គណៈកម្មាធិការប្រយុទ្ធប្រឆាំងការជួញដូរមនុស្ស បានបង្ហាញការប្ដេជ្ញាចិត្តក្នុងការបង្ក្រាបករណីជួញដូរមនុស្សដែលកំពុងកើតមាននៅក្នុងប្រទេសកម្ពុជាឱ្យមានប្រសិទ្ធភាព បើទោះជនសង្ស័យណាមួយមានទំនាក់ទំនងជាមួយមន្ត្រីមានអំណាចមួយចំនួនក៏ដោយ។
កាលពីថ្ងៃទី៣០ ខែសីហា ឆ្នាំ២០២២ គណៈកម្មាធិការប្រយុទ្ធប្រឆាំងការជួញដូរមនុស្ស ដែលដឹកនាំដោយអគ្គស្នងការនគរបាលជាតិ លោក នេត សាវឿន និងអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា រួមនឹងមន្ត្រីពាក់ព័ន្ធជាច្រើនរូបទៀតបានជួបប្រជុំជាថ្មីម្ដងទៀត នៅរាជធានីភ្នំពេញ ដើម្បីពិភាក្សាអំពីការដោះស្រាយបញ្ហាជួញដូរជនបរទេសនៅតាមទីតាំងឆបោកនៅទូទាំងប្រទេស។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍នៅថ្ងៃទី៣១ ខែសីហា ឆ្នាំ២០២២នេះថា កិច្ចប្រជុំបានសម្រេចលើយុទ្ធសាស្ត្រដែលនឹងត្រូវអនុវត្តដោយអ្នកពាក់ព័ន្ធក្នុងពេលឆាប់ៗនេះ។
លោកថា៖ «យើងបានរៀបចំយុទ្ធសាស្ត្រ […] ជាជំហានដំបូងក្នុងសន្និសីទកាលពីម្សិលមិញ [ថ្ងៃទី៣០ ខែសីហា ឆ្នាំ២០២២] ហើយយើងគ្រោងនឹងជូនដំណឹងដល់ក្រុមការងារនៅថ្ងៃសុក្រនេះ។»
លោក កែវ វ៉ាន់ថន អ្នកនាំពាក្យអគ្គនាយកដ្ឋានអន្តោប្រវេសន៍ ដែលបានចូលរួមក្នុងកិច្ចប្រជុំនោះ បានលើកឡើងដែរថា កិច្ចប្រជុំនោះពិភាក្សាអំពីការផ្សព្វផ្សាយវិធានការនានាដែលនឹងត្រូវធ្វើឡើង។
ក្នុងរយៈពេលជាច្រើនខែនៃការទទួលបានរបាយការណ៍ពីជនរងគ្រោះអំពីការជួញដូរមនុស្ស បង្ហាញថា ឧកញ៉ា និងអ្នកនយោបាយដ៏មានអំណាចមួយចំនួន ត្រូវបានតាមដានដោយមានការជាប់ពាក់ព័ន្ធនឹងទីតាំងប្រព្រឹត្តអំពីឆបោក។ ទាំងលោក សៅ សុខា និងលោក នេត សាវឿន មានទំនាក់ទំនងជិតស្និទ្ធជាមួយបុគ្គលមួយចំនួនដែលមានឈ្មោះក្នុងរបាយការណ៍។
លោក នេត សាវឿន ជាប់សែស្រឡាយជាមួយនឹងលោកនាយករដ្ឋមន្ត្រី ហ៊ុន សែន។ ភរិយារបស់លោក នេត សាវឿន គឺលោកស្រី ហ៊ុន គឹមឡេង គឺជាប្អូនស្រីរបស់លោក ហ៊ុន តូ ហើយក្រុមហ៊ុន Lixin របស់លោក ហ៊ុន តូ មានឈ្មោះក្នុងក្រុមជជែកអំពីការជួញដូរមនុស្ស។
ទន្ទឹមនឹងនេះ លោក សៅ សុខា បានធ្វើការជាមួយ ហើយត្រូវបានគេចាត់ទុកថាជិតស្និទ្ធនឹងអ្នកជំនួញវ័យក្មេងម្នាក់ គឺលោក ឫទ្ធី សំណាង។ លោក សៅ សុខា ជាប្រធានសហព័ន្ធកីឡាបាល់ទាត់កម្ពុជា រីឯលោក ឫទ្ធី សំណាង ជាប្រធានក្លឹបបាល់ទាត់ភ្នំពេញក្រោន។ សណ្ឋាគារ KB របស់លោក ឫទ្ធី សំណាង ពាក់ព័ន្ធនឹងទីតាំងឆបោកក្នុងក្រុងព្រះសីហនុ។
នាយកសណ្ឋាគារ K.B. លោក ចេន អាល់ឡែន (Chen Al Len) ក៏ធ្វើជំនួញជាមួយលោក ហ៊ុន តូ តាមរយៈធនាគារពាណិជ្ជ ហេង ហ៊ី។
លោក ឫទ្ធី រស្មី ប្អូនប្រុសរបស់លោក ឫទ្ធី សំណាង ជាប្រធានក្រុមហ៊ុន K99 ដែលមានទីតាំងក្នុងក្រុងព្រះសីហនុ ដែលជនរងគ្រោះបានរាយការណ៍ថាជាទីតាំងបង្ខាំងមនុស្សទុក។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ទំនាក់ទំនងរបស់លោក នេត សាវឿន ជាមួយលោក ហ៊ុន តូ និងលោក សៅ សុខា ជាមួយលោក ឫទ្ធី សំណាង នឹងមិនប៉ះពាល់ដល់ការស៊ើបអង្កេតនោះទេ។
លោក ខៀវ សុភ័គ បានថ្លែងថា៖ «[ពួកគាត់] មានញាតិសន្ដានរបស់ពួកគេ ប៉ុន្តែមិនអាចបំពានច្បាប់ឡើយ ទោះបីមានទំនាក់ទំនងជាមួយបុគ្គលមានអំណាច ឬនគរបាលក៏ដោយ»។
លោកបន្តថា រដ្ឋាភិបាលនឹងមិនអនុញ្ញាតឱ្យមានការជួញដូរមនុស្សជាបន្តទៀតនោះទេ ព្រោះវាធ្វើឱ្យប៉ះពាល់ដល់សង្គម និងអាចពាក់ព័ន្ធនឹងការលាងសម្អាតប្រាក់ ហើយលោកបានច្រានចោលការរិះគន់ការងាររបស់គណៈកម្មាធិការនេះ។
លោកបន្ថែមថា៖ «បើយើងមិនធ្វើការទេ គេថាយើងអត់មានការប្ដេជ្ញាចិត្ត។ ហើយនៅពេលដែលយើងធ្វើការ ក៏ខុស! ដូច្នេះ ចូរយើងធ្វើការ និងសង្គ្រោះពួកគេ [ជនរងគ្រោះ]»៕
បកប្រែ និងសម្រួលចេញពីអត្ថបទដើមភាសាអង់គ្លេស៖ Human Trafficking Committee Vows Action Regardless of Suspected Links
