ព័ត៌មានជាតិ, សន្តិសុខ

សមត្ថកិច្ចខេត្តស្វាយរៀងកំពុងស៊ើបអង្កេតករណីជនជាតិវៀតណាមមួយក្រុមវាយសម្លាប់បុគ្គលិកកាស៊ីណូជនជាតិវៀតណាមដូចគ្នា

លោក ម៉ិច ដារ៉ា
| ៣០ សីហា ២០២២
ម៉ោង ១៥:៥៧

ខ្លោងទ្វារចូលស្នងការដ្ឋាននគរបាលខេត្តស្វាយរៀង។ (ហ្វេសប៊ុក៖ ស្នងការដ្ឋាននគរបាលខេត្តស្វាយរៀង)

មន្ត្រីនគរបាលខេត្តស្វាយរៀង កំពុងស៊ើបអង្កេតករណីឃាតកម្មលើបុគ្គលិកកាស៊ីណូជនជាតិវៀតណាមម្នាក់ អាយុ៣៤ឆ្នាំ ប្រព្រឹត្តដោយជនជាតិវៀតណាមមួយក្រុមមានគ្នា៤ទៅ៥នាក់ ប្រដាប់ដោយដំបង បំពង់ទីប និងដុំថ្ម។

មេប៉ុស្តិ៍នគរបាលរដ្ឋបាលឃុំសំរោង ស្រុកចន្ទ្រា លោក មាឃ កក្កដា មានប្រសាសន៍ថា បុគ្គលិកកាស៊ីណូជនជាតិវៀតណាមម្នាក់បានស្លាប់ បន្ទាប់ពីរងការវាយដំពីសំណាក់ជនជាតិវៀតណាមដូចគ្នាមួយក្រុម កាលពីព្រឹកថ្ងៃទី២៦ ខែសីហា ឆ្នាំ២០២២ នៅកាស៊ីណូ៦៧ ក្បែរច្រកព្រំដែនសំរោង។ ទោះជាយ៉ាងណា លោកបដិសេធផ្ដល់ព័ត៌មានលម្អិតជុំវិញករណីនេះ។

លោក កក្កដា បាននិយាយថា៖ «អាជ្ញាធររបស់យើងកំពុងដុតដៃដុតជើង ដើម្បីដោះស្រាយករណីនេះ។ ហើយពាក់ព័ន្ធនឹងករណីនេះ ខ្ញុំសូមរក្សាការសម្ងាត់ ព្រោះយើងកំពុងស៊ើបអង្កេតករណីជនជាតិវៀតណាមវាយតប់គ្នានេះ»។

លោក គឹម សុខឿន អធិការនគរបាលស្រុកចន្រ្ទា បានថ្លែងថា ការវាយតប់គ្នានេះកើតឡើងនៅខាងក្រៅកាស៊ីណូ។

លោកថា៖ «ពួកគេបានវាយតប់គ្នានៅតាមផ្លូវ។ ដំបូង ពួកគេដាល់គាត់ បន្ទាប់មកយកថ្មវាយគាត់ពីក្រោយ»។

លោកបន្ថែមថា៖ «ការវាយតប់គ្នានោះថតបានដោយកាមេរ៉ាសុវត្ថិភាពរបស់កាស៊ីណូ»៕

បកប្រែ និងសម្រួលចេញពីអត្ថបទដើមភាសាអង់គ្លេស៖ Crime Briefs: Casino Mob Beating, BKK 1 Murder-Suicide

កាស៊ីណូ, ខេត្តស្វាយរៀង, វៀតណាម

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។