យោងតាមការចេញផ្សាយរបស់បណ្ដាញសារព័ត៌មាន Reuters នៅថ្ងៃទី១០ ខែសីហា ឆ្នាំ២០២២នេះ បានឱ្យដឹងថា អតីតប្រធានាធិបតីស្រីលង្កា លោក ហ្កូតាបាយ៉ា រ៉ាចាប៉ាកសា (Gotabaya Rajapaksa) ត្រូវបានគេរំពឹងថានឹងធ្វើដំណើរទៅកាន់ប្រទេសថៃ ដើម្បីសុំសិទ្ធិជ្រកកោនបណ្តោះអាសន្ន។
ប្រភពចំនួនពីរដែលសុំមិនបញ្ចេញឈ្មោះបាននិយាយថា លោក Rajapaksa នឹងចាកចេញពីប្រទេសសិង្ហបុរី ទៅដល់ទីក្រុងបាងកក ប្រទេសថៃ នៅថ្ងៃព្រហស្បតិ៍។
ក្រសួងការបរទេសស្រីលង្កា មិនបានឆ្លើយតបចំពោះសំណើសុំការអត្ថាធិប្បាយនេះឡើយ។ រីឯអ្នកនាំពាក្យរដ្ឋាភិបាលថៃ លោកស្រី រ៉ាត់ចាដា ថាណាឌីរិក (Ratchada Thanadirek) បានប្រាប់ Reuters ថា «មិនមានអ្វីត្រូវអត្ថាធិប្បាយឡើយ»។
គួរបញ្ជាក់ថា លោក Rajapaksa បានមកដល់ប្រទេសសិង្ហបុរី កាលពីថ្ងៃទី១៤ ខែកក្កដា ឆ្នាំ២០២២ មួយថ្ងៃបន្ទាប់ពីបានភៀសខ្លួនចេញពីប្រទេសដែលកំពុងមានវិបត្តិ តាមប្រទេសម៉ាល់ឌីវ និងបន្ទាប់ពីការបះបោរទ្រង់ទ្រាយធំដែលបានបង្ខំឱ្យលោកលាលែងពីតំណែងជាប្រធានាធិបតីនៃប្រទេសដែនកោះមួយនេះ។ លោកក៏បានដាក់លិខិតលាលែងពីតំណែងតែប៉ុន្មានម៉ោងបន្ទាប់ពីមកដល់ប្រទេសសិង្ហបុរី។
នៅពេលនោះ រដ្ឋាភិបាលសិង្ហបុរីបាននិយាយថា លោកមិនទទួលបានសិទ្ធិជ្រកកោនទេ ហើយលោកកំពុងនៅក្នុងប្រទេសសិង្ហបុរីក្នុងដំណើរទស្សនកិច្ចឯកជនប៉ុណ្ណោះ៕