តុលាការមីយ៉ាន់ម៉ាដែលគ្រប់គ្រងដោយយោធា បានផ្ដន្ទាទោសលោកស្រី អ៊ុងសាន ស៊ូជី (Aung San Suu Kyi) ឱ្យជាប់ពន្ធនាគាររយៈពេល៦ឆ្នាំ កាលពីថ្ងៃចន្ទម្សិលមិញ ដោយចោទលោកស្រីថាបានប្រព្រឹត្តអំពើពុករលួយចំនួន៤ករណី។
យោងតាមសារព័ត៌មាន Reuters ដែលចុះផ្សាយកាលពីថ្ងៃទី១៥ ខែសីហា ឆ្នាំ២០២២នេះថា ម្ចាស់ជ័យលាភីពានរង្វាន់ណូបែលសន្តិភាព អាយុ៧៧ឆ្នាំ និងជាប្រធានបក្សប្រឆាំងរូបនេះ ត្រូវបានចោទប្រកាន់យ៉ាងតិចចំនួន១៨ករណី រាប់ចាប់ពីអំពើពុករលួយរហូតដល់ការរំលោភលើការបោះឆ្នោត ដោយអាចជាប់ពន្ធនាគារជិត១៩០ឆ្នាំ។
លោកស្រី អ៊ុងសាន ស៊ូជី បានហៅការចោទប្រកាន់នេះថាមិនសមហេតុផល និងបដិសេធរាល់ការចោទប្រកាន់មកលើលោកស្រី។
ប្រភពដដែលបន្តថា លោកស្រីត្រូវបានផ្ដន្ទាទោសកាលពីថ្ងៃចន្ទម្សិលមិញ ពីបទប្រើប្រាស់មូលនិធិមិនត្រឹមត្រូវពីមូលនិធិ ដ ឃីន ជី (Daw Khin Kyi) ជាអង្គការដែលលោកស្រីបានបង្កើតឡើង ដើម្បីធ្វើឱ្យប្រសើរឡើងនូវវិស័យសុខាភិបាល ការអប់រំ និងសុខុមាលភាពរបស់ប្រជាជន។
លោកស្រី អ៊ុងសាន ស៊ូជី ដែលកំពុងត្រូវបានឃុំខ្លួននៅក្នុងពន្ធនាគារនៅក្នុងរដ្ឋធានីណៃពិដោ (Naypyidaw) ក៏ត្រូវបានផ្តន្ទាទោសឱ្យជាប់ពន្ធនាគារចំនួន១១ឆ្នាំ ក្នុងករណីផ្សេងទៀតផងដែរ។
ប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីឆ្នាំមុន នៅពេលដែលយោធាបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី បន្ទាប់ពីគណបក្សរបស់លោកស្រីបានឈ្នះការបោះឆ្នោតសកល ហើយបានដឹកនាំការបង្ក្រាបយ៉ាងឃោរឃៅទៅលើអ្នកប្រឆាំង។
មនុស្សរាប់ម៉ឺននាក់ត្រូវបានចាប់ដាក់គុក និងជាច្រើនត្រូវបានធ្វើទារុណកម្ម វាយដំ ឬសម្លាប់ ដែលអង្គការសហប្រជាជាតិហៅទង្វើនោះថាជាឧក្រិដ្ឋកម្មប្រឆាំងមនុស្សជាតិ។
សហគមន៍អន្តរជាតិបានដាក់ទណ្ឌកម្មលើរបបយោធាមីយ៉ាន់ម៉ា និងបានច្រានចោលការផ្តន្ទាទោសលើលោកស្រី អ៊ុងសាន ស៊ូជី ថាជារឿងហួសហេតុ។
លោក ហ្វីល រ៉ូបឺតសុន (Phil Robertson) នាយករងប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ (Human Rights Watch) បាននិយាយថា៖ «ទង្វើនេះជាការរំលោភបំពានយ៉ាងធ្ងន់ធ្ងរលើសិទ្ធិរបស់លោកស្រី អ៊ុងសាន ស៊ូជី ហើយជាយុទ្ធនាការដើម្បីកម្ចាត់លោកស្រី និងគណបក្សសម្ពន្ធជាតិដើម្បីប្រជាធិបតេយ្យ [NLD] ជារៀងរហូត»។
លោក ហ្ស័រ មីន ទុន (Zaw Min Tun) អ្នកនាំពាក្យរដ្ឋាភិបាលយោធា មិនអាចទាក់ទងសុំការអត្ថាធិប្បាយបានទេ កាលពីថ្ងៃចន្ទ។
តែយ៉ាងណា របបយោធាមីយ៉ាន់ម៉ាធ្លាប់បាននិយាយថា តុលាការដំណើរការករណីលោកស្រី អ៊ុងសាន ស៊ូជី ដោយត្រឹមត្រូវ ហើយបដិសេធការរិះគន់ ពីបរទេសថាជាការជ្រៀតជ្រែកចូលកិច្ចការផ្ទៃក្នុងរបស់ខ្លួន។
គួរបញ្ជាក់ថា ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចមកគ្រប់គ្រង កាលពីថ្ងៃទី១ ខែកុម្ភៈ ឆ្នាំ២០២១ និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស៕
