ក្រុមប្រឹក្សាជំនុំជម្រះនៃតុលាការប្រទេសបារាំង នឹងប្រកាសសាលក្រុមក្នុងសំណុំរឿងមួយនេះនៅដើមខែតុលាការខាងមុខ ក្រោយពីបើកឱ្យមានការសួរដេញដោលលើអង្គសេចក្តីប្រមាណ ៥ម៉ោង កាលពីថ្ងៃទី១ ខែសីហា ជុំវិញបទចោទ «បរិហារកេរ្តិ៍» ដែលមានលោកនាយករដ្ឋមន្រ្តី ហ៊ុន សែន និងកូនប្រសាររបស់លោក គឺលោក ឌី វិជ្ជា ជាម្ចាស់បណ្តឹង។
តុលាការប្រទេសបារំាងបានសម្រេចឱ្យគូភាគីក្នុងរឿងក្តីរដ្ឋប្បវេណីមួយនេះ ធ្វើសេចក្តីសន្និដ្ឋានចុងក្រោយ បន្ទាប់ពីដាក់ឱ្យមានការសួរដេញដោលលើអង្គសេចក្តីមិនតិចជាង៥ម៉ោង។ អតីតតំណាងរាស្រ្តពីខាងគណបក្សជំទាស់ បានលើកឡើងថា នៅក្នុងបន្ទប់សវនាការ កាលពីថ្ងៃទី១ ខែកញ្ញាម្សិលមិញ គឺមានអ្នកចូលរួមស្តាប់ការកាត់ក្តីស្ទើរពេញសាលសវនាការ។
ថ្លែងប្រាប់វីអូឌីនៅថ្ងៃសុក្រនេះ មន្រ្តីស្និទ្ធនឹងលោក សម រង្ស៊ី គឺលោក ម៉ែន សុថាវរិន្រ្ទ ឱ្យដឹងថា បើពិនិត្យទៅលើភស្តុតាងដាក់បន្ទុករបស់ម្ចាស់បណ្តឹង ហាក់ដូចមិនមានអ្វីដែលមានភាពរឹងមាំតាមផ្លូវច្បាប់ប៉ុន្មានទេ។ ផ្ទុយទៅវិញ លោក សម រង្ស៊ី ដែលជាចុងចម្លើយ គឺមានធាតុផ្សំគ្រប់គ្រាន់ ដែលរកឃើញថា លោកនាយករដ្ឋមន្រ្តី ហ៊ុន សែន មានជាប់ពាក់ព័ន្ធនឹងការស្លាប់របស់លោក ហុក ឡង់ឌី និងលោក ជា វិជ្ជា។
បើទោះជាបែបណា អ្នកនយោបាយជើងចាស់រូបនេះមើលឃើញថា នេះគឺជាលើកទី១ហើយដែលតុលាការប្រទេសបារាំង ដែលលោកចាត់ទុកជាស្ថាប័នឯករាជ្យបានលើកយករឿងក្តីនេះមកជំនុំជម្រះ។ មួយវិញទៀត នេះក៏ជាការជួយរកយុត្តិធម៌ដល់ជនរងគ្រោះដទៃទៀត ក្រៅពីលោក សម រង្ស៊ី ផ្ទាល់ដែរ។
លោកបន្តថា៖ «នៅក្នុងនោះ គេមានអស់ហើយតើ! មុននឹងធ្វើរឿងនេះប្រមាណ១ឆ្នាំជាង បានចាប់ផ្តើមសវនាការ។ គេផ្ញើមកឱ្យគ្រប់កន្លែង ហើយមេធាវីគេផ្ញើឱ្យចៅក្រមហើយអស់ហើយ ហើយស្អីៗគេមានទាំងអស់ហើយតើ»។
សំណុំរឿងរដ្ឋប្បវេណីនេះ លោកនាយករដ្ឋមន្រ្តី ហ៊ុន សែន និងកូនប្រសាររបស់លោកដែលត្រូវជាកូនប្រុសបង្កើតរបស់លោក ហុក ឡង់ឌី គឺលោក ឌី វិជ្ជា បានដាក់បណ្តឹងនេះចូលទៅតុលាការថ្នាក់ទាបប្រទេសបារាំង កាលពីខែសីហា ឆ្នាំ២០១៩។ ក្នុងរយៈពេលប្រមាណ៣ឆ្នាំមកនេះ តម្រូវឱ្យភាគីដើមចោទនិងចុងចម្លើយដាក់ភស្តុតាងចូលទៅតុលាការ ដើម្បីដាក់បន្ទុកនិងដោះបន្ទុក មុននឹងក្រុមប្រឹក្សាជំនុំជម្រះកំណត់យកថ្ងៃទី១ ខែកញ្ញា ឆ្នាំ២០២២នេះ ដើម្បីបើកសវនាការលើអង្គសេចក្តី។
សម្រាប់សវនាការនេះ ម្ចាស់បណ្តឹង លោក ហ៊ុន សែន និងលោក ឌី វិជ្ជា មិនបានចូលរួមតតាំងក្តីនៅក្នុងសវនាការដោយផ្ទាល់ទេ តែមានមេធាវីតំណាងដោយអាណត្តិចំនួន៤រូបចូលរួម។ ចំណែកលោក សម រង្ស៊ី បានចូលរួមតតាំងក្តីដោយផ្ទាល់ អមជាមួយនឹងមេធាវីចំនួន៣រូបទៀត។
វីអូឌី មិនអាចស្នើសុំការបំភ្លឺបានទេជុំវិញរឿងនេះពីលោក គី តិច មេធាវីតំណាងដោយអាណត្តិរបស់រដ្ឋាភិបាល នៅថ្ងៃសុក្រនេះ។ បើទោះជាបែបណា គេសង្កេតឃើញមានរូបថតមួយចំនួនដែលត្រូវបានផ្សព្វផ្សាយនៅលើបណ្តាញសង្គម ពីវត្តមានរបស់លោក គី តិច និងលោក លី ចន្ទតុលា ដែលជាប្រធានគណៈមេធាវី រួមទាំងមនុស្សមួយចំនួន ក៏បានធ្វើដំណើរចេញពីកម្ពុជាទៅចូលរួមសវនាការនេះដោយផ្ទាល់ដែរ។ មូលហេតុដែលនាំឱ្យលោនាយករដ្ឋមន្រ្តី ហ៊ុន សែន និងកូនប្រសារបស់លោក គឺលោក ឌី វិជ្ជា ប្តឹងលោក សម រង្ស៊ី គឺនៅក្រោយពីអតីតអ្នកនយោបាយចាស់វស្សារូបនេះបានបង្ហោះសារនៅលើបណ្តាញសង្គមហ្វេសប៊ុករបស់លោកកាលពីដើមខែមិថុនា ឆ្នាំ២០០៩ ដោយចោទលោក ហ៊ុន សែន ថាបានដាក់គ្រាប់បែកដៃសម្លាប់លោក ហុក ឡង់ឌី កាលពីឆ្នាំ២០០៨។
តាមរយៈសាររបស់ខ្លួន លោក សម រង្ស៊ី បញ្ជាក់ទៀតថា ដោយសារព្រួយបារម្ភពីការបែកធ្លាយផែនការសម្ងាត់ ដែលបញ្ជាឱ្យលោក ហុង ឡង់ឌី សម្លាប់ប្រធានសហជីពដ៏ល្បីល្បាញ គឺលោក ជា វិជ្ជា កាលពីឆ្នាំ២០០៤ ទើបលោកនាយករដ្ឋមន្រ្តីរៀបចំផែនការនេះឡើង។
លោក ម៉ែន សុថាវរិន្រ្ទ ដែលបានចូលរួមស្តាប់ការជំនុំជម្រះដោយផ្ទាល់ ឱ្យដឹងថា ក្រុមប្រឹក្សាជំនុំជម្រះបានផ្តល់ឱកាសឱ្យគូភាគីនៅក្នុងរឿងក្តីប្រើប្រាស់ពេលវេលារបស់ខ្លួន ម្ខាង១ម៉ោងកន្លះ។ ប៉ុន្តែមុននឹងចាប់ផ្តើមសវនាការ តុលាការតម្រូវឱ្យចុងចម្លើយត្រូវរកអ្វីមកបញ្ជាក់ពីហេតុផលជាមុនសិន។ ក្រៅពីនេះ លោក សម រង្ស៊ី ត្រូវតុលាការបើកសិទ្ធិឱ្យនិយាយមុន ដើម្បីជាការដោះបន្ទុក មុននឹងដល់នាទីមេធាវីការពារសិទ្ធិឱ្យដើមបណ្តឹងរដ្ឋប្បវេណីតាំងសំណួរ។
ក្នុងពេលដែលសហមេធាវីការពារសិទ្ធិឱ្យចុងចម្លើយ បានជម្រាបអង្គជំនុំជម្រះ ថាតើលោក សម រង្ស៊ី ឬលោក ហ៊ុន សែន ជាជនរងគ្រោះ ខណៈដែលលោកនាយករដ្ឋមន្រ្តីកំពុងនៅក្នុងអំណាច ហើយមានអ្វីៗគ្រប់យ៉ាងនៅក្នុងដៃ លោក ម៉ែន សុថាវរិន្រ្ទ សង្កេតឃើញថា ភស្តុតាងដាក់បន្ទុកភាគច្រើនយកចេញពីឯកសារសារព័ត៌មានធ្វើជាសម្អាងហេតុ។
យ៉ាងនេះក្តី សាស្រ្តាចារ្យផ្នែកវិទ្យាសាស្រ្តនយោបាយ លោក ឯម សុវណ្ណរ៉ា មើលឃើញថា បញ្ហានេះវាកាន់តែស្មុគស្មាញ ដោះមិនចេញ ហើយឈានទៅរកស្ថានភាពធ្ងន់ធ្ងរជាងមុន ចំពោះវិវាទរវាងមេដឹកនាំកំពូលទាំងពីររូបនេះ។ លោកហាក់មើលមិនឃើញអំពីច្រកចេញណាមួយចំពោះជីវិតនយោបាយរបស់លោក សម រង្ស៊ី និងវាសនាអ្នកនយោបាយបក្សប្រឆាំងនៅកម្ពុជាទៀតទេ។
បើតាមលោក ឯម សុវណ្ណរ៉ា ការបន្តបោះជំហានមួយកម្រិតរហូតរុញរឿងក្តីនេះចូលទៅដល់ដៃតុលាការកម្រិតពិភពលោកថែមទៀត វាកាន់តែបង្ហាញពីភាពប្រេះឆាដែលមិនអាចរកចំណុចរួមបាន។
លោកបន្តថា៖ «ស្ថានភាពហ្នឹង បើយើងមើលពីលោក សម រង្ស៊ី និងលោក ហ៊ុន សែន ហ្នឹងពុំមានច្រកសម្របសម្រួលទេ។ វប្បធម៌សន្ទនាដែលបង្កើតកាលពីឆ្នាំ២០១៤ហ្នឹង ប្រហែលជាមិនអាចប្រើប្រាស់បានទៀតទេ ជាទស្សនៈខ្ញុំ ហើយការឡើងបកស្រាយរបស់លោក សម រង្ស៊ី នៅតុលាការប្រទេសបារាំងហ្នឹង វាបង្ហាញនូវភាពមួយចំនួនអំពីអំពើឧក្រិដ្ឋកម្ម ដូចអីដែលលោក សម រង្ស៊ី និយាយហ្នឹង វាកើតឡើងជាសាធារណៈ វាមិនមែនត្រឹមតែក្របខណ្ឌកម្ពុជា វាពាសពេញពិភពលោក។ អ៊ីចឹងទេ នេះជាការប្រឈមមុខគ្នាដ៏ស្រួចស្រាវ។ វាមិនមែនជារឿងតូចតាចដែលអាចសម្របសម្រួល និងនិយាយគ្នាបានទេ។ ខ្ញុំមើលទៅ រឿងនេះកាន់តែផ្តាច់ផ្តិល ដូចថាទឹកឡើងត្រីស៊ីស្រមោច ទឹកហោចស្រមោចស៊ីត្រីហើយ »។
មុននឹងបិទបញ្ចប់សវនាការ លោក ម៉ែន សុថាវរិន្រ្ទ លើកឡើងថា លោកស្រីចៅក្រមប្រឹក្សាជំនុំជម្រះបានឱ្យភាគីក្នុងរឿងក្តីសំណូមពរ។
នៅនាទីចុងក្រោយ លោកអះអាងថា លោក សម រង្ស៊ី ថ្លែងទាំងទឹកភ្នែករលីងរលោងថា លោកធ្វើនេះគឺមិនមែនរកយុត្តិធម៌សម្រាប់តែខ្លួនលោកទេ តែសម្រាប់ជនរងគ្រោះនៅក្នុងប្រទេសកម្ពុជាផ្សេងទៀតដែលរងនូវអំពើនិទណ្ឌភាព រហូតមកដល់សព្វថ្ងៃនេះ។ ដោយឡែក ពីភាគីដើមចោទបានស្នើសុំឱ្យតុលាការផ្តល់នូវភាពត្រឹមត្រូវ ដើម្បីស្តារកិត្តិយសដល់លោកនាយករដ្ឋមន្រ្តី ហើយទាមទារសំណងជំងឺចិត្តក្នុងតម្លៃ ១យីរ៉ូ ឬស្មើប្រមាណ១ដុល្លារអាមេរិក៕
