ព័ត៌មានជាតិ, សន្តិសុខ

សមត្ថកិច្ចកម្ពុជាថាមិនឃើញមានការចាប់បង្ខាំងពលរដ្ឋជប៉ុនដូចការអះអាងឡើយ

លោក ម៉ិច ដារ៉ា
| ២៧ មករា ២០២៣
ម៉ោង ១៤:៤៣

រថយន្តសមត្ថកិច្ចតម្រៀបគ្នានៅក្បែរអគារមួយកន្លែងក្នុងក្រុងព្រះសីហនុ ខែកញ្ញា ឆ្នាំ២០២២។ (ម៉ិច ដារ៉ា/ VOD)

ក្រសួងមហាផ្ទៃកម្ពុជា បានឱ្យដឹងថា ក្រោយស៊ើបអង្កេត នគរបាលអន្តោប្រវេសន៍រកមិនឃើញមានករណីបង្ខាំងមនុស្សទុកដូចការអះអាងដែលថាមានការបង្ខាំងជនជាតិជប៉ុនចំនួន១៩នាក់នៅសណ្ឋាគារមួយក្នុងខេត្តព្រះសីហនុ។

អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍នៅថ្ងៃទី២៦ ខែមករា ថាទូរសព្ទទាន់ហេតុការណ៍របស់អាជ្ញាធរបានទទួលពាក្យបណ្ដឹងអនាមិកមួយ កាលពីថ្ងៃអង្គារ [ទី២៤ ខែមករា ឆ្នាំ២០២៣] ថាជនជាតិជប៉ុនចំនួន១៩នាក់ កំពុងត្រូវបានបង្ខាំងនៅសណ្ឋាគារម៉ារីប៊ីច (Mary Beach) ក្នុងសង្កាត់លេខ៤ ក្រុងព្រះសីហនុ។

លោកថា នគរបាលអន្តោប្រវេសន៍ខេត្តព្រះសីហនុ បានចុះស៊ើបអង្កេតតាមពាក្យបណ្តឹងនេះនៅថ្ងៃដដែល ដោយចុះទៅសណ្ឋាគារផ្ទាល់នៅឆ្នេរអូរត្រេះ ប៉ុន្តែមិនឃើញមានករណីគួរឱ្យសង្ស័យឡើយ។

លោកបន្តថា៖ «យើងបានចុះទៅ និងបានឃើញមនុស្ស ១៩នាក់។ មិនមានអ្វីឡើយ ហើយពួកគេស្នាក់នៅធម្មតា»។

លោកថា នគរបាលបានអនុញ្ញាតឱ្យជនជាតិជប៉ុនទាំង១៩នាក់នោះស្នាក់នៅ ប៉ុន្តែកំពុងបន្តតាមដានទីតាំងនោះ។

បន្ទាប់ពីមានរបាយការណ៍ជាច្រើនខែ អំពីការបង្ខាំងមនុស្ស និងបង្ខំឱ្យធ្វើការនៅទីតាំងឆបោក ក្នុងក្រុងព្រះសីហនុ និងទូទាំងប្រទេស ក្រសួងមហាផ្ទៃបានបើកបណ្តាញទូរសព្ទទាន់ហេតុការណ៍ និងទទួលបានពាក្យបណ្តឹងអំពីការជួញដូរមនុស្សរាប់រយករណី។ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងថា ជនបរទេសជាង១ ០០០នាក់ដែលត្រូវបានជួញដូរ ត្រូវបានរកឃើញ។

កម្មករដែលត្រូវបានជួយសង្គ្រោះពីទីតាំងឆបោក បានឱ្យដឹងថា ជនបរទេសរាប់ម៉ឺននាក់ត្រូវបានបង្ខំឱ្យធ្វើការឆបោកចេញពីទីតាំងនានានៅក្នុងប្រទេសកម្ពុជា តាមរយៈការបង្កើតទំនាក់ទំនងក្លែងក្លាយ រូបិយបណ្ណឌីជីថល (cryptocurrency) និងគម្រោងឆបោកផ្សេងៗ។

ជនរងគ្រោះខ្លះទៀតអះអាងថា បានរងអំពើហិង្សា ការធ្វើទារុណកម្ម និងបង្ខំឱ្យធ្វើការ ដោយទីតាំងប្រតិបត្តិការតម្រូវឱ្យបង់ប្រាក់រាប់ម៉ឺនដុល្លារ ជាថ្នូរនឹងការដោះលែង។ ក្រុមគ្រួសាររបស់ជនគ្រោះនៅបរទេស ដែលព្យាយាមជួយសង្គ្រោះសាច់ញាតិរបស់ខ្លួនដែលបានជាប់នៅក្នុងទីតាំងឆបោក បានអំពាវនាវជាច្រើនដងឱ្យអាជ្ញាធរកម្ពុជាជួយ ដែលអាជ្ញាធរបានបដិសេធអស់រយៈពេលជាច្រើនខែ ថាមិនមានស្ថានភាពបែបនេះឡើយ។

ស្ថានទូតជប៉ុន បាននិយាយកាលពីល្ងាចថ្ងៃព្រហស្បតិ៍ម្សិលមិញថា ស្ថានទូតកំពុងពិនិត្យស្ថានការណ៍នេះជាមួយអាជ្ញាធរកម្ពុជា ហើយមិនអាចធ្វើសេចក្តីថ្លែងការណ៍បានទេនៅពេលនេះ។

អគ្គកុងស៊ុលជប៉ុន លោកស្រី គូបូ តូម៉ូកូ (Kubo Tomoko) មានប្រសាសន៍ថា៖ «ស្ថានទូតបានខិតខំការពារពលរដ្ឋជប៉ុន ដែលប្រឈមនឹងស្ថានភាពលំបាកផ្សេងៗនៅក្នុងប្រទេសកម្ពុជា ហើយយើងនៅបន្តធ្វើកិច្ចការនេះ។ ស្ថានទូតតែងតែផ្តល់ដំបូន្មានដល់ពលរដ្ឋជប៉ុនឱ្យប្រុងប្រយ័ត្នចំពោះសុវត្ថិភាពនៅក្នុងប្រទេសកម្ពុជា រួមទាំងខេត្តព្រះសីហនុផងដែរ»៕

បកប្រែនិងសម្រួលចេញពីអត្ថបទដើមភាសាអង់គ្លេស៖ Police Say No Issue Found in Complaint of 20 Japanese Confined in Sihanoukville

ខេត្តព្រះសីហនុ, ឆបោកអនឡាញ, ជប៉ុន, បង្ខាំងមនុស្សខុសច្បាប់, ប្រជាជនជប៉ុន, ស្ថានទូតជប៉ុន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។