ប្រព័ន្ធផ្សព្វផ្សាយរបស់រដ្ឋមីយ៉ាន់ម៉ាបាននិយាយនៅថ្ងៃចន្ទនេះថា ប្រមុខរបបយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) នឹងបន្តដាក់ប្រទេសនៅក្នុងភាពអាសន្នរយៈពេលប្រាំមួយខែបន្ថែមទៀត ហើយក្រុមប្រឹក្សាការពារជាតិ និងសន្តិសុខរបស់របបយោធាក៏បានអនុម័តរួចហើយដែរ។ នេះបើយោងតាមការផ្សាយរបស់សារព័ត៌មាន Reuters នៅថ្ងៃទី០១ ខែសីហា នេះ។
របបយោធាបានប្រកាសដាក់ប្រទេសក្នុងគ្រាអាសន្នជាលើកដំបូង បន្ទាប់ពីបានដណ្ដើមអំណាចពីរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី (Aung San Suu Kyi) ដោយរដ្ឋប្រហារ កាលពីខែកុម្ភៈ ឆ្នាំមុន។
សារព័ត៌មាន Global New Light របស់មីយ៉ាន់ម៉ា បានរាយការណ៍ថា សមាជិកក្រុមប្រឹក្សាការពារជាតិ និងសន្តិសុខ បានគាំទ្រជាឯកច្ឆន្ទចំពោះសំណើបន្តដាក់ប្រទេសក្នុងគ្រាអាសន្នរយៈពេលប្រាំមួយខែទៀត។
សារព័ត៌មាននេះបានដកស្រង់សម្តីលោក មីន អ៊ុងឡាំង (Min Aung Hlaing) ថា៖ «នៅក្នុងប្រទេសរបស់យើង យើងត្រូវបន្តពង្រឹងប្រព័ន្ធប្រជាធិបតេយ្យពហុបក្សពិតប្រាកដ និងប្រកបដោយវិន័យ ដែលជាបំណងប្រាថ្នារបស់ប្រជាជន»។
ប្រទេសមីយ៉ាន់ម៉ាមានភាពចលាចលចាប់តាំងពីមានរដ្ឋប្រហារដោយក្រុមយោធា ផ្ដួលរំលំរដ្ឋាភិបាលស្របច្បាប់ដឹកនាំគណបក្សសម្ពន្ធជាតិប្រជាធិបតេយ្យរបស់អ្នកស្រី អ៊ុងសាន ស៊ូជី ដែលបានបណ្តាលឱ្យប្រទេសនេះធ្លាក់ទៅក្នុងជម្លោះនយោបាយនិងប្រដាប់អាវុធរីករាលដាលស្ទើរទូទាំងប្រទេស បន្ទាប់ពីកងទ័ពបានបង្ក្រាបការតវ៉ាដោយសន្តិវិធីនៅក្នុងទីក្រុងនានា។
របបយោធាបានអះអាងការពារខ្លួនថា ការធ្វើរដ្ឋប្រហារទម្លាក់រដ្ឋាភិបាលដឹកនាំដោយគណបក្សសម្ពន្ធជាតិដើម្បីប្រជាធិបតេយ្យ ដោយសារតែគណបក្សមួយនេះបានលួចបន្លំសន្លឹកឆ្នោតនៅក្នុងការបោះឆ្នោតសកលកាលពីខែវិច្ឆិកា ឆ្នាំ២០២០ ហើយដែលនាំឱ្យគណបក្សរបស់លោកស្រី អ៊ុងសាន ស៊ូជី (Aung San Suu Kyi) បានឈ្នះឆ្នោតនៅពេលនោះ។
ប៉ុន្តែក្រុមឃ្លាំមើលការបោះឆ្នោតរកមិនឃើញភស្តុតាងដែលបញ្ជាក់ពីការក្លែងបន្លំនោះឡើយ។
ក្រោយរដ្ឋប្រហារ របបយោធាបានសន្យាថានឹងរៀបចំឱ្យមានការបោះឆ្នោតថ្មីទៀតនៅខែសីហា ឆ្នាំ២០២៣ ខាងមុខ។
ទោះយ៉ាងណាក៏ដោយ ក្រុមប្រឆាំងមិនជឿថា ការបោះឆ្នោតដែលបានគ្រោងទុកនឹងប្រព្រឹត្តទៅដោយសេរីនិងយុត្តិធម៌នោះឡើយ៕