នៅថ្ងៃអង្គារ ទី៩ ខែសីហា ក្រុមអ្នកស៊ើបអង្កេតរបស់អង្គការសហប្រជាជាតិ (UN) បានរាយការណ៍ថាមានភស្តុតាងបង្ហាញពីឧក្រិដ្ឋកម្មប្រឆាំងមនុស្សជាតិ រួមទាំងអំពើឃាតកម្ម ការធ្វើទារុណកម្ម និងអំពើហិង្សាផ្លូវភេទ ដែលបានប្រព្រឹត្តនៅក្នុងប្រទេសមីយ៉ាន់ម៉ា ចាប់តាំងពីរដ្ឋប្រហារយោធាកាលពីឆ្នាំមុន។ នេះបើយោងតាមការចេញផ្សាយរបស់បណ្ដាញសារព័ត៌មាន CNA។
យន្តការស៊ើបអង្កេតឯករាជ្យរបស់អង្គការសហប្រជាជាតិសម្រាប់មីយ៉ាន់ម៉ា (IIMM) បាននិយាយថា ស្ត្រី និងកុមារ គឺជាគោលដៅនៃការរំលោភបំពាន។
ក្រុមអ្នកស៊ើបអង្កេតបាននិយាយនៅក្នុងសេចក្ដីថ្លែងការណ៍ថា៖ «មានភស្តុតាងគ្រប់គ្រាន់បង្ហាញថា ចាប់តាំងពីយោធាឡើងកាន់អំណាចនៅក្នុងខែកុម្ភៈ ឆ្នាំ២០២១ មានឧក្រិដ្ឋកម្មប្រឆាំងនឹងជនស៊ីវិលនៅក្នុងប្រទេសមីយ៉ាន់ម៉ា»។
យោធាមីយ៉ាន់ម៉ាបានដណ្ដើមអំណាច កាលពីថ្ងៃទី១ ខែកុម្ភៈ ឆ្នាំមុន ដោយបានបណ្ដេញរដ្ឋាភិបាលស៊ីវិល និងចាប់ខ្លួនលោកស្រី អ៊ុងសាន ស៊ូជី (Aung San Suu Kyi) ។
របបយោធាបានបង្រ្កាបក្រុមអ្នកប្រឆាំងដោយហិង្សា ដែលបានសម្លាប់ជនស៊ីវិលជាង២ ១០០នាក់ និងជិត១៥ ០០០នាក់ត្រូវបានចាប់ខ្លួន។ នេះបើយោងតាមក្រុមឃ្លាំមើលក្នុងតំបន់។
ក្រុមស៊ើបអង្កេតបានបញ្ជាក់នៅក្នុងរបាយការណ៍ប្រចាំឆ្នាំរបស់ខ្លួនថា ក្នុងរយៈពេល១២ខែ រហូតដល់ចុងខែមិថុនា «ទំហំនៃឧក្រិដ្ឋកម្មអន្តរជាតិដែលកើតមាននៅក្នុងប្រទេសមីយ៉ាន់ម៉ាកើនឡើងកាន់តែច្រើនជាងមុន»។
IIMM ត្រូវបានបង្កើតឡើងដោយក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងខែកញ្ញា ឆ្នាំ២០១៨ ដើម្បីប្រមូលភស្តុតាងឧក្រិដ្ឋកម្មអន្តរជាតិដ៏ធ្ងន់ធ្ងរបំផុត និងរៀបចំឯកសារសម្រាប់ការកាត់ទោសព្រហ្មទណ្ឌ ដោយសហការជាមួយតុលាការយុត្តិធម៌អន្តរជាតិ និងតុលាការឧក្រិដ្ឋកម្មអន្តរជាតិ។
យោងតាមភស្តុតាងដែលប្រមូលបាន បានបង្ហាញថា «ឧក្រិដ្ឋកម្មផ្លូវភេទ និងយេនឌ័រ រួមទាំងការរំលោភសេពសន្ថវៈ និងទម្រង់ផ្សេងទៀតនៃអំពើហិង្សាផ្លូវភេទ និងឧក្រិដ្ឋកម្មប្រឆាំងនឹងកុមារ ត្រូវបានប្រព្រឹត្តដោយកងកម្លាំងសន្តិសុខ និងក្រុមប្រដាប់អាវុធ»។
លោក នីកូឡាស គុមជៀន (Nicholas Koumjian) ប្រធាន IIMM បាននិយាយថា ក្រុមអ្នកស៊ើបអង្កេតកំពុងផ្តោតជាពិសេសលើឧក្រិដ្ឋកម្មដែលបានប្រព្រឹត្តលើស្ត្រី និងកុមារ ដែលស្ថិតក្នុងចំណោមឧក្រិដ្ឋកម្មអន្តរជាតិធ្ងន់ធ្ងរ។
របាយការណ៍បានរកឃើញថា កុមារក្នុងប្រទេសមីយ៉ាន់ម៉ាត្រូវបានសម្លាប់ ធ្វើទារុណកម្ម និងបង្ខាំងតាមអំពើចិត្ត៕