យ៉ាងហោចណាស់ កម្មករម្នាក់ស្លាប់ និង៦នាក់ផ្សេងទៀតបានរងរបួសធ្ងន់និងស្រាល ដោយសារជួបគ្រោះថ្នាក់ចរាចរណ៍បុកគ្នារវាងរថយន្តកូរ៉េ២តោនកន្លះ ដឹកកម្មករ បុកជាមួយរថយន្តតូរីស នៅចំណុចកំណាត់ផ្លូវជាតិលេខ៤១ ចន្លោះគីឡូម៉ែត្រ៣៨ និង៣៩ នៅក្នុងភូមិពោធិ៍ខ្ញែរ ឃុំពោធិ៍ម្រាល ស្រុកបរសេដ្ឋ ខេត្តកំពង់ស្ពឺ។
ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ស្ពឺ លោក ចឹក បុរិន មានប្រសាសន៍ថា គ្រោះថ្នាក់ចរាចរណ៍ដែលបានកើតឡើងនៅម៉ោងជាង៦ព្រឹកនេះ បានបណ្ដាលឱ្យកម្មករម្នាក់ស្លាប់ និង៦នាក់ទៀតរងរបួសធ្ងន់ស្រាល ខណៈសាកសពត្រូវបានបញ្ជូនទៅក្រុមគ្រួសារនៅស្រុកជុំគិរី ខេត្តកំពត ដើម្បីយកទៅធ្វើបុណ្យតាមប្រពៃណី។ លោកបន្តថា រថយន្តបង្កហេតុត្រូវបានអធិការនគរបាលស្រុកបរសេដ្ឋ យកទៅរក្សាទុក ដើម្បីចាត់វិធានការច្បាប់ ខណៈជនបង្កហេតុ លោកនៅមិនទាន់ដឹងថាត្រូវបានឃាត់ខ្លួនឬយ៉ាងណានោះទេ។
លោកមានប្រសាសន៍ថា៖ «ខ្ញុំអត់ទាន់ទទួលបានរបាយការណ៍ថាមានការឃាត់ខ្លួនជនបង្កនៅឡើយ គ្រាន់តែដឹងថា ឡានគេយកទៅទុកនៅប៉ូលិសចរាចរណ៍ នៅអធិការស្រុកបរសេដ្ឋអស់ហើយ ដើម្បីចាត់វិធានការច្បាប់បន្ត»។
អធិការដ្ឋាននគរបាលស្រុកបរសេដ្ឋ ខេត្តកំពង់ស្ពឺ លោក ចន សុភិត មានប្រសាសន៍បន្ថែមថា ក្រោយជួបឧបទ្ទវហេតុគ្រោះថ្នាក់ចរាចរណ៍នេះ ទាំងអ្នកបើកបររថយន្តកូរ៉េ និងអ្នកបើកបររថយន្តតូរីស បាននាំគ្នារត់គេចខ្លួនបាត់។ ទោះយ៉ាងណា លោកថា មន្ត្រីជំនាញបានកំណត់មុខសញ្ញាបានខ្លះៗហើយ ដើម្បីស្វែងរកចាប់ខ្លួនយកមកផ្តន្ទាទោសតាមច្បាប់។
លោកថា៖ «អ្នកបើកបររត់គេចខ្លួនបាត់ យើងទៅអត់ទាន់ យើងបានត្រឹមតែឃាត់ទុកនូវវត្ថុតាង ហើយសមត្ថកិច្ចកំពុងស្រាវជ្រាវបន្ត។ បើតាមព័ត៌មានបឋម ឮថាជនបង្កហេតុនៅកំពត យើងដឹងអត្តសញ្ញាណខ្លះៗហើយ ទាំងពីរនាក់ហ្នឹង»។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក លោក ស ខេង កាលពីថ្ងៃទី៣១ ខែធ្នូ ឆ្នាំ២០២១ បានបញ្ជាក់ថា គ្រោះថ្នាក់ចរាចរណ៍ពេញមួយឆ្នាំ នាឆ្នាំ២០២១ បានកើតឡើងចំនួន២ ៦៧០លើក ដែលបណ្ដាលឱ្យមនុស្ស១ ៤៩៧នាក់ស្លាប់ និងរងរបួសចំនួន៣ ៦១៥នាក់។
ក្រុមអ្នកជំនាញបានរកឃើញពីមូលហេតុនៃគ្រោះថ្នាក់ចរាចរណ៍នៅឆ្នាំ២០២១ ដោយសារការបើកបរលើសល្បឿនកំណត់ចំនួន៣៨ភាគរយ, ការមិនគោរពសិទ្ធិ ២៤ភាគរយ, ការមិនប្រកាន់ស្ដាំ ១៤ភាគរយ, ការជែងដោយគ្រោះថ្នាក់ ៨ភាគរយ, បត់ឆ្វេង-ស្ដាំមិនប្រយ័ត្ន ៨ភាគរយ, ស្រវឹង ៤ភាគរយ, កត្តាយានយន្ត ៣ភាគរយ និងងងុយ មាន១ភាគរយ។
ដោយឡែក ក្នុងត្រីមាសទី១ ឆ្នាំ២០២២នេះ លោក ស ខេង ធ្លាប់បានបញ្ជាក់ដោយយោងតាមរបាយការណ៍ថា គ្រោះថ្នាក់ចរាចរណ៍បានកើតឡើង៨៦៩ករណី ដែលចំនួននេះមានការកើនឡើង១០៦លើក ស្មើនឹង១៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ចំពោះចំនួនអ្នកស្លាប់ក្នុងហេតុការណ៍គ្រោះថ្នាក់ចរាចរណ៍ក្នុងត្រីមាសទី១វិញ លោកថាមានចំនួន៤៩៣នាក់ ដែលចំនួននេះកើនឡើង៦០នាក់ ឬស្មើនឹង១៤ភាគរយ ខណៈអត្រាអ្នករងរបួសមានចំនួន១ ២៦២នាក់ កើនឡើង១៤៩នាក់ ឬស្មើនឹង១៣ភាគរយ បើធៀបនឹងរយៈពេលដូចគ្នាកាលពីឆ្នាំ២០២១៕
