កម្មករបម្រើការងារនៅរោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) ស្ថិតក្នុងសង្កាត់ចោមចៅទី១ រាជធានីភ្នំពេញ បានប្រមូលផ្ដុំគ្នានៅមុខសាលាដំបូងរាជធានីភ្នំពេញ នៅថ្ងៃចន្ទនេះ ទាមទារឱ្យតុលាការចេញដីការក្សាការពារជាថ្មីទៀត ដើម្បីថែរក្សាទ្រព្យសម្បត្តិរោងចក្រចំនួន៣ចំណុច ខណៈថៅកែបិទរោងចក្រដោយមិនបានបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនពួកគេតាមផ្លូវច្បាប់។
ប្រធានសហជីពចលនាកម្មករប្រចាំរោងចក្រ ឃែនធើរេន អ្នកស្រី សាន់ សុផា បានថ្លែងប្រាប់អ្នកសារព័ត៌មានបន្ទាប់ពីចេញពីសាលាដំបូងរាជធានីភ្នំពេញ ថាដើមចមដែលនាំឱ្យក្រុមកម្មករជាង២០០នាក់ទាមទារឱ្យតុលាការចេញដីការក្សាការពារទ្រព្យសម្បត្តិរបស់រោងចក្រទាំងមូលសាជាថ្មីទៀតនេះ ដោយសារកាលពីថ្ងៃទី០៣ ខែសីហា តុលាការសម្រេចចេញដីការក្សាការពារត្រឹមតែរឹបអូសជាបណ្ដោះអាសន្ននូវគ្រឿងបរិក្ខារសម្ភារដែលជារបស់ក្រុមហ៊ុន ឃែនធើរេន អឹភែរឹល (ខេមបូឌា) តែប៉ុណ្ណោះ ចំណែកទីតាំងដី និងអគាររោងចក្រ តុលាការមិនបានចេញដីការក្សាការពារ ដើម្បីទុកទូទាត់អត្ថប្រយោជន៍ផ្សេងៗជូនកម្មករតាមផ្លូវច្បាប់នោះទេ។
អ្នកស្រីបន្ថែមថា នៅពេលដែលគាត់ទៅជួបមន្ត្រីតុលាការនៅព្រឹកថ្ងៃនេះ មន្ត្រីតុលាការបញ្ជាក់ថា បើពួកគាត់មិនសុខចិត្តនឹងការសម្រេចរបស់តុលាការ គាត់មានសិទ្ធិប្ដឹងជំទាស់លើសេចក្ដីសម្រេចនេះ។
ទោះជាយ៉ាងណា អ្នកស្រីបញ្ជាក់ថា បើតុលាការនៅតែមិនព្រមចេញដីការក្សាការពារទ្រព្យសម្បត្តិក្រុមហ៊ុនទាំងអស់ទេ នោះពួកគាត់នឹងបន្តដាក់ពាក្យបណ្ដឹងជាថ្មីទៀតទៅសាលាដំបូង និងតុលាការជាន់ខ្ពស់ ដើម្បីឱ្យជួយរកយុត្តិធម៌ដល់ពួកគាត់ដែលជាអ្នករងគ្រោះ។
អ្នកស្រីថ្លែងទៀតថា៖ «ចុងក្រោយ ខ្ញុំគ្មានអី មានតែហែទៅផ្ទះសម្ដេច ហ៊ុន សែន ទេ បើសិនជាផ្លូវច្បាប់ចេញពីក្រសួងការងារ ហើយតុលាការដោះអត់ចេញ គ្រាន់តែតុលាការមានទី១ មានទី២ មានទី៣ ខ្ញុំអត់យល់ទេ! អ៊ីចឹងទេ ខ្ញុំនឹងទៅដល់អាទី៣។ យើងរងទុក្ខ យើងរងនូវភាពអយុត្តិធម៌ សុំឱ្យថៅកែរោងចក្រនៅស្រុកខ្មែរ ពេលដែលគាត់មកដាក់ទុន គាត់ត្រូវមើល មិនមែនអ្នកឯងបិទរោងចក្រ អ្នកឯងរត់ចោលដោយដៃស្អាត ហើយអ្នកឯងរួចខ្លួនទេ។ ខ្ញុំសុំអំពាវនាវហើយអំពាវនាវទៀតទៅប្រមុខរដ្ឋាភិបាលឃ្លាំមើលផង យើងខ្ញុំរងទុក្ខបីខែហើយ លុយផ្ទះជួលក៏គ្មានឱ្យគេដែរ ដេកក្រោមតង់ ដេកនៅមុខរោងចក្រ ហាលថ្ងៃ ហាលភ្លៀង»។
បុគ្គលិករោងចក្រឃែនធើរេនម្នាក់ទៀត ដែលធ្វើការផ្នែកវេចខ្ចប់ អ្នកស្រី ឃុន សាវិន បានលើកឡើងថា ថៅកែរោងចក្របានបិទទ្វារ ហើយគេចវេះមិនបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនពួកគេតាមផ្លូវច្បាប់ជាង៣ខែមកហើយ។ អ្នកស្រីបន្តថា បើថៅកែនៅតែបិទទ្វារ ដោយមិនព្រមទូទាត់ប្រាក់អត្ថប្រយោជន៍ដល់ក្រុមកម្មករទេ នឹងធ្វើឱ្យពួកគាត់ប៉ះពាល់ដល់ជីវភាពគ្រួសារកាន់តែធ្ងន់ធ្ងរមួយកម្រិតទៀត។
អ្នកស្រីនិយាយថា៖ «ឱ្យក្រុមហ៊ុនគិតសំណងដល់ខ្ញុំមក ដែលកម្លាំងខ្ញុំធ្វើការងារជូនគាត់[ក្រុមហ៊ុន]ចំនួន១០ឆ្នាំកន្លងមកនេះ។ ខ្ញុំជាស្ត្រីមេម៉ាយ ដើរតួធ្វើប្ដីផង ធ្វើពុកផង ធ្វើម្ដាយផង ខ្ញុំជំពាក់លុយគេ ប៉ះពាល់អារម្មណ៍ខ្ញុំ ខ្ញុំដេកអត់លក់ ខ្ញុំខ្លាចគេរឹបអូសយកផ្ទះ ខ្ញុំខាននៅ បានអីឱ្យកូននៅ ចៅនៅ ខ្ញុំចិញ្ចឹមចៅទៀត។ ហើយរាល់ថ្ងៃហ្នឹង ខ្ញុំដើរស៊ីឈ្នួលលាងចានឱ្យគេ បានមួយពេល ស៊ីមួយពេល វេទនាណាស់រាល់ថ្ងៃនេះ»។
អ្នកស្រីបន្ថែមថា៖ «ស្នើឱ្យក្រុមហ៊ុនដោះស្រាយ គិតគូរតាមផ្លូវច្បាប់ ខ្ញុំអត់ចង់បានអីទេ ខ្ញុំចង់បានតែតុលាការ ហើយសម្តេច ហ៊ុន សែន ជួយផ្តល់សំណងឱ្យខ្ញុំផង ដែលជាកម្លាំងញើសឈាមខ្ញុំ ខ្ញុំធ្វើជូនគាត់។ មិនមែនគាត់អត់ចំណេញឬក្ស័យធន់ទេ គាត់ធ្លាប់អុកឡុកនៅកន្លែងរោចក្រចាក់អង្រែពី១០ឆ្នាំមុនបាន ឥឡូវគាត់មកធ្វើនៅរោងចក្រខ្ញុំទៀត»។
ក្រុមកម្មករទាំងនោះព្រមានថា បើថៅកែរោងចក្រនៅតែពន្យារពេលមិនដោះស្រាយប្រាក់អត្ថប្រយោជន៍ផ្សេងៗដល់ក្រុមកម្មករទេ នោះពួកគាត់នៅបោះតង់ដេកយាមនៅមុខរោងចក្ររហូតដល់ថៅកែរោងចក្រ និងស្ថាប័នពាក់ព័ន្ធចេញមកដោះស្រាយបញ្ហានេះជូនពួកគាត់។
វីអូឌី មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅរសៀលថ្ងៃចន្ទនេះ។
លោក ព្រំ ប៊ុនថន អះអាងថាជាមន្ត្រីផ្នែកគម្រោងសហភាពចលនាកម្មករកម្ពុជា បានថ្លែងប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញដែរថា ការដែលតុលាការមិនបានសម្រេចរក្សាការពារទ្រព្យរបស់ក្រុមហ៊ុនទាំងមូលនោះ បានធ្វើឱ្យប៉ះពាល់ដល់ប្រយោជន៍របស់កម្មករ។ ករណីនេះ លោកជំរុញទៅតុលាការពិនិត្យនិងពិចារណាឡើងវិញ ចំពោះសំណើរបស់កម្មករដែលទាមទារឱ្យរក្សាទ្រព្យរបស់រោងចក្រទាំងអស់ ហើយជួយដោះស្រាយជូនកម្មករឱ្យស្របតាមច្បាប់ការងារជាដើម ទើបអាចបញ្ចប់ជម្លោះរវាងកម្មករនិងថៅកែរោងចក្របាន។
លោកមានប្រសាសន៍ថា៖ «ខ្ញុំស្នើសុំឱ្យតុលាការពិនិត្យនិងពិចារណាឡើងវិញ ចំពោះការចេញដីការក្សាការពារ គួរតែពិនិត្យលើអង្គច្បាប់ជាគោល ពីព្រោះអីមើលថា ច្បាប់ការងារ កម្មករគាត់ទទួលបានប៉ុន្មានចំណុច! ហើយករណីថៅកែរត់ចោល យើងត្រូវមានវិធានការបែបម៉េច ដើម្បីរក្សាទ្រព្យរបស់រោងចក្រទុកជាប្រយោជន៍កម្មករឡើងវិញ»។
បើតាមសហជីព ថៅកែរោងចក្រ ឃែនធើរេន នៅជំពាក់ប្រាក់ឈ្នួលចុងក្រោយ ប្រាក់ជូនដំណឹង ប្រាក់សំណងជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់ ដែលតាមការគណនាបឋមមានទឹកប្រាក់សរុបខ្ទង់៧០ម៉ឺនទៅ៨០ម៉ឺនដុល្លារ៕