លោក ហ៊ុន ម៉ាណែត កូនប្រុសច្បងលោកនាយករដ្ឋមន្ត្រី ហ៊ុន សែន បានប្រតិកម្មទៅអ្នកនយោបាយបក្សប្រឆាំងចាស់វស្សា និងអ្នកវិភាគខ្លះ ដែលចោទថា លោកមិនបានធ្វើអ្វីសោះ និងមានជម្លោះជាមួយបងប្អូនបង្កើតក្នុងគ្រួសារដើម្បីដណ្តើមគ្នាយកតំណែងនាយករដ្ឋមន្ត្រីនៅថ្ងៃអនាគត។
ការថ្លែងរបស់ លោក ហ៊ុន ម៉ាណែត បើទោះបីជាលោកមិនបានបញ្ចេញឈ្មោះជនដែលចោទនោះក៏ដោយ ប៉ុន្តែត្រូវបានគេមើលឃើញថា ទំនងជាការឆ្លើយតបទៅលោក សម រង្ស៊ី ស្ថាបនិកគណបក្សសង្គ្រោះជាតិដែលត្រូវបានតុលាការកំពូលរំលាយ និងអ្នកវិភាគនយោបាយ លោក គឹម សុខ ដែលចោទលោកថា មិនបានធ្វើអ្វីសោះ ហើយនិងកំពុងមានជម្លោះជាមួយបងប្អូនបង្កើតរវាងលោក ហ៊ុន ម៉ាណែត និងលោក ហ៊ុន ម៉ានី ដើម្បីចង់បានតំណែងជានាយករដ្ឋមន្ត្រីនៅថ្ងៃអនាគត។
ដកស្រង់ពីវីដេអូក្នុងការថ្លែងនៅពិធីប្រកាសជាផ្លូវការបញ្ចូលសមាជិក សមាជិកា គណបក្សប្រជាជនកម្ពុជា នៅខេត្តសៀមរាប និងត្រូវបានលោក យកមកបង្ហោះនៅលើទំព័រហ្វេសប៊ុករបស់ខ្លួនកាលពីម្សិលមិញ លោក ហ៊ុន ម៉ាណែត ថ្លែងបែបចំអកទៅអ្នកនយោបាយចាស់វស្សា និងអ្នកវិភាគមួយចំនួននោះថា គ្រួសាររបស់លោកមិនចាញ់ការឃោសនាអ្នកទាំងនោះ ដែលនាំឱ្យខាតប្រយោជន៍និងមានជម្លោះក្នុងគ្រួសារនោះឡើយ។
លោកអះអាងថា បងប្អូនរបស់លោកទាំង៥នាក់ គឺប្រៀបដូចទៅនឹងផ្ទះមួយដែលមានសសរ៥ដើម ហើយសសរទាំង៥នេះ បើមានសសរណាមួយបាក់ ឬរលំ គឺត្រូវសង្កត់ស្លាប់ទាំងអស់គ្នា។ ដូច្នេះហើយលោកថា បងប្អូនរបស់លោកមានតែស្រលាញ់ សាមគ្គីគ្នា ដើម្បីទ្រផ្ទះមួយនេះឱ្យកាន់តែរឹងមាំបន្ថែមទៀត ហើយការជ្រើសរើសលោកជាបេក្ខភាពនាយករដ្ឋមន្ត្រីបន្តវេននៅថ្ងៃអនាគតនោះ គឺ ធ្វើតាមការជ្រើសតាំងរបស់គណបក្សប្រជាជនកម្ពុជាដែលបានសម្រេចតែប៉ុណ្ណោះ។
លោកថ្លែងបែបនេះថា៖ «ខ្ញុំចង់ឱ្យលោកអ៊ំ[លោក សម រង្ស៊ី] ដែលចោទថា ខ្ញុំអត់ធ្វើអ្វីសោះ យកសៀវភៅហ្នឹងទៅមើលទៅ បើចង់បានខ្ញុំផ្ញើជូន អត់គិតថ្លៃ ផ្ញើដល់ស្រុកបារាំងជូនដល់លោក អ៊ំ ទៀត យកទៅមើលទៅ ហើយនេះ គ្រាន់តែ២០% មកដល់២០% ដែលខ្ញុំបានធ្វើផង សម្រាប់បម្រើជាតិមាតុភូមិ។ ខ្ញុំមិនមែនថា ខ្ញុំធ្វើផ្តាច់មុខច្រើនជាងគេទេ តែខ្ញុំបានចូលរួមខ្លះ»។
លោកថ្លែងបន្តថា៖ «ចំណែកប្អូនខ្ញុំនិងខ្ញុំ ដែលគេចោទប្រកាន់ថា ខ្ញុំប្រកួតប្រជែងគ្នា មិនមែនលើកទីមួយទេ គេធ្លាប់វៃរាប់ឆ្នាំមកហើយ តាំងពីមុន តាំងពីគេមិនទាន់ប្រកាសបេក្ខភាព។ គេថាពីណា សំណួរគេសួរឱ្យសរសេរមកតើពីណាដែលត្រូវជ្រើសរើសជំនួសរវាងខ្ញុំនិងប្អូនខ្ញុំ ឪពុកខ្ញុំបានបកស្រាយហើយ ប្អូនខ្ញុំ ហ៊ុន ម៉ានី ក៏បានចេញនៅក្នុងហ្វេសប៊ុកដើម្បីបង្ហាញ ហើយគេយកអាហ្នឹងទៅបកស្រាយទៀត។ គេថាមកពីចេញមកបកស្រាយហ្នឹងហើយបានទៅជាការពិត បើគិតថាការវិភាគនេះធ្វើឱ្យគ្រួសារខ្ញុំ បងប្អូនខ្ញុំពីរនាក់ បីនាក់ឈ្លោះគ្នាចាំសេះដុះស្នែង ចាំត្រីអណ្តែងដុសស្រកា»។
លោក ហ៊ុន ម៉ាណែត បន្ថែមថា ទោះជាមានការរិះគាត់ និងក្រុមគ្រួសារយ៉ាងណា ក៏មិនអាចបំបែកបំបាក់ក្រុមគ្រួសារលោកបានដែរ ពីព្រោះគ្រួសាររបស់លោកមានតួនាទីសំខាន់ក្នុងការជួយប្រជាពលរដ្ឋ និងសង្គមជាតិទៅថ្ងៃខាងមុខ ឱ្យកាន់តែរីកចម្រើនថែមទៀត។
វីអូឌីមិនអាចសុំការបំភ្លឺពីលោក សម រង្ស៊ី ស្ថាបនិកប្រធានគណបក្សសង្គ្រោះជាតិដែលត្រូវបានតុលាការកំពូលរំលាយ និងអ្នកវិភាគនយោបាយ លោក គឹម សុខ បានទេនៅថ្ងៃអាទិត្យនេះ។
ប៉ុន្តែនៅក្នុងវេទិកាអាយដេថក(Idea Talk) របស់សារព័ត៌មានឌឹខេមបូឌាដេលី(The Cambodia Daily) កាលពីថ្ងៃទី១ ខែកញ្ញា លោក គឹម សុខ បាននិយាយថា លោក ហ៊ុន ម៉ានី ពិតជាបានអន់ចិត្តក្នុងការតែងតាំងបងប្រុសបង្កើត គឺ លោក ហ៊ុន ម៉ាណែត ធ្វើជាបេក្ខភាពនាយករដ្ឋមន្ត្រីថ្ងៃអនាគត ត្បិតកូនប្រុសពៅលោក ហ៊ុន សែន រូបនេះក៏មានបំណងចង់ធ្វើនាយករដ្ឋមន្ត្រីនៅថ្ងៃអនាគតផងដែរ។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា អ្នកវិភាគ និងអ្នកនយោបាយមួយចំនួន ដែលរិះគន់លោក ហ៊ុន ម៉ាណែត និងក្រុមគ្រួសារលោកកន្លងមក ពាក់ព័ន្ធនឹងការដណ្តើមគ្នាធ្វើជាបេក្ខភាពនាយករដ្ឋមន្ត្រីនាថ្ងៃអនាគតនោះ គ្រាន់តែជារឿងតូចមួយក្នុងក្រុមគ្រួសារលោក ហ៊ុន ម៉ាណែត តែប៉ុណ្ណោះ។
លោក ឯម សុវណ្ណរ៉ា ផ្តល់ជាអនុសាសន៍ថា អ្នកវិភាគ និងអ្នកនយោបាយទាំងអស់ មុននឹងរិះគន់ គួរតែមានក្រមសីលធម៌ ឬគោលការណ៍ក្នុងការរិះគន់ ដើម្បីស្ថាបនាជាប្រយោជន៍ជាតិពិតប្រាកដ។
ក្នុងសេចក្ដីប្រកាសរបស់គណបក្សប្រជាជនកម្ពុជា អំពីលទ្ធផលនៃសន្និបាតគណៈកម្មាធិការកណ្ដាលលើកទី៤៣ នៅថ្ងៃទី២៤ ខែធ្នូ ឆ្នាំ២០២១ បានសម្រេចបោះឆ្នោតបន្តគាំទ្រលោក ហ៊ុន សែន ជាបេក្ខភាពនាយករដ្ឋមន្ត្រី និងបានសម្រេចជាឯកច្ឆន្ទជ្រើសតាំងលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត៕