ក្រសួងមហាផ្ទៃប្រកាសមិនទទួលស្គាល់លោក សៀវ សុត ធ្វើជាប្រធានស្ដីទី និងមិនឱ្យគណបក្សខ្មែរស្រឡាញ់ជាតិរៀបចំធ្វើសមាជវិសាមញ្ញឡើយ ដោយថា គណបក្សនេះ បំពានលក្ខន្តិកៈដែលតម្កល់នៅក្រសួង។
ក្នុងសេចក្ដីជូនដំណឹងរបស់ក្រសួងមហាផ្ទៃ ចុះថ្ងៃទី២ ខែកញ្ញា ឆ្នាំ២០២២ បានឱ្យដឹងថា គណបក្សខ្មែរស្រឡាញ់ជាតិ បំពាននឹងលក្ខខណ្ឌកំណត់ក្នុងប្រការ២១ ,២៥ ,២៦, ២៧,២៨ និងប្រការ៣១ នៃលក្ខន្តិកៈគណបក្សដែលបានតម្កល់ទុកនៅក្រសួងមហាផ្ទៃ។
ជាមួយគ្នានេះ គណៈកម្មាធិការអចិន្ត្រៃយ៍ជាស្ថាប័នប្រតិបត្តិចាត់ចែង គ្រប់គ្រង និងអនុវត្តរាល់ការងាររបស់គណបក្សខ្មែរស្រឡាញ់ជាតិមានសមាសភាពចំនួន ៨រូប ដែលក្នុងនោះ មានសមាជិកអចិន្ត្រៃយ៍ចំនួន ៧រូប បានសម្រេចលាឈប់ពីគណបក្សជាលាយលក្ខណ៍អក្សររួចហើយ។
ហេតុនេះ ក្រសួងមហាផ្ទៃមិនទទួលស្គាល់ការជ្រើសតាំងលោក សៀវ សុត ធ្វើជាប្រធានស្ដីទី និងមិនឱ្យរៀបចំធ្វើសមាជវិសាមញ្ញគណបក្សនៅថ្ងៃទី៤ ខែកញ្ញា ឆ្នាំ២០២២ នេះឡើយ។
លោក សៀវ សុត ប្រាប់វីអូឌីនៅថ្ងៃសៅរ៍នេះថា គណបក្សខ្មែរស្រឡាញ់ជាតិបានប្រកាសរំសាយការរៀបចំធ្វើសមាជនៅស្អែក បន្ទាប់ពីទទួលបានសេចក្ដីជូនដំណឹងរបស់ក្រសួងមហាផ្ទៃ។ លោកបន្តថា គណបក្សនេះ នឹងទៅជួបមន្ត្រីក្រសួងមហាផ្ទៃ ដើម្បីសួរព័ត៌មានលម្អិត ពាក់ព័ន្ធរឿងនេះ បន្ទាប់ពីគណបក្សប្រជុំផ្ទៃក្នុង។
លោកថា៖«គណបក្សរៀបចំប្រជុំផ្ទៃ ដើម្បីរៀបចំតំណាងគណបក្សនឹងស្នើសុំជួបខាងក្រសួងមហាផ្ទៃអ្នកទទួលបន្ទុកកិច្ចការងារនយោបាយថាតើភាពចាំបាច់អ្វីខ្លះដែលគណបក្សត្រូវបំពេញនៅចន្លោះប្រហោងដែលជាបញ្ហា ដែលធ្វើឱ្យគណបក្សខ្មែរស្រឡាញ់ជាតិឈានទៅដល់ការធ្វើសមាជវិសាមញ្ញមួយ ដើម្បីបំពេញក្បាលម៉ាស៊ីនដឹកនាំគណៈកម្មការនាយក ឬបទបញ្ជាផ្ទៃក្នុង ឬលក្ខន្តិកៈមួយចំនួន ដែលគណបក្សត្រូវតែដំណើរការឡើងវិញនេះ»។
គណបក្សខ្មែរស្រឡាញ់ជាតិ គ្រោងនឹងរៀបចំធ្វើសមាជវិសាមញ្ញនៅថ្ងៃទី៤ ខែកញ្ញា ស្អែកនេះ ដើម្បីរៀបចំក្បាលម៉ាស៊ីនឡើងវិញ ក្រោយពីប្រធានបក្សនេះប្រកាសរំលាយដោយខ្លួនឯង។ ការប្រកាសរំលាយពីសំណាក់អតីតប្រធានបក្ស លោក ជីវ កក្តា កាលពីថ្ងៃទី២៩ ខែកក្កដា ឆ្នាំ២០២២ ត្រូវបានលោក សៀវ សុត ជាគណៈកម្មាធិការអចិន្ត្រៃយ៍នៃគណបក្សខ្មែរស្រឡាញ់ជាតិ បានប្រកាសបដិសេធចោល។
គណបក្សខ្មែរស្រឡាញ់ជាតិ គឺជាគណបក្សនយោបាយដំបូងគេដែលត្រូវបានបង្កើតឡើងដោយមានក្បាលម៉ាស៊ីនដឹកនាំមានប្រភពចេញមកពីគណបក្សសង្រ្គោះជាតិដែលត្រូវបានតុលាការរំលាយ ដើម្បីចូលរួមប្រកួតប្រជែងនយោបាយជាមួយគណបក្សប្រជាជនកម្ពុជា។
ក្រោយអតីតប្រធានគណបក្សនេះប្រកាសរំលាយខ្លួនឯងមក ថ្នាក់ដឹកនាំគណបក្សនេះចំនួន៦រូបមានទាំងលោក កង គឹមហាក់ លោក ខឺយ ស៊ីនឿន ផងនោះ ត្រូវបានតែងតាំងជាទីប្រឹក្សាក្រសួងប្រៃសណីយ៍ និងទូរគមនាគមន៍ ដោយមានតំណែងជាអគ្គនាយ និងជាអនុរដ្ឋលេខាធិការ៕
