ក្រុមមន្ត្រីរបស់រដ្ឋាភិបាល បានបង្ហាញការខកចិត្តលាយឡំនិងការប្តេជ្ញារួមគ្នាដើម្បីបង្កើនវិធានការ កាត់បន្ថយប្រសិទ្ធភាពបទឧក្រិដ្ឋជួញដូរមនុស្សលើទឹកដីកម្ពុជា ខណៈសហរដ្ឋអាមេរិកដាក់កម្ពុជាចូលទៅក្នុងបញ្ជីខ្មៅនៃការជួញដូរមនុស្សរបស់ខ្លួន ។
ការលើកឡើងនេះ ធ្វើឡើងក្នុងសន្និសីទកាសែត ស្តីពី«ស្ថានភាព នៃការជួញដូរមនុស្សនៅកម្ពុជា» ដែលមានតំណាងពីក្រសួងមហាផ្ទៃក្រសួងយុត្តិធម៌ ក្រសួងការងារ និងបណ្តុះបណ្តាលវិជ្ជាជីវៈ ក្រសួងសង្គមកិច្ច អតីតយុទ្ធជន និងយុវនីតិសម្បទា និងអង្គការដៃគូមួយចំនួនចូលរួម ដើម្បីជាការឆ្លើយតបទៅនឹងការដែលសហរដ្ឋអាមេរិកដាក់កម្ពុជាក្នុងចំណាត់ថ្នាក់លេខ៣ ឬបញ្ជីខ្មៅនៃការជួញដូរមនុស្ស។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានលើកឡើងថា អំពើជួញដូរមនុស្សជាបទឧក្រិដ្ឋ ហើយបច្ចុប្បន្ន ឧក្រិដ្ឋជន មានកលល្បិចខ្ពស់ ក្នុងសម័យបច្ចេកវិទ្យានេះ ដែលពួកគេ ធ្វើសកម្មភាពទាក់ទងបណ្តាញឆ្លងដែន តាមប្រព័ន្ធអនឡាញ ដែលបញ្ហានេះកំពុងកក្រើកឡើងលើពិភពលោកដែលលោកស្រីហៅថា វិបត្តិសកល។
ដោយឡែកនៅកម្ពុជាវិញលោកស្រីថា បើទោះបីរដ្ឋាភិបាលខំប្រឹងបង្កើតច្បាប់នានា ព្រមទាំងបង្កើតនូវវិធានការទប់ស្តាត់ រហូតបង្កើតអន្តរក្រសួងចំនួន៦ក្រុម ដើម្បីការពារជនរងគ្រោះ មានក្រសួងមហាផ្ទៃ ក្រសួងយុត្តិធម៌ នគរបាលជាតិ ក្រសួងការងារ និងបណ្តុះបណ្តាលវិជ្ជាជីវៈជាដើម ដើម្បីការពារជនរងគ្រោះ រហូតដល់ថ្នាក់ក្រោមជាតិ ។
ប៉ុន្តែលោកស្រីថា ភាពប្រទាក់ក្រឡារបស់ក្រសួងពាក់ព័ន្ធរបស់រដ្ឋាភិបាលនេះ នៅតែមានការខ្វះចន្លោះ ដោយសារតែបច្ចុប្បន្នឧក្រិដ្ឋជនប្រើប្រាស់បច្ចេកវិទ្យា ដើម្បីប្រព្រឹត្តបទល្មើសនេះលើទឹកដីកម្ពុជា ។
លោកស្រីថា៖«ប៉ុន្តែវាស្រួលប៉ុណ្ណានៅពេលដែលយើងតាមដានរកជនល្មើសដែលពាក់ព័ន្ធតាមប្រព័ន្ធអនឡាញនោះ? សឺវើ (server) មិនមែននៅកម្ពុជាទេ ។អីចឹងយើងនៅតែគិតថានេះជាភាពឆកល្វែងហើយដែលយើងកំពុងតែគិត បច្ចុប្បន្នថាយើងត្រូវធ្វើយ៉ាងម៉េចទៀត ដើម្បីឱ្យអំពើជួញដូរមនុស្សហ្នឹងគេហៅថា បំបាត់ប្រសិទ្ធភាពនៃបទឧក្រិដ្ឋហ្នឹង ហើយនឹងតាមដានឱ្យជនល្មើស និងយកមកផ្តន្ទាទោសឱ្យបាន »។
តំណាងក្រសួងមហាផ្ទៃរូបនេះបញ្ជាក់ថា នៅឆ្នាំ២០២១ បទល្មើសជួញដូរមនុស្សសមត្ថកិច្ចបង្ក្រាបបាន៣៥៩លើក ដែលជាការកើនឡើង២ដង ធៀបនឹងឆ្នាំ២០១៩មានត្រឹម១៥៥ករណីប៉ុណ្ណោះ ប៉ុន្តែលោកស្រី បង្ហាញពីការឈឺចាប់ ទៅលើឧក្រិដ្ឋជនមួយចំនួន ដែលត្រូវបានគេរាយការណ៍បានយកកម្ពុជាធ្វើជាកន្លែងជួញដូរ ដែលជាផ្នែកមួយត្រូវបានគេរាប់បញ្ជូលទៅក្នុងរបាយការណ៍វាយតម្លៃចំណាត់ថ្នាក់លេខ៣នោះ ដែលលោកស្រីថាជាចំណាត់ថ្នាក់បាតតារាង ។
លោកស្រីថា៖«ចំពោះយើងខ្ញុំដែលជាអ្នកធ្វើការប្រយុទ្ធប្រឆាំងនឹងអំពើជួញដូរមនុស្សគឺយើងឈឺចាប់ខ្លាំងណាស់ពីព្រោះយើងគិតថាយើងខំប្រឹងប្រែងអស់ពីសមត្ថភាព ដើម្បីការពារប្រជាពលរដ្ឋមិនឱ្យរងគ្រោះដោយអំពើជួញដូរមនុស្សតែទីបំផុតគេនៅតែយកទឹកដីកម្ពុជា ដើម្បីមកធ្វើបទល្មើសគេហៅថាឱ្យយើងប្រឈមជាមួយបទល្មើសនេះទាល់តែបាន»។
យ៉ាងណាឆ្លើយនឹងសំណួរអ្នកសារព័ត៌មាន លោកស្រីថា កម្ពុជាទទួលយកការវាយតម្លៃនោះព្រោះថាវាបានផ្សព្វផ្សាយពេញពិភពលោកទៅហើយ តែថា ដើម្បីឆ្លើយតបទៅនឹងរបាយការណ៍នេះ ក្រសួងពាក់ព័ន្ធកំពុងរៀបចំផែនការប្រតិបត្តិការពិសេសសម្រាប់ការស្រាវជ្រាវ រកស្ថានភាពលាក់កំបាំងពីអំពើជួញដូរមនុសុ្សនៅលើទឹកដីកម្ពុជា។
ដូចគ្នានេះដែរ អគ្គស្នងការរងនៃអគ្គស្នងការដ្ឋាននគរបាលជាតិ លោកស្រី យក់ សុខា បានថ្លែងថា កម្ពុជានៅតែគិតថា វិធានការទប់ស្កាត់និងបង្ក្រាបបទល្មើសជួញដូរមនុស្សនៅលើទឹកដីកម្ពុជានេះជាភារកិច្ចស្នូល របស់នគរបាលជាតិ ដើម្បីការពារសុខសុវត្ថិភាព សុខុមាលភាព និងសន្តិសុខជូនដល់ប្រជាជនកម្ពុជាទាំងមូល។
រដ្ឋលេខាធិការក្រសួងយុត្តិធម៌លោក កេង សុមារឹទ្ធ បានលើកឡើងថា ការដាក់កម្ពុជាក្នុងចំណាត់ថ្នាក់ទី៣ក្នុងបញ្ជីប្រយុទ្ធប្រឆាំងនឹងអំពើជួញដូរមនុស្សដែលអនុម័តដោយរដ្ឋសភាអាមេរិកនេះ បានភ្ជាប់ទៅនឹងអនុសាសន៍១៦ចំនុច នៃហានិភ័យបទល្មើសសម្អាតប្រាក់ ដែលក្រសួងយុត្តិធម៌កំពុងប្រយុទ្ធប្រឆាំងដើម្បីឆ្លើយតបទៅនឹងបញ្ហានេះ ។
លោកថា៖«បើទោះបីមិនមែនជាចំណាត់ថ្នាក់ ក៏កម្ពុជាត្រូវតែយកចិត្តទុកដាក់លើកិច្ចការងារនេះ ក្នុងនាមជារដ្ឋមួយដើម្បីការពារនូវផលប្រយោជន៍ឧត្តមប្រយោជន៍សិទ្ធិសេរីភាព របស់ប្រជាពលរដ្ឋកម្ពុជានិងប្រទេសទាំងឡាយណាដែលមានវត្តមាននៅលើទឹកដីកម្ពុជា កុំឱ្យធ្លាក់ចូលទៅក្នុងការជួញដូរមនុស្ស កុំឱ្យពួកគាត់ក្លាយជាជនរងគ្រោះ»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បង្ហាញការព្រួយបារម្ភថា បើកម្ពុជាមិនអាចទប់ស្កាត់បទល្មើសជួញដូរមនុស្សបានទេ កម្ពុជានឹងរអិលធ្លាក់ទៅក្នុងប្រទេសលាងលុយខុសច្បាប់ ខណៈកម្ពុជាកំពុងជាប់ក្នុងបញ្ជីឃ្លាំមើលការសម្អាតប្រាក់ស្រាប់នោះ។
លោកថា៖ «កាលណាប្រទេសយើងមានការជាប់ពាក់ព័ន្ធទៅហ្នឹង គឺជាអូតូម៉ាទិកតែម្ដង គឺយើងអាចជាដែនដីមួយដែលមានហានិភ័យនៅក្នុងការជាប់ពាក់ព័ន្ធនៅក្នុងការលាងលុយកខ្វក់ [លុយខុសច្បាប់] ដែលអាហ្នឹងជាបញ្ហាមួយធំណាស់ដល់ចរន្តនៃការវេរលុយចេញចូលកម្ពុជា»។
បើតាមលោក ប៉ិច ពិសី បញ្ហានេះ កម្ពុជានឹងបាត់ឱកាសក្នុងការទាក់ទាញអ្នកវិនិយោគដែលមានសក្ដានុពល ដែលមានស្តង់ដារ និងមានបញ្ហាផ្ទេរប្រាក់ពីកម្ពុជាទៅក្រៅប្រទេស និងពីក្រៅប្រទេសមកកម្ពុជា តាមយន្តការហិរញ្ញវត្ថុអន្តរជាតិ។
សហរដ្ឋអាមេរិក តាមរយៈក្រសួងការបទេសរបស់ខ្លួន កាលពីថ្ងៃទី២០កក្កដាឆ្នាំ២០២២នេះ បានដាក់កម្ពុជាក្នុងបញ្ជីខ្មៅរបស់ខ្លួន។
វិធានការនេះសហរដ្ឋអាមេរិកសម្អាងថា ការជួញដូរជនបរទេសចូលមកក្នុងប្រទេសកម្ពុជាកំពុងមានការកើនឡើង ក៏ដូចជាការរំលោភបំពានផ្សេងទៀតពាក់ព័ន្ធនឹងវិស័យការងារ ពលករចំណាកស្រុក ហើយមន្ត្រីមួយចំនួនសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត។
តែយ៉ាងណា អាមេរិកក៏បានអំពាវនាវឱ្យកម្ពុជាបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត រួមទាំងការចោទប្រកាន់ពីការងារដោយបង្ខំ និងប្រឆាំងនឹងមន្ត្រីដែលសមគំនិតក្នុងប្រតិបត្តិការឆបោកនេះ និងឧក្រិដ្ឋកម្មជួញដូរដែលពាក់ព័ន្ធ។
រដ្ឋមន្ត្រីក្រសួងមហាផ្ទៃ លោក ស ខេង ក្នុងពិធីមួយកាលពីថ្ងៃទី២៣ ខែកក្កដា ឆ្នាំ២០២២នេះ បានបង្ហាញការតាំងចិត្តបន្តស្វែងរកមូលហេតុនៅពីក្រោយបញ្ហានេះ ដើម្បីធ្វើការកែលម្អចំណុចសេសសល់ ដោយសម្អាងថា ចំណាត់ថ្នាក់នេះអាចជាការបើកផ្លូវមួយឱ្យកម្ពុជារងនូវការដាក់ទណ្ឌកម្មផងដែរ៕
