អន្តរជាតិ

យ៉ាងហោចណាស់មនុស្ស១៦នាក់បានស្លាប់ដោយទឹកជំនន់នៅភាគខាងលិចប្រទេសចិន

លោក ភុន ច័ន្ទឧសភា
| ១៨ សីហា ២០២២
ម៉ោង ១៧:១៩

ក្រុមជួយសង្គ្រោះមកជួយពលរដ្ឋរងគ្រោះដោយសារទឹកជំនន់ដែលបង្កឡើងដោយភ្លៀងធ្លាក់ខ្លាំងនៅក្នុងខេត្ត Qinghai ភាគខាងលិចប្រទេសចិន។ (REUTERS)

ទឹកជំនន់ដែលបង្កឡើងដោយភ្លៀងធ្លាក់ខ្លាំងនៅក្នុងខេត្ត Qinghai ភាគខាងលិចប្រទេសចិន បានសម្លាប់មនុស្ស១៦នាក់ហើយគិតរហូតមកដល់ពេលនេះ ខណៈមនុស្ស៣៦នាក់ផ្សេងទៀតកំពុងបាត់ខ្លួន។ នេះបើតាមការរាយការណ៍ដោយប្រព័ន្ធផ្សព្វផ្សាយរដ្ឋចិនមួយនៅថ្ងៃព្រហស្បតិ៍នេះ ដែលត្រូវបានយកមកចុះផ្សាយបន្តដោយសារព័ត៌មាន Reuters។

យោងតាមទូរទស្សន៍រដ្ឋចិន CCTV (ស៊ីស៊ីធីវី) បានឱ្យដឹងថា ករណីភ្លៀងធ្លាក់ខ្លាំងនៅក្នុងស្រុក Datong Hui និង Tu Autonomous County ខេត្ត Qinghai បានចាប់ផ្តើមកាលពីល្ងាចថ្ងៃពុធ ដែលបានបង្កឱ្យមានជាទឹកជំនន់ជន់លិចភូមិនានា និងការរអិលបាក់ដីផងដែរ ខណៈក្នុងនោះមានពលរដ្ឋជាង៦ពាន់នាក់រងផលប៉ះពាល់។

ទាក់ទិននឹងករណីនេះ រដ្ឋាភិបាលក្នុងតំបន់ក៏បានបញ្ជូនកងកម្លាំងចំនួន២ពាន់នាក់ និងរថយន្តជាង១៦០គ្រឿង សម្រាប់កិច្ចការជួយសង្គ្រោះនេះផងដែរ។

គួរបញ្ជាក់ថា គិតចាប់តាំងពីខែមិថុនាមក ប្រទេសចិនបានជួបប្រទះបញ្ហាអាកាសធាតុមួយចំនួន ដែលរួមមាន បញ្ហារលកកម្ដៅ និងទឹកជំនន់នេះជាដើម ខណៈរដ្ឋាភិបាលបានអះអាងថា វាកើតឡើងដោយសារតែការប្រែប្រួលអាកាសធាតុ ដែលនឹងប៉ះពាល់ធ្ងន់ធ្ងរដល់សេដ្ឋកិច្ច និងសង្គម៕

ចិន, ចិនដីគោក, ជំនន់ទឹកភ្លៀង, ទឹកជំនន់

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។