សកម្មជនបរិស្ថាន និងប្រជាពលរដ្ឋមួយចំនួន បាននាំគ្នាធ្វើយុទ្ធនាការនៅលើបណ្ដាញសង្គម ដោយប្រកាសពីការធ្វើពហិការមិនគាំទ្រសេវាកម្មរបស់ក្រុមហ៊ុន «ឡេង ណាវ៉ាត្រា គ្រុប» និងក្រុមហ៊ុន «TP Moral Group» របស់ឧកញ៉ា ឃុន សៀ បន្ទាប់ពីក្រុមហ៊ុនទាំងនេះចាប់ផ្ដើមសកម្មភាពឈូសឆាយព្រៃនៅតំបន់ភ្នំតាម៉ៅ ដើម្បីធ្វើការអភិវឌ្ឍ។
ឯកសារផ្លូវការមួយបង្ហាញថា ផ្ទៃដីទំហំ៥០០ហិកតា នៅតំបន់ភ្នំតាម៉ៅ ដែលគ្រប់គ្រងដោយរដ្ឋបាលព្រៃឈើ នឹងត្រូវផ្ទេរទៅជាកម្មសិទ្ធិឯកជន ដោយមិនបានបញ្ជាក់ពីទីតាំងឬម្ចាស់កម្មសិទ្ធិឡើយ។ ឯកសារមួយទៀតបានឱ្យដឹងថា ផ្ទៃដី៧០០ហិកតាផ្សេងទៀត បច្ចុប្បន្នត្រូវបានស្នើសុំដោយក្រុមហ៊ុន TP Moral Group របស់ឧកញ៉ា ឃុន សៀ ខណៈរដ្ឋមន្រ្តីក្រសួងកសិកម្ម បានប្រាប់វីអូឌីកាលពីថ្ងៃសៅរ៍កន្លងទៅនេះថា ទីតាំងដីដ៏ធំនេះត្រូវបានលក់ទៅឱ្យក្រុមហ៊ុនអភិវឌ្ឍន៍ និងម្ចាស់ផលិកម្មចម្រៀងកាឡាក់ស៊ី របស់ឧកញ៉ា ឡេង ណាវ៉ាត្រា។
ចំណែកមន្រ្តីរដ្ឋបាលព្រៃឈើម្នាក់ដែលមានទំនាក់ទំនងជាមួយនឹងក្រុមហ៊ុនកំពុងឈូសឆាយនៅតំបន់ភ្នំតាម៉ៅនេះ បានប្រាប់ វីអូឌី ក្នុងលក្ខខណ្ឌមិនបញ្ចេញឈ្មោះ កាលពីថ្ងៃទី០២ ខែសីហា ថា ក្រុមហ៊ុនចំនួន៤ ក្នុងនោះរួមមាន ក្រុមហ៊ុន ឡេង ណាវ៉ាត្រា ដែលទទួលបានដីធំជាងគេ គ្រោងឈូសព្រៃភ្នំតាម៉ៅ ក្នុងទំហំប្រមាណ១ ៥០០ហិកតា ខណៈផ្ទៃដីព្រៃសួនសត្វភ្នំតាម៉ៅទាំងមូលមានទំហំជាង២ ៥០០ហិកតាប៉ុណ្ណោះ។
ក្រោយទទួលបានព័ត៌មាននេះ គេសង្កេតឃើញមានការចែករំលែកជាបន្តបន្ទាប់នៅលើបណ្ដាញសង្គមហ្វេសប៊ុក ក្នុងរយៈពេលពីរបីថ្ងៃចុងក្រោយនេះ ដែលក្នុងនោះ សកម្មជនបរិស្ថាន និងប្រជាពលរដ្ឋមួយចំនួន បានបង្ហាញពីការមិនពេញចិត្ត និងបានប្រកាសពីការធ្វើពហិការមិនប្រើប្រាស់សេវាកម្មរបស់ក្រុមហ៊ុនដែលបានឈូសឆាយដីព្រៃឈើនៅតំបន់ភ្នំតាម៉ៅនេះ។
លោក ហេង គឹមហុង ជាមន្ត្រីអង្គការសង្គមស៊ីវិលមួយរូប និងជាសកម្មជនការពារបរិស្ថាន បានលើកឡើងនៅថ្ងៃទី០៣ ខែសីហានេះថា តំបន់ភ្នំតាម៉ៅ ជាគម្របព្រៃឈើ និងជាជម្រកសត្វព្រៃ ជាពិសេសជាតំបន់ដែលសង្គ្រោះជីវិតសត្វព្រៃមកពីគ្រប់ទិសទីក្នុងប្រទេសកម្ពុជា អស់រយៈកាល២ទសវត្សរ៍មកហើយ។ លោកបង្ហាញការសោកស្ដាយ ក្រោយពីបានឃើញរូបភាពនិងវីដេអូឃ្លីបជុំវិញសកម្មភាពឈូសឆាយដីព្រៃនៅតំបន់ភ្នំតាម៉ៅ ពីសំណាក់ក្រុមហ៊ុនឯកជនដែលទទួលបានសិទ្ធិអភិវឌ្ឍន៍កាលពីពេលថ្មីៗនេះ។
ករណីនេះ លោកបានសម្រេចធ្វើពហិការ ដោយមិនទិញឬប្រើប្រាស់សេវាកម្មនានារបស់ក្រុមហ៊ុនដែលឈូសឆាយបំផ្លាញព្រៃឈើនៅតំបន់ភ្នំតាម៉ៅនេះឡើយ។
លោកថា៖ «ខ្ញុំផ្ទាល់ សម្រេចមិនទទួលទិញឬក៏ប្រើប្រាស់ផលិតផលទាំងឡាយណារបស់លោក ឡេង ណាវ៉ាត្រា មានឈ្មោះលោក ឡេង ណាវ៉ាត្រា ជាម្ចាស់ក្រុមហ៊ុន ហើយនិងលោក ឃុន សៀ ដែលជាម្ចាស់ក្រុមហ៊ុន ខ្ញុំនឹងមិនទិញ ហើយពហិការនេះ ខ្ញុំនឹងធ្វើពេញមួយជីវិតរបស់ខ្ញុំ»។
លោក ហេង គឹមហុង បន្តថា ការធ្វើពហិការនេះអាចជាគំរូមួយដល់អ្នកវិនិយោគផ្សេងទៀតដែលគិតតែពីប្រយោជន៍ខ្លួនឯង ហើយបំផ្លាញធនធានធម្មជាតិ ឱ្យគិតគូរពីបញ្ហាបរិស្ថានឡើងវិញ។
យុវជនមួយរូបដែលកំពុងសិក្សានៅសាកលវិទ្យាល័យមួយក្នុងរាជធានីភ្នំពេញ លោក គីម ជីលីន ក៏បានប្រកាសពីការធ្វើពហិការនៅលើបណ្ដាញសង្គមហ្វេកប៊ុកដែរថា រូបលោកឈប់ស្តាប់និងឈប់គាំទ្របទចម្រៀងរបស់ក្រុមហ៊ុន កាឡាក់ស៊ី ព្រមទាំងគម្រោងអចលនវត្ថុទាំងឡាយនៃក្រុមហ៊ុនផ្សារកសិផលធម្មជាតិរបស់ឧកញ៉ា ឡេង ណាវ៉ាត្រា ផងដែរ។ លោកថា ការធ្វើពហិការនេះ ដើម្បីបង្ហាញពីការមិនគាំទ្រក្រុមហ៊ុនវិនិយោគដែលអភិវឌ្ឍធ្វើឱ្យប៉ះពាល់ដល់សម្បត្តិធនធានធម្មជាតិ។
លោក គីម ជីលីន និយាយថា៖ «ខ្ញុំមានការអន្ដរាគមន៍បែបហ្នឹង បង្ហាញពីការប្ដេជ្ញាចិត្តរបស់ខ្ញុំ មិនគាំទ្រក្រុមហ៊ុនសាជីវកម្មដែលធ្វើការអភិវឌ្ឍប៉ះពាល់ដល់សម្បត្តិធម្មជាតិ ជាពិសេសភ្នំតាម៉ៅតែម្ដង»។
យុវជនរូបនេះបន្តថា ព្រៃឈើដែលកំពុងរងការបំផ្លិចបំផ្លាញនេះជាសម្បត្តិរបស់ជាតិ និងជារបស់ប្រជាពលរដ្ឋទាំងអស់គ្នា មិនមែនជារបស់បក្ខពួកមួយក្រុមណានោះទេ ដែលករណីនេះ លោកស្នើដល់រដ្ឋាភិបាលគួរមានដំណោះស្រាយមួយដោយឈរលើប្រយោជន៍រួម។
ស្របគ្នានេះដែរ ចលនាមាតាធម្មជាតិ ក៏បានបង្ហាញការសោកស្ដាយដែលបានឃើញដីព្រៃនៅតំបន់ «ភ្នំតាម៉ៅ» កំពុងរងការឈូសឆាយពីសំណាក់ក្រុមហ៊ុនឯកជននេះដែរ បើទោះការឈូសឆាយនោះមានការអនុញ្ញាតពីរដ្ឋាភិបាលក៏ដោយ។ ករណីនេះ អង្គការដែលធ្វើការផ្នែកបរិស្ថានមួយនេះបានប្រកាសជំហរគាំទ្រចំពោះការធ្វើពហិការមិនគាំទ្រផលិតផលរបស់ក្រុមហ៊ុនវិនិយោគទាំងនោះ។
ក្នុងទំព័រហ្វេសប៊ុកក្រុមចលនាមាតាធម្មជាតិ លើកឡើងថា៖ «ចលនាមាតាធម្មជាតិ មានគោលជំហរគាំទ្រចលនាយុវជន និងមហាជន ក្នុងការធ្វើពហិការមិនប្រើប្រាស់ផលិតផលរបស់អ្នកជំនួញណាដែលពាក់ព័ន្ធនឹងសោកនាដកម្មព្រៃឈើនេះ ដូចជា ឧកញ៉ា ឡេង ណាវ៉ាត្រា និងឧកញ៉ា ឃុន សៀ ជាអាទិ៍ […] ដរាបណា គេមិនឈប់បំផ្លាញភ្នំតាម៉ៅ ពួកយើងដាច់ខាតមិនប្រើប្រាស់ផលិតផលឬសេវាកម្មណាមួយរបស់បុគ្គលទាំងអស់នោះឡើយ»។
កញ្ញា ឡុង គន្ធា យុវជនចលនាមាតាធម្មជាតិ បានលើកឡើងថា ការធ្វើពហិការនេះ ដើម្បីបង្ហាញពីការមិនគាំទ្រលើអាជីវកម្មរបស់ក្រុមហ៊ុនដែលបំផ្លាញធនធានធម្មជាតិ និងជាការបដិសេធក្នុងការចូលរួមកាប់បំផ្លាញព្រៃឈើនៅតំបន់ភ្នំតាម៉ៅ។
កញ្ញាថា៖ «ក្នុងការធ្វើយុទ្ធនាការពហិការមិនគាំទ្រទៅលើអាជីវកម្មដែលបំផ្លាញធនធានធម្មជាតិ ជាពិសេសការបំផ្លាញភ្នំតាម៉ៅ វាសំខាន់ណាស់ ព្រោះបើសិនជាយើងនៅតែបន្ដគាំទ្រអាជីវកម្មទាំងអស់ហ្នឹង គឺស្មើនឹងយើងកំពុងតែផ្ដល់ចំណូល ឬជួយគាំទ្រឱ្យមានការកាប់បំផ្លាញព្រៃឈើ គាំទ្រឱ្យមានការឈូសបំផ្លាញភ្នំតាម៉ៅ គាំទ្រឱ្យមានការបំផ្លាញជម្រកសត្វព្រៃ អ៊ីចឹងយើងជាអ្នកគាំទ្រដោយប្រយោលហើយ»។
វីអូឌី មិនអាចសុំការអត្ថាធិប្បាយជុំវិញករណីនេះពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និងក្រុមហ៊ុន TP Moral Group និងក្រុមហ៊ុន ឡេង ណាវ៉ាត្រា បានទេ នៅថ្ងៃនេះ។
បើតាមរូបភាពពីប្រព័ន្ធផ្កាយរណបបង្ហាញថា ក្នុងរយៈពេល៥ថ្ងៃមកនេះ គ្រឿងចក្រជាច្រើនគ្រឿងរបស់ក្រុមហ៊ុនឯកជនបានឈូសឆាយដីព្រៃនៅតំបន់ភ្នំតាម៉ៅប្រមាណ១៣០ហិកតាហើយ៕