បណ្ដាញសហគមន៍ព្រៃឡង់នៅខេត្តព្រះវិហារ និងសមាគមបណ្ដាញយុវជនកម្ពុជា (CYN) បានរកឃើញសកម្មភាពកាប់និងដឹកជញ្ជូនឈើចេញពីតំបន់ការពារព្រៃឡង់ ចូលទៅក្រុមហ៊ុន «ម៉ាឃល ឡូជីស្ទិក (ខេមបូឌា)» ស្ថិតក្នុងភូមិសាស្រ្ដឃុំរៀបរយ ស្រុករវៀង ខេត្តព្រះវិហារ ដោយគ្មានការបង្ក្រាបពីអាជ្ញាធរពាក់ព័ន្ធ។
កាលពីថ្ងៃទី២៦ ខែមិថុនា ឆ្នាំ២០២០ ក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឱ្យក្រុមហ៊ុន «ម៉ាឃល ឡូជីស្ទិក (ខេមបូឌា)» ប្រមូលផលអនុផលព្រៃឈើ ក្នុងអនុតំបន់២ អនុតំបន់៣ និងអនុតំបន់៤ នៃសម្បទានដីសេដ្ឋកិច្ចរបស់ក្រុមហ៊ុន «ភីអិនធី ខូ អិលធីឌី» ស្ថិតក្នុងឃុំរៀបរយស្រុករវៀង។ ប៉ុន្តែករណីនេះត្រូវបានសកម្មជនបរិស្ថានឱ្យដឹងថា ក្រុមហ៊ុនអនុវត្តហួសដែនកំណត់។
របាយការណ៍សង្កេតរបស់សមាគមបណ្ដាញយុវជនកម្ពុជា (CYN) បានឱ្យដឹងថា បណ្ដាញសហគមន៍ព្រៃឡង់នៅខេត្តព្រះវិហារ និងសមាគមបណ្ដាញយុវជនកម្ពុជា បានចុះឃ្លាំមើលបញ្ហាដែលកើតមាននៅតំបន់ព្រៃឡង់ រយៈពេលពីរយប់បីថ្ងៃ គឺចាប់ពីថ្ងៃទី១ ដល់ទី៣ ខែសីហា ឆ្នាំ២០២២ ដោយប្រទះឃើញកម្មកររាប់រយនាក់ និងមេការក្រុមហ៊ុន ម៉ាឃល ឡូជីស្ទិក (ខេមបូឌា) កំពុងកាត់ និងដឹកជញ្ជូនឈើយ៉ាងសកម្មចេញពីតំបន់អភិរក្សព្រៃឡង់ ត្រង់ចំណុចប្រសព្វបីខេត្ត មានខេត្តកំពង់ធំ ស្ទឹងត្រែង និងខេត្តព្រះវិហារ នៅចំណុចស្រែអាចម៍ដែក អូរធ្នង់ ជាំប្រទាល និងត្រពាំងស្មាច់។
របាយការណ៍បន្តថា កម្មករ និងមេការក្រុមហ៊ុន បានប្រើប្រាស់រទេះក្របីប្រហែល១០នឹម និងគោយន្តជាច្រើនគ្រឿងសម្រាប់ជាមធ្យោបាយដឹកជញ្ជូនឈើចេញពីតំបន់អភិរក្សព្រៃឡង់ ទុកនៅក្នុងដេប៉ូទី១របស់ក្រុមហ៊ុនស្ថិតនៅចំណុចភ្នំស្រឡៅ និងចំណុចបុស្សរាំង នៅជាប់ដែនជម្រកសត្វព្រៃព្រៃឡង់ ស្ថិតក្នុងភូមិសាស្រ្ដឃុំរៀបរយ ស្រុករវៀង ខេត្តព្រះវិហារ។
សមាជិកបណ្ដាញសហគមន៍ព្រៃឡង់ខេត្តព្រះវិហារ លោក ខេម សុឃី ដែលចុះល្បាតព្រៃឡង់ និងជួបបទល្មើសផ្ទាល់ ប្រាប់វីអូឌីនៅថ្ងៃសុក្រនេះថា ក្នុង១ថ្ងៃ កម្មកររបស់ក្រុមហ៊ុនបានដឹកឈើចេញពីតំបន់ការពារព្រៃឡង់មិនតិចជាង១០ទៅ២០គោយន្តនោះទេ។ លោកថា គោយន្តមួយដឹកឈើបានប្រហែល៣ទៅ៤ម៉ែត្រគីប។
លោកបន្តថា ការប្រមូលអនុផលព្រៃឈើរបស់ក្រុមហ៊ុន ម៉ាឃល ឡូជីស្ទិក (ខេមបូឌា) បានរំលោភចូលក្នុងដែនតំបន់ការពារព្រៃឡង់ ហើយគ្មានការចូលទប់ស្កាត់ពីមន្ត្រីឧទ្យានុរក្ស និងអាជ្ញាធរពាក់ព័ន្ធឡើយ។
លោកថា៖ «បើតាមពួកខ្ញុំសម្ភាសកម្មករកាប់ឈើហ្នឹង គាត់ប្រាប់ថា មន្ត្រីបរិស្ថានបានចុះមកដល់កន្លែងគាត់អារឈើហ្នឹងពីរបីលើកហើយដែរ ប៉ុន្តែមេការរបស់គាត់បានសម្របសម្រួលជាមួយមន្ត្រីបរិស្ថានហ្នឹង។ អ៊ីចឹងសុំអំពាវនាវដល់តុលាការខេត្តព្រះវិហារ និងអង្គភាពប្រឆាំងអំពើពុករលួយ ជួយស៊ើបមើលករណីក្រុមហ៊ុន ម៉ាឃល ឡូជីស្ទិក កាប់ឈើនៅក្នុងតំបន់ព្រៃឡង់នេះផង ព្រោះអ្វីដែលពួកខ្ញុំឃើញ វាមានភស្តុតាងជាក់ស្តែង»។
មន្ត្រីសម្របសម្រួលគម្រោងនៃសហគមបណ្តាញយុវជនកម្ពុជា លោក អូត ឡាទីន ដែលបានចុះល្បាតព្រៃឡង់ផ្ទាល់ បានដាក់ការសង្ស័យថា ករណីបទល្មើសកាប់និងដឹកឈើពីតំបន់ព្រៃឡង់ចូលទៅក្រុមហ៊ុន ដោយគ្មានការទប់ស្កាត់ពីមន្ត្រីបរិស្ថាននិងអាជ្ញាធរពាក់ព័ន្ធនេះ អាចជាប់ពាក់ព័ន្ធអំពើពុករលួយណាមួយរវាងមន្ត្រីនិងក្រុមហ៊ុន។
លោកបន្តថា ក្រុមហ៊ុនបានដាក់គ្រឿងចក្រឈូសឆាយធ្វើផ្លូវសម្រាប់បម្រើដល់ការដឹកជញ្ជូនឈើចេញពីតំបន់ព្រៃឡង់ឱ្យបានស្រួលទៀតផង។ លោកថា សព្វថ្ងៃ បទល្មើសព្រៃឈើនៅក្នុងតំបន់ព្រៃឡង់គ្មានការថយចុះនោះទេ ក្រោយពីក្រសួងបរិស្ថានហាមក្រុមអង្គការសង្គមស៊ីវិល សកម្មជនព្រៃឈើ និងសកម្មជនបរិស្ថានចូលត្បាតព្រៃមួយនេះរួចមក។
លោកបន្ថែមថា៖ «ស្របពេលដែលមានការហាមឃាត់ក្រុមអង្គការសង្គមស៊ីវិល សកម្មជនបរិស្ថាន មិនឱ្យចុះល្បាតព្រៃឡង់ហ្នឹង គឺមានសកម្មភាពចូលទៅប្រព្រឹត្តបទល្មើសជាបន្តបន្ទាប់ ក្រៅពីការកាប់ឈើធ្វើអាជីវកម្ម យើងក៏ឃើញមានតំបន់មួយចំនួនបានរងការកាប់ចម្ការដាំស្វាយចន្ទី និងដំណាំផ្សេងៗផងដែរ។ អ៊ីចឹងហើយបានជាយើងមានការព្រួយបារម្ភពីការបាត់បង់ព្រៃយ៉ាងឆាប់រហ័សនៅពេលខាងមុខ»។
វីអូឌី មិនអាចរកការឆ្លើយតបពីតំណាងក្រុមហ៊ុន ម៉ាឃល ឡូជីស្ទិក (ខេមបូឌា) បានទេ នៅថ្ងៃសុក្រនេះ។
យ៉ាងណា ប្រធានមន្ទីរបរិស្ថានខេត្តព្រះវិហារ លោក សុង ច័ន្ទសុជាតិ បានច្រានចោលការលើកឡើងរបស់បណ្ដាញព្រៃឡង់ និងសមាគមបណ្ដាញយុវជនកម្ពុជា។ លោកថា ចំណុចដែលសកម្មជនបរិស្ថានលើកឡើងថាមានសកម្មភាពកាប់និងដឹកឈើនោះ គឺមន្ត្រីបរិស្ថានខេត្តទើបតែចុះទៅពិនិត្យមើល ដោយពុំមានការដឹកឈើចេញណាមួយឡើយ។
លោកបន្ថែមថា៖ «ពួកខ្ញុំទើបតែចុះទៅល្បាតកន្លែងហ្នឹងកាលពីម្សិលម៉្ងៃមួយនេះ អត់មានអីទាំងអស់។ ផ្លូវទៅកន្លែងចំណុចស្រែអាចម៍ដែកហ្នឹង ក្លាយជាអូរអស់ហើយ។ ខ្ញុំសូមបញ្ជាក់ប្រាប់ថា ពួកខ្ញុំបានចុះធ្វើការរាល់ថ្ងៃ អត់ដែលទំនេរទេ»។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា ធ្លាប់បានគូសបញ្ជាក់ថា កន្លងមក ដោយតែងតែចាត់ទុកក្រុមសកម្មជនបរិស្ថានទាំងនោះថា ធ្វើសកម្មភាពដើម្បីបម្រើផលប្រយោជន៍នយោបាយ ដោយតែងតែព្យាយាមបំភ្លៃព័ត៌មាន និងចិញ្ចឹមទំនាស់លើបញ្ហាព្រៃឡង់ ក្រោមការរៀបចំច្បាស់លាស់មួយពីម្ចាស់ជំនួយរបស់ពួកគេ។
លោកបន្ថែមថា៖ «អ្វីដែលក្រុមសកម្មជននយោបាយទាំងនោះបានឃើញ គឺស្ថិតនៅក្នុងដីក្រុមហ៊ុន ហើយជាឈើដែលក្រុមហ៊ុនបានមកពីការប្រមូលផលអនុផលព្រៃឈើ ក្នុងអនុតំបន់២ អនុតំបន់៣ និងអនុតំបន់៤ នៃសម្បទានដីសេដ្ឋកិច្ចរបស់ក្រុមហ៊ុន ភីអិនធី។ សម្ភារដែលប្រើប្រាស់ក្នុងការប្រមូលផលអនុផលព្រៃឈើក្នុងតំបន់សម្បទានដីសេដ្ឋកិច្ច ក៏ត្រូវបានទទួលការអនុញ្ញាតស្របតាមច្បាប់ដែរ ដូច្នេះគួរកុំព្យាយាមបំភ្លៃការពិត»។
ចាប់តាំងពីដើមឆ្នាំ២០២០ បណ្តាញសហគមន៍ព្រៃឡង់ យុវជន និងអង្គការសង្គមស៊ីវិល ត្រូវបានមន្ត្រីក្រសួងបរិស្ថាន និងអាជ្ញាធរមូលដ្ឋាន ហាមឃាត់ទាំងស្រុង មិនឱ្យចូលល្បាតព្រៃក្នុងតំបន់ការពារមួយនេះបន្តទៀត ក្រោមហេតុផលសហគមន៍មិនបានចុះបញ្ជីនៅក្រសួងមហាផ្ទៃ ប៉ុន្តែបណ្តាញព្រៃឡង់ទាំង៤ខេត្តលើកឡើងក្នុងសេចក្តីថ្លែងការណ៍ថា មានមូលហេតុចម្បងមួយដែលធ្វើឱ្យបាត់បង់ព្រៃឈើនៅតំបន់ដែនជម្រកសត្វព្រៃមួយនេះបន្ថែមទៀត គឺការហាមឃាត់ប្រជាសហគមន៍ចូលរួមការពារ។
យោងតាមទិន្នន័យពីផ្កាយរណបកាលពីឆ្នាំ២០២១ បង្ហាញថា ដែនជម្រកសត្វព្រៃព្រៃឡង់មានការកាប់ឈើដ៏អាក្រក់បំផុតក្នុងចំណោមតំបន់ការពារផ្សេងទៀត ដោយបានបាត់បង់គម្របព្រៃឈើជិត១ម៉ឺនហិកតា (៩ ១១៩ហិកតា) ក្នុងឆ្នាំ២០២០ ដែលកើនឡើង ២១ភាគរយ បើធៀបនឹងឆ្នាំ២០១៩៕