កម្មកររាប់សិបនាក់ កាលពីព្រឹកថ្ងៃព្រហស្បតិ៍សប្ដាហ៍មុន បាននាំគ្នាសម្រុករត់គេចចេញពីកាស៊ីណូមួយកន្លែងក្នុងស្រុកកោះធំ ខេត្តកណ្ដាល និងលោតចូលក្នុងព្រែកបិនយី (Binh Di) ដើម្បីហែលឆ្លងទៅត្រើយម្ខាងទៀតនៃប្រទេសវៀតណាម។
សកម្មភាពនេះត្រូវបានបង្ហាញឱ្យឃើញតាមរយៈវីដេអូនានាដែលត្រូវបានផ្សព្វផ្សាយដោយសារព័ត៌មានក្នុងស្រុក កាលពីរសៀលថ្ងៃព្រហស្បតិ៍ និងខាងភាគីវៀតណាមផងដែរ។
យោងតាមវីដេអូទី១ បានបង្ហាញថា មនុស្សមួយក្រុមបាននាំគ្នារត់សម្រុកគេចចេញតាមខ្លោងទ្វារនៃបរិវេណអគារមួយកន្លែង ហើយបន្ទាប់មកពួកគេទាំងនោះក៏បានលោតចូលទៅក្នុងទឹកព្រែក ដែលជាទីតាំងកើតហេតុនោះ ស្ថិតក្នុងឃុំសំពៅពូន ស្រុកកោះធំ។ ក្នុងហេតុការណ៍នោះ គេក៏សង្កេតឃើញមានសន្តិសុខដេញតាមចាប់ពួកគេពីក្រោយផងដែរ។
វីដេអូទី២ ដែលហាក់ថតចេញពីខាងភាគីវៀតណាម ក៏បានបង្ហាញឱ្យឃើញពីរូបភាពមនុស្សសម្រុករត់ចុះទៅកាន់ទឹកព្រែក ដើម្បីហែលរត់គេចខ្លួនផងដែរ ខណៈអាជ្ញាធរវៀតណាមបានឱ្យដឹងថា មានមនុស្សសរុប៤២នាក់បានព្យាយាមរត់គេចចេញពីក្រុមហ៊ុនកាស៊ីណូកម្ពុជាមួយកន្លែង។
ទាក់ទិននឹងករណីនេះ សារព័ត៌មានវៀតណាម Zing News បានរាយការណ៍ថា ក្នុងចំណោមអ្នកដែលព្យាយាមហែលទឹករត់គេចនេះ ក្នុងនោះមានមនុស្សចំនួន៤០នាក់ ត្រូវបាននាំទៅកាន់មជ្ឈមណ្ឌលក្នុងសហគមន៍មួយក្នុងស្រុក An Phu ខេត្តអានយ៉ាង ខណៈមានម្នាក់ត្រូវបានសន្តិសុខកាស៊ីណូចាប់ខ្លួនបាន និងជនរងគ្រោះម្នាក់ទៀតបានបាត់ខ្លួនទៅតាមព្រែក។
ក្រុមអ្នករត់គេចខ្លួនចេញពីទីតាំងកាស៊ីណូនោះបានថ្លែងប្រាប់អាជ្ញាធរវៀតណាមថា ពួកគេត្រូវបានក្រុមហ៊ុនបង្ខំឱ្យធ្វើការលើសម៉ោងដោយគ្មានប្រាក់ឈ្នួលបន្ថែមឡើយ ហើយក្នុងនោះមានករណីកម្មករមួយចំនួនក៏ត្រូវបានគេចាប់បង្ខាំងនៅក្នុងឧស្សាហកម្មឆបោកតាមប្រព័ន្ធអនឡាញរបស់កម្ពុជាផងដែរ។
ប្រភពដដែលបន្តថា សមត្ថកិច្ចខេត្តអានយ៉ាង ក៏នឹងត្រូវពិនិត្យថាតើករណីនេះមានជាប់ពាក់ព័ន្ធនឹងការជួញដូរមនុស្សដោយខុសច្បាប់ឬយ៉ាងណាផងដែរ។
តាមរយៈការចុះទៅដល់ទីតាំងដោយផ្ទាល់ កាលពីរសៀលថ្ងៃព្រហស្បតិ៍សប្ដាហ៍មុននេះ អ្នកសារព័ត៌មានវីអូឌី បានរកឃើញថា អគារនោះគឺជាទីតាំងអាគារ Pacific Real Estate ដែលចុះបញ្ជីក្រោមក្រុមហ៊ុនឈ្មោះ «តៃភីងយ៉ាងហ្វាងឌីចាន់វូចាន់ វូយីគ័នលី ឯ.ក (Tai Ping Yang Fang Di Chan Wu Ye Guan Li)»។
ជាមួយគ្នានេះ គេក៏សង្កេតឃើញសន្តិសុខកាស៊ីណូទាំងឡាយក៏បានព្រមានពលរដ្ឋនៅក្បែរទីតាំងកើតហេតុកុំឱ្យថតរូបព្រែក [ដែលមានមនុស្សហែលឆ្លង] ឬបរិវេណអាគាររបស់ខ្លួន ហើយក្នុងនោះក៏មានករណីសន្តិសុខមួយរូបបានបង្ខំបុគ្គលិកអង្គការសិទ្ធិមនុស្សម្នាក់ឱ្យលុបរូបថតដែលបានថតអគារកើតហេតុនោះផងដែរ។
យោងតាមការបញ្ជាក់ពីបុរសមួយរូបបានឱ្យដឹងថា កម្មករម្នាក់ដែលព្យាយាមរត់គេចខ្លួនហើយត្រូវបានចាប់មកវិញនោះ គឺត្រូវបានសន្តិសុខក្រុមហ៊ុនវាយដំ និងរងរបួសយ៉ាងធ្ងន់ធ្ងរ។
ជាមួយគ្នានេះ ពលរដ្ឋមួយរូបក៏បានឱ្យដឹងផងដែរថា៖ «យើងមិនហ៊ានដើរចូលទៅជិតបរិវេណអគារនោះទេ ដោយសារតែខ្លាចគេយល់ច្រឡំ [ថាជាកម្មករដែលរត់គេច] ហើយត្រូវបានគេវាយដូចអ្នកដទៃ»។
បុរសជនជាតិខ្មែរម្នាក់ដែលអះអាងថា ខ្លួនធ្វើការនៅក្នុងអគារ Pacific Real Estate បានលើកឡើងថា កម្មករក្នុងស្រុកត្រូវបានអនុញ្ញាតឱ្យចូល និងចេញពីអគារ ប៉ុន្តែជនបរទេសដែលបម្រើការនៅទីនោះ គឺមិនត្រូវបានអនុញ្ញាតឱ្យចាកចេញទៅណានោះទេ។
លោកបានបន្ថែមថា កម្មករជាជនបរទេសទាំងនោះ កាលពីពេលកន្លងទៅ ក៏ធ្លាប់បានព្យាយាមចាកចេញពីបរិវេណនោះផងដែរ។
លោកថា៖ «ករណីព្យាយាមរត់គេចបែបនេះក៏ធ្លាប់កើតមានកាលពីពេលកន្លងទៅផងដែរ តែមិនញឹកញាប់នោះទេ និងមិនធ្វើឡើងក្នុងចំនួនច្រើនបែបនេះឡើយ។ ពួកគេភាគច្រើនព្យាយាមរត់គេចដោយផ្លោះរបង ប៉ុន្តែលើកនេះ ពួកគេបែជារត់តាមច្រកទ្វារធំ។ វាកម្រណាស់»។
បុរសរូបនេះបន្ថែមថា អគារនេះមានមនុស្សច្រើន ខណៈពួកគេទាំងអស់នោះសុទ្ធសឹងតែធ្វើការតាមអ៊ីនធឺណិត ហើយអាជីវកម្មនេះបានបើកដំណើរការអស់រយៈពេល៤ឆ្នាំមកហើយ។
ទោះជាយ៉ាងណា អភិបាលរងខេត្តកណ្ដាល លោក គ្រុយ ម៉ាឡែន បានថ្លែងអះអាងថា ក្រុមហ៊ុន Pacific Real Estate នេះមិនមានករណីចាប់បង្ខាំងមនុស្សឡើយ និងមានការបើកប្រាក់ខែឱ្យកម្មកររបស់ខ្លួនត្រឹមត្រូវជាធម្មតា។
លោកបន្ថែមថា សម្រាប់កម្មករដែលរត់គេចខ្លួននោះ គឺជាអ្នកដែលព្យាយាមគេចពីការទទួលខុសត្រូវលើការងាររបស់ខ្លួន និងបំណុលល្បែងដែលខ្លួនជំពាក់ក្រុមហ៊ុន។
លោកថា៖ «ករណីនេះ គឺមិនបានកើតឡើងដូចអ្វីដែលប្រព័ន្ធផ្សព្វផ្សាយបានរាយការណ៍នោះទេ ខណៈពលរដ្ឋមានការសង្ស័យថា [ក្រុមហ៊ុន] ចាប់បង្ខាំងមនុស្ស។ ហេតុការណ៍នេះបានកើតឡើងដោយសារតែក្រុមបុគ្គលិកមួយក្រុមដែលធ្វើការនៅកាស៊ីណូនេះយូរមកហើយ។ ពួកគេមានទាំងប្រាក់ខែ និងប្រាក់បន្ថែមសមរម្យ ប៉ុន្តែពួកគេយកវាទៅលេងល្បែង»។
លោកបន្តថា៖ «មានអ្នកខ្លះឈ្នះ ខណៈមួយចំនួនទៀតក៏ចាញ់ដែលធ្លាក់ខ្លួនជំពាក់បំណុលគេ ហើយព្យាយាមរត់គេចពីការទទួលខុសត្រូវ។ ករណីនេះវាមិនដូចអ្វីដែល [ប្រព័ន្ធផ្សព្វផ្សាយ និងពលរដ្ឋ] លើកឡើងនោះទេ»។
លោក គ្រុយ ម៉ាឡែន បន្ថែមថា អាជ្ញាធរបានសាកសួរផ្នែកអ្នកគ្រប់គ្រងក្រុមហ៊ុន ដោយរកឃើញថា កម្មករទាំងអស់នោះសុទ្ធតែមានឯកសារការងារត្រឹមត្រូវ។
ទោះជាយ៉ាងណា ទាក់ទិននឹងសំណួរថាតើគណៈគ្រប់គ្រងរបស់ Pacific Real Estate ត្រូវបានឃាត់ខ្លួនអំឡុងពេលស៊ើបអង្កេតឬយ៉ាងណានោះ លោកលើកឡើងថា វាមិនមែនជាករណីដែលចាំបាច់ឡើយ។
អភិបាលរងខេត្តរូបនេះថា៖ «គ្មានការឃាត់ខ្លួនណាមួយត្រូវបានធ្វើឡើងទេ ខណៈទីតាំងនោះមិនមានសកម្មភាពខុសច្បាប់ណាមួយឡើយ។ វាជាកាស៊ីណូស្របច្បាប់ និងមានអាជ្ញាបណ្ណត្រឹមត្រូវ ដូច្នេះហើយមិនមានការឃាត់ខ្លួន ឬចាប់ខ្លួនតំណាង ឬម្ចាស់ទីតាំងណាម្នាក់ឡើយ ខណៈពួកគេក៏មិនបានរត់គេចខ្លួនទៅណាដែរ»។
ទាក់ទិននឹងករណីនេះ អភិបាលខេត្តកណ្តាល លោក គង់ សោភ័ណ្ឌ ក៏បានចុះទៅពិនិត្យនៅទីតាំងនេះ កាលពីព្រឹកថ្ងៃសុក្រសប្ដាហ៍មុនផងដែរ។ នេះបើយោងតាមការបង្ហោះនៅលើទំព័រហ្វេសប៊ុករបស់អភិបាលខេត្តរូបនេះ។
ក្នុងហ្វេសប៊ុករបស់លោកអភិបាលខេត្ត បន្តថា៖ «ដោយគោរពអនុវត្តច្បាប់ការងារនៃព្រះរាជាណាចក្រកម្ពុជា និងគោរពតាមអាជ្ញាបណ្ណអាជីវកម្មត្រឹមត្រូវ បុគ្គលិក កម្មករក្រុមហ៊ុន ត្រូវបម្រើការងារត្រឹមត្រូវ និងមិនឱ្យមានការប្រើប្រាស់គ្រឿងញៀន និងការបង្ខិតបង្ខំមនុស្ស ឬឃាត់ទុកមនុស្សប្រើខុសច្បាប់ដាច់ខាត»។
ជាមួយគ្នានេះ នាយប៉ុស្តិ៍នគរបាលឃុំសំពៅពូន លោក ឃុត ប៊ុនថន បានទទួលស្គាល់ថា ករណីមនុស្សព្យាយាមរត់គេចពីកាស៊ីណូនេះ ពិតជាបានកើតឡើងមែនកាលពីថ្ងៃព្រហស្បតិ៍សប្ដាហ៍មុន។
ទោះជាយ៉ាងណា នាយប៉ុស្តិ៍នគរបាលថា៖ «ខ្ញុំសុំមិនធ្វើការអត្ថាធិប្បាយបន្ថែមទៀតឡើយ។ សូមទាក់ទងទៅកាន់អធិការនគរបាលស្រុកចុះ»។
វីអូឌី មិនអាចសុំការធ្វើអត្ថាធិប្បាយបានឡើយពីមេឃុំសំពៅពូន លោក អ៊ុក ស្រ៊ន និងស្នងការនគរបាលខេត្តកណ្ដាល លោក ឈឿន សុចិត្រ ទាក់ទិននឹងករណីនេះ។
ទោះជាយ៉ាងណា លោក ឈឿន សុចិត្រ បានថ្លែងប្រាប់ទីភ្នាក់ងារសារព័ត៌មានអនឡាញ Fresh News ថាបុគ្គលិកទាំងនោះរៀបចំផែនការប្រមូលគ្នាទម្លុះទ្វាររបង រត់ចេញ ហើយប៉ះគ្នាជាមួយសន្តិសុខ ដែលហេតុការណ៍នេះបណ្តាលឱ្យសន្តិសុខ៣នាក់រងរបួស។
គួរបញ្ជាក់ថា ក្រុមហ៊ុន តៃភីងយ៉ាង (Tai Ping Yang) ត្រូវបានចុះបញ្ជីនៅឆ្នាំ២០២១ ដែលបច្ចុប្បន្នមានអ្នកគ្រប់គ្រងតែម្នាក់គត់ គឺលោក Hum Sovanny។ បុគ្គលរូបនេះក៏ត្រូវបានស្គាល់ថាជាម្ចាស់ក្រុមហ៊ុនចំនួន៣ផ្សេងទៀតដែរ រួមមាន ភោជនីយដ្ឋាន ហាងម៉ាស្សា និងក្រុមហ៊ុនហិរញ្ញវត្ថុដែលមានឈ្មោះថា Bao Yu Aomen Capital Advisory។
គិតត្រឹមខែមិថុនា ឆ្នាំមុន បរិវេណអាគារនេះធ្លាប់ត្រូវបានគ្រប់គ្រងដោយ Jinsha Group ជាក្រុមហ៊ុនកាស៊ីណូមួយដែលវិនិយោគដោយបុគ្គលឈ្មោះ Liu Yang ដែលបច្ចុប្បន្នត្រូវបានស្គាល់ថាជាប្រធាននៃសមាគមពាណិជ្ជកម្មកម្ពុជា-ចិន (CCCA)។
សមាគមនេះ ដំបូងឡើយក៏ត្រូវបានស្គាល់ថាជាអ្នកគាំទ្រដ៏សំខាន់នៅពីក្រោយក្រុមស្ម័គ្រចិត្តកម្ពុជា-ចិន ដែលជួយសង្រ្គោះជនរងគ្រោះពីការជួញដូរផងដែរ។ ទោះជាយ៉ាងណា ប្រតិបត្តិការរបស់ក្រុមស្ម័គ្រចិត្តមួយនេះបានរលាយបាត់ទៅ បន្ទាប់ពីលោក Chen Baorong ដែលជាប្រធានក្រុមត្រូវបានចាប់ខ្លួនកាលពីខែមីនា។
ថ្លែងបន្ទាប់ពីកិច្ចប្រជុំគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ប្រចាំឆមាសទី១ ឆ្នាំ២០២២ នៅទីស្ដីការក្រសួងមហាផ្ទៃ កាលពីថ្ងៃសុក្រកន្លងទៅ រដ្ឋមន្ត្រីក្រសួងមហាផ្ទៃ លោក ស ខេង បានប្រាប់អ្នកសារព័ត៌មានថា រូបលោកក៏បានដឹងពីករណីដែលកើតឡើងនៅស្រុកកោះធំនេះផងដែរ ខណៈលោកបន្ថែមថា អាជ្ញាធរកំពុងធ្វើការស៊ើបអង្កេត។
លោកថា៖ «ខ្ញុំមិនទាន់មានភស្តុតាងច្បាស់លាស់នៅឡើយទេ ប៉ុន្តែយោងតាមរបាយការណ៍បឋមបង្ហាញថា ពួកគេទាំងអស់នោះអាចជាអ្នកដែលមកធ្វើការដោយខុសច្បាប់ ដែលទទួលបានការសន្យាថានឹងទទួលបានប្រាក់ខែសមរម្យ ខណៈប្រាក់ខែដែលពួកគេទទួលបានអាចនឹងមិនដូចការសន្យា។ នេះអាចជាកំហុសឆ្គងមួយ។ ទោះជាយ៉ាងណា យើងបានធ្វើការលើករណីនេះហើយ»។
រដ្ឋមន្ត្រីក្រសួងមហាផ្ទៃ ក៏បានលើកឡើងដែរថា ករណីដែលកំពុងតែត្រូវបានស៊ើបអង្កេតនេះ ក៏ជាផ្នែកមួយនៃកិច្ចខិតខំប្រឹងប្រែងរបស់ក្រសួង ក្នុងការត្រួតពិនិត្យជនបរទេស ខណៈវាជាគោលនយោបាយថ្មីមួយដែលបានប្រកាសកាលពីដើមខែនេះ ដើម្បីឆ្លើយតបនឹងការដែលសហរដ្ឋអាមេរិកបានដាក់កម្ពុជាក្នុងបញ្ជីខ្មៅរបស់ខ្លួន ជុំវិញប្រតិបត្តិការឆបោក និងជួញដូរមនុស្ស។
ជាមួយគ្នានេះ លោកក៏បានលើកឡើងអំពីករណីដែលរដ្ឋាភិបាលបានធ្វើការស៊ើបអង្កេត កាលពីពេលថ្មីៗនេះ នៅខេត្តព្រះសីហនុផងដែរ។
លោកថា៖ «នៅពេលដែលយើងចុះពិនិត្យទៅកាន់ទីនោះដោយផ្ទាល់ យើងឃើញថា ស្ថានភាពខ្លះមិនពិតទាំងស្រុង ប៉ុន្តែមានខ្លះក៏ពិតផងដែរ។ ដូច្នេះ យើងបានជួយសង្គ្រោះ ខណៈបេសកកម្មរបស់យើង ទី១ គឺជួយសង្គ្រោះជនរងគ្រោះ និងទី២ ដើម្បីចាប់ខ្លួនមេខ្លោងយកមកផ្តន្ទាទោសតាមច្បាប់»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Dramatic Escape at Koh Thom Casino Triggers Gov’t Denial
