កម្មករ-កម្មការិនីប្រមាណ៣០០នាក់ បម្រើការងារនៅរោងចក្រកាត់ដេរសម្លៀកបំពាក់ «ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd)» ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ នៅថ្ងៃសុក្រនេះ បាននាំគ្នាតវ៉ាមុខក្រសួងការងារជាថ្មី ដើម្បីទាមទារសំណង៥ចំណុច ខណៈក្រសួងផ្ដល់ជូនត្រឹម៣ចំណុច។
កាលពីថ្ងៃទី១៧ ខែសីហា ឆ្នាំ២០២២ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសដោះស្រាយសំណង ៣ចំណុច ជូនកម្មករបម្រើការងារនៅរោងចក្រ ឃែនធើរេន ដែលថៅកែរត់ចោល ក្រោយមានបញ្ជាពីលោកនាយករដ្ឋមន្ត្រី ហ៊ុន សែន។
ក្រសួងការងារបានប្រើប្រាស់ថវិកាបុរេប្រទានរបស់រដ្ឋាភិបាល ដើម្បីទូទាត់ប្រាក់ចំនួន៣ចំណុចជូនកម្មករ រួមមាន ប្រាក់ឈ្នួលចុងក្រោយដែលមិនទាន់បានបើក ប្រាក់បំណាច់ជួសឱ្យការឈប់សម្រាកប្រចាំឆ្នាំដែលនៅសល់ និងប្រាក់បំណាច់អតីតភាពការងារថ្មីក្នុងឆ្នាំ រួមទាំងប្រាក់រំលឹកអតីតភាពការងារដែលនៅសល់មុនឆ្នាំ២០១៩។
ប៉ុន្តែក្រុមកម្មករអះអាងថា ការទូទាត់សំណងជូនពួកគាត់ត្រឹម៣ចំណុចនេះ គឺមិនត្រឹមត្រូវតាមផ្លូវច្បាប់ឡើយ ហើយពួកគេមួយចំនួនមិនព្រមទទួលយកការដោះស្រាយនេះទេ។
យោងតាមកំណត់ហេតុកិច្ចប្រជុំរវាងតំណាងកម្មករ និងតំណាងក្រសួងការងារ នៅថ្ងៃទី១៩ ខែសីហានេះ បានឱ្យដឹងថា សំណង៥ចំណុចដែលកម្មករទាមទារនោះ រួមមាន ប្រាក់ឈ្នួលចុងក្រោយដែលមិនបានបើក ប្រាក់បំណាច់ទូទាត់ជួសការឈប់សម្រាកប្រចាំឆ្នាំដែលនៅសល់ ប្រាក់បំណាច់អតីតភាពការងារដែលនៅសល់ ប្រាក់បំណាច់ជួសឱ្យការជូនដំណឹងមុន និងប្រាក់សោហ៊ុយជំងឺចិត្ត។
ប្រធានសហជីពចលនាកម្មករប្រចាំរោងចក្រ ឃែនធើរេន អ្នកស្រី សាន់ សុផា ប្រាប់វីអូឌីនៅកន្លែងតវ៉ាថា ករណីក្រសួងសម្រេចដោះស្រាយសំណង៣ចំណុចជូនកម្មករនេះ គឺមិនបានពិភាក្សាជាមួយកម្មករ ឬតំណាងរបស់ពួកគេនោះទេ និងធ្វើឱ្យកម្មករខាតបង់ផលប្រយោជន៍ច្រើនលើសលុប ដែលពួកគាត់មិនអាចទទួលយកបានឡើយ។
អ្នកស្រីបន្ថែមថា៖ «ក្រសួងការងារ គាត់សម្រេចតែចិត្តគាត់ គាត់ចេញមក៣ចំណុចនេះ គឺខាតប្រយោជន៍កម្មករច្រើនណាស់! ចង់បញ្ជាក់ថា រោងចក្រនេះអត់ក្ស័យធុនទេ។ វាបិទសាខានេះ វាទៅផ្គត់ផ្គង់នៅសាខាមួយទៀត។ អ៊ីចឹងបញ្ជាក់កន្លែងណាថាវាក្ស័យធុន? អ៊ីចឹងបានជាខ្ញុំមិនសប្បាយនឹងក្រសួងការងារដែលទូទាត់ឱ្យយើងត្រឹម៣ចំណុច»។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក អ៊ូ រតនា ដែលត្រូវបានស្រង់សម្តីដាក់ក្នុងកំណត់ហេតុ បានលើកឡើងថា ការទូទាត់ប្រាក់៣ចំណុចនេះ គឺមានកម្មករមួយចំនួនបានទទួលយក និងមួយចំនួនមិនព្រមទទួលយកនោះទេ។
លោកបន្តថា កម្មករដែលមិនព្រមបើក ឬទទួលយកការទូទាត់ប្រាក់៣ចំណុចនេះ គឺមានសិទ្ធិប្ដឹងតវ៉ាបន្តទៀត ដែលស្របទៅតាមនីតិវិធីច្បាប់។ តែយ៉ាងណា លោកបានស្នើដល់កម្មករឱ្យរក្សាភាពស្ងៀមស្ងាត់ កុំបិទផ្លូវសាធារណៈ ឬហែក្បួន ដោយរង់ចាំការដោះស្រាយបន្តទៀត។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បញ្ជាក់ប្រាប់វីអូឌីយ៉ាងខ្លីថា ករណីក្រសួងទូទាត់ប្រាក់ជូនកម្មករត្រឹម៣ចំណុចនោះ គឺយោងតាមច្បាប់ស្តីពីការងារ។
យ៉ាងណា កម្មករមួយចំនួនធំអះអាងថា ពួកគេនឹងបន្តការតវ៉ា ហើយទៅរកកិច្ចអន្តរាគមន៍ពីស្ថាប័នពាក់ព័ន្ធ រួមទាំងលោកនាយករដ្ឋមន្ត្រី ហ៊ុន សែន ជាថ្មីទៀត ដើម្បីសុំអន្តរាគមន៍ជួយដោះស្រាយឱ្យបាន៥ចំណុច ដូចដែលពួកគេបានទាមទារ។
ប្រធានសមាគមអភិវឌ្ឍន៍ជីវភាពពលរដ្ឋកម្ពុជា លោក ព្រុំ ប៊ុនថន ដែលឃ្លាំមើលការតវ៉ារបស់ក្រុមកម្មករនេះ បានទទូចដល់រដ្ឋាភិបាលឱ្យពិចារណា ដោយជួយទូទាត់ឱ្យបាន៥ចំណុចតាមការទាមទាររបស់កម្មករ ខណៈកម្មករទាំងនោះកំពុងជួបទុក្ខលំបាកដោយសារខ្វះខាតក្នុងជីវភាពគ្រួសារ និងភាគច្រើនជាកម្មករវ័យចំណាស់ពិបាករកការងារធ្វើ។
លោកបន្ថែមថា៖ «ខ្ញុំយល់ថា ដោះស្រាយឱ្យ៣ចំណុចហ្នឹង គឺកម្មករទទួលបានតិចមែនទែន ដែលកម្មករពិបាកទទួលយកណាស់។ អ៊ីចឹងខ្ញុំគិតថា ក្រសួងគួរធ្វើរបាយការណ៍ដាក់ទៅរដ្ឋាភិបាល ដើម្បីស្នើសុំចំណុចណាមួយបន្ថែមទៀត ដើម្បីឱ្យកម្មករអាចទទួលយកបាន ដើម្បីបញ្ចប់វិវាទការងារនេះ ដើម្បីកុំវាបន្តអូសបន្លាយបន្តទៀត។ ខ្ញុំគិតថា កម្មករជាង៣០០នាក់ ដូចជាមិនច្រើនប៉ុន្មាននោះទេ»។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ប្រាប់វីអូឌីកាលពីថ្ងៃម្សិលមិញថា តាមផ្លូវច្បាប់ ពេលរោងចក្របិទទ្វារដោយមិនបានជូនដំណឹងមុនត្រឹមត្រូវ គឺថៅកែត្រូវផ្តល់សំណងចំនួន៥ចំណុចដល់កម្មករ ក្នុងនោះមានប្រាក់ឈ្នួលចុងក្រោយ ប្រាក់ជូនដំណឹង ប្រាក់សំណងជំងឺចិត្ត ប្រាក់អតីតភាពការងារ និងប្រាក់បំណាច់ឆ្នាំដែលនៅសល់។
មេសហជីពរូបនេះឱ្យដឹងថា តាមការគណនាសំណង៥ចំណុចដែលកម្មកររោងចក្រ ឃែនធើរេន ទាមទារនោះ មានចំនួនខ្ទង់៧០ម៉ឺនទៅ៨០ម៉ឺនដុល្លារ ប៉ុន្តែបើក្រសួងការងារដោះស្រាយត្រឹម៣ចំណុច នោះកម្មករទទួលបានអត្ថប្រយោជន៍ជាង១០ម៉ឺនដុល្លារប៉ុណ្ណោះ។
កាលពីថ្ងៃទី២១ ខែមិថុនា ឆ្នាំ២០២២ កម្មករ-កម្មការិនីជិត១០០នាក់ តំណាងឱ្យកម្មករ៣២០នាក់ បម្រើការងារនៅរោងចក្រកាត់ដេរសម្លៀកបំពាក់ ឃែនធើរេន មានថៅកែធំជាជនជាតិម៉ាឡេស៊ី មានឈ្មោះ YAP FUNG KONG និងនាយកក្រុមហ៊ុនឈ្មោះ CHHOONG WEI PIAU ជាជនជាតិម៉ាឡេស៊ីដូចគ្នា បាននាំគ្នាដាក់ញត្តិនៅខុទ្ទកាល័យនាយករដ្ឋមន្ត្រី ដើម្បីសុំឱ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោះស្រាយ ក្រោយថៅកែរោងចក្រនេះបិទទ្វារ ដោយមិនបានបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនពួកគេតាមផ្លូវច្បាប់ ហើយគ្មានដំណោះស្រាយពីអាជ្ញាធរពាក់ព័ន្ធ។
ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ កាលពីថ្ងៃទី១៧ ខែសីហា ឆ្នាំ២០២២ លោកនាយករដ្ឋមន្ត្រី ហ៊ុន សែន បានប្រើសម្ដីខ្លាំងៗ ដោយបញ្ជាទៅរដ្ឋមន្ត្រីក្រសួងការងារ លោក អ៊ិត សំហេង ឱ្យដោះស្រាយសំណងជូនកម្មករ តាមរយៈការខ្ចីលុយពីរដ្ឋាភិបាលទូទាត់ជូនពួកគេ និងមានចំណាត់ការជាមួយថៅកែជាក្រោយ ដើម្បីកុំឱ្យកម្មករទាំងនោះបន្តរងទុក្ខលំបាក៕
