក និងរហូតដល់តំណែងកំពូលរបស់ជាតិ គឺប្រធានាធិបតី៕