អង្គការសហប្រជាជាតិ បាននិយាយថា មន្ត្រីជាន់ខ្ពស់របស់អង្គការសហប្រជាជាតិមួយរូបនឹងទៅបំពេញទស្សនកិច្ចនៅប្រទេសមីយ៉ាន់ម៉ា ក្នុងសប្ដាហ៍នេះ ចំពេលមានភាពចលាចលនយោបាយក្នុងប្រទេសនេះ។
ប្រទេសមីយ៉ាន់ម៉ាបានស្ថិតក្នុងភាពវឹកវរចាប់តាំងពីយោធាបានផ្ដួលរំលំរដ្ឋាភិបាលជាប់ឆ្នោតដែលដឹកនាំដោយលោកស្រី អ៊ុងសាន ស៊ូជី ម្ចាស់ជ័យលាភីពានរង្វាន់ណូបែលសន្តិភាព កាលពីដើមឆ្នាំមុន ហើយបានធ្វើការបង្ក្រាបដោយបង្ហូរឈាមលើក្រុមអ្នកប្រឆាំង។
អង្គការសហប្រជាជាតិបាននិយាយនៅក្នុងសេចក្ដីថ្លែងការណ៍មួយកាលពីថ្ងៃចន្ទ និងត្រូវបានផ្សព្វផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៦ ខែសីហា ឆ្នាំ២០២២ថា៖ «ឧបការីអគ្គលេខាធិការអង្គការសហប្រជាជាតិ លោកស្រី ណូលីន ហេហ្សឺ [Noeleen Heyzer] ប្រចាំនៅប្រទេសមីយ៉ាន់ម៉ា នឹងទៅបំពេញទស្សនកិច្ចនៅប្រទេសនេះ បន្ទាប់ពីមានការពិភាក្សាយ៉ាងទូលំទូលាយជាមួយតួអង្គមកពីគ្រប់មជ្ឈដ្ឋាននយោបាយ សង្គមស៊ីវិល ក៏ដូចជាសហគមន៍ដែលរងផលប៉ះពាល់ដោយជម្លោះដែលកំពុងបន្ត»។
អង្គការសហប្រជាជាតិបាននិយាយថា លោកស្រី Heyzer នឹងផ្ដោតលើការដោះស្រាយជាបន្ទាន់នូវស្ថានការណ៍ដែលកាន់តែយ៉ាប់យ៉ឺន និងគួរឱ្យព្រួយបារម្ភ។
អ្នកនាំពាក្យរបបយោធាមីយ៉ាន់ម៉ា លោក ហ្ស័រ មីន ទុន (Zaw Min Tun) បានប្រាប់ប្រព័ន្ធផ្សព្វផ្សាយដែលគាំទ្ររបបយោធាថា លោកស្រី Heyzer នឹងទៅដល់ប្រទេសមីយ៉ាន់ម៉ា នៅថ្ងៃពុធស្អែកនេះ។
លោកបាននិយាយថា៖ «លោកស្រីនឹងជួបមេដឹកនាំប្រទេសមីយ៉ាន់ម៉ា និងរដ្ឋមន្ត្រីជាន់ខ្ពស់ផ្សេងទៀត»។
លោកបន្ថែមថា៖ «មិនមានសំណើសុំជួបលោកស្រី អ៊ុងសាន ស៊ូជី ឡើយ»។
របបយោធាមិនអនុញ្ញាតឱ្យឧបការីមកពីតំបន់អាស៊ានចូលជួបលោកស្រី អ៊ុងសាន ស៊ូជី ឡើយ។
បណ្ដាប្រទេសលោកខាងលិច និងអ្នករិះគន់របបយោធាផ្សេងទៀត និយាយថា ការចោទប្រកាន់លើលោកស្រី ស៊ូជី គឺជាការចោទប្រកាន់ដោយខុសឆ្គង និងមានគោលបំណងរារាំងលោកស្រីមិនឱ្យធ្វើនយោបាយជារៀងរហូត។
កាលពីខែមុន របបយោធាបានប្រឈមមុខនឹងការថ្កោលទោសជាសកល នៅពេលដែលរបបនេះបានប្រហារជីវិតសកម្មជនប្រជាធិបតេយ្យចំនួន៤នាក់ ដែលត្រូវបានចោទប្រកាន់ថាបានចូលរួមក្នុង «អំពើភេរវកម្ម»។
បណ្ដាប្រទេសជាសមាជិកអាស៊ានបាននិយាយថា ការប្រហារជីវិតសកម្មជនប្រជាធិបតេយ្យបានធ្វើឱ្យប៉ះពាល់ដល់កិច្ចខិតខំប្រឹងប្រែងរបស់ខ្លួន ដើម្បីសម្រេចបានសន្តិភាពនៅក្នុងប្រទេសមីយ៉ាន់ម៉ា៕
