រដ្ឋអាជ្ញាតៃវ៉ាន់បានលើកឡើងថា ករណីទាមទារប្រាក់លោះមនុស្សចេញពីបរិវេណអាគារ និងការធ្វើទារុណកម្មដោយប្រើប្រាស់ខ្សែភ្លើងឆក់ គឺបានកើតឡើងនៅកម្ពុជា ស្របពេលដែលប្រព័ន្ធផ្សព្វផ្សាយម៉ាឡេស៊ីបានរាយការណ៍ពីករណីចាប់ជំរិត និងលក់មនុស្សម្នាក់ទៅក្នុងការងារឆបោក ខណៈកាសែតវៀតណាមក៏បានចុះផ្សាយថា ប្រទេសចំនួន១០ បច្ចុប្បន្នកំពុងតែជំរុញឱ្យកម្ពុជាសហការលើការជួញដូរមនុស្សដោយខុសច្បាប់ផងដែរ។
យោងតាមប្រព័ន្ធផ្សព្វផ្សាយក្នុងតំបន់ ដែលតាមដានអំពីប្រតិបត្តិការឆបោក និងការជួញដូរមនុស្សនៅកម្ពុជាដែលមានការកើនឡើងក្នុងរយៈពេលប៉ុន្មានសប្ដាហ៍ចុងក្រោយនេះ បានឱ្យដឹងថា មនុស្សរាប់ពាន់នាក់ រួមមាន ជនជាតិតៃវ៉ាន់ ថៃ និងវៀតណាម អាចនឹងកំពុងជាប់ក្នុងប្រតិបត្តិការឆបោកដោយខុសច្បាប់នានានៅកម្ពុជា។
ទាក់ទិនករណីនេះ អាជ្ញាធរកម្ពុជាក៏ធ្លាប់បានចាត់វិធានការប្រឆាំងនឹងការជួញដូរមនុស្ស ដែលក្នុងនោះក៏មានការជួយសង្គ្រោះជនរងគ្រោះរាប់រយនាក់ និងចាប់ខ្លួនអ្នកដែលពាក់ព័ន្ធមួយចំនួនផងដែរ។
យោងតាមសារព័ត៌មានតៃវ៉ាន់ Focus Taiwan កាលពីថ្ងៃសុក្រសប្ដាហ៍មុនបានឱ្យដឹងថា រដ្ឋអាជ្ញាតៃវ៉ាន់បានចោទប្រកាន់ជនសង្ស័យ ៩នាក់ ពីបទជួញដូរមនុស្សប្រមាណជា៨០នាក់មកកាន់ទីតាំងប្រតិបត្តិការឆបោកនៅកម្ពុជា។
ជាមួយគ្នានេះ សារព័ត៌មាន AFP ក៏បានរាយការណ៍ឱ្យដឹងថា ការផ្សព្វផ្សាយការងារដែលកុហកបោកប្រាស់ក្នុងការទទួលបានប្រាក់ខែខ្ពស់ បានកំណត់គោលដៅលើយុវជនដែលគ្មានការងារធ្វើ និងជួបប្រទះបញ្ហាហិរញ្ញវត្ថុ ដោយពួកគេទាំងអស់នេះគឺត្រូវបានបញ្ជូននិងបង្ខំឱ្យធ្វើការងារបោកប្រាស់តាមប្រព័ន្ធអនឡាញ។
ដោយផ្អែកលើសេចក្តីថ្លែងការណ៍របស់រដ្ឋអាជ្ញា ប្រភពដដែលបន្តថា៖ «មនុស្សមួយចំនួនត្រូវបានគេវាយដំ ឆក់ខ្សែភ្លើង ឬចាប់បង្ខាំងដោយទាមទារប្រាក់លោះ ប្រសិនបើពួកគេមិនធ្វើតាមការបញ្ជា ឬបំពេញការងារមិនបានល្អជាដើម»។
យោងតាមកាសែតម៉ាឡេស៊ី The Star កាលពីថ្ងៃសុក្រសប្ដាហ៍មុន ក៏បានរាយការណ៍ថា ស្ត្រីម៉ាឡេស៊ីម្នាក់ដែលមកវិស្សមកាលនៅកម្ពុជា ក៏ត្រូវបានគេចាប់ជំរិតពីភោជនីយដ្ឋានមួយកន្លែង កាលពីថ្ងៃទី៧ ខែសីហា ផងដែរ។
ប្រភពដដែលបន្ថែមថា ស្រ្តីខាងលើនេះត្រូវបានគេបញ្ជូនយកទៅលក់ និងបង្ខំឱ្យធ្វើការនៅក្នុងទីតាំងប្រតិបត្តិការឆបោកមួយ ប៉ុន្តែត្រូវបានជួយសង្គ្រោះវិញនៅថ្ងៃទី២៣ ខែសីហា បន្ទាប់ពីករណីនេះត្រូវបានរាយការណ៍ទៅកាន់រដ្ឋមន្ត្រីក្រសួងមហាផ្ទៃ លោក ស ខេង តាមរយៈបណ្ដាញសង្គមរបស់លោក។
កាសែតដដែលនេះ កាលពីចុងសប្តាហ៍កន្លងទៅ ក៏បានរាយការណ៍ករណីដាច់ដោយឡែកផ្សេងទៀត អំពីស្រ្តីម្នាក់ដែលស្នើសុំអាជ្ញាធរឱ្យជួយសង្គ្រោះកូនប្រុសរបស់ខ្លួនចេញពីប្រទេសកម្ពុជាផងដែរ។
ងាកមកកាន់ប្រទេសវៀតណាមវិញ សារព័ត៌មាន VnExpress កាលពីសប្តាហ៍មុន បានរាយការណ៍អំពីយុទ្ធសាស្ត្រដែលអ្នកជួញដូរប្រើប្រាស់ក្នុងការអូសទាញជនជាតិវៀតណាមឱ្យមកកាន់ទីតាំងឆបោកនៅកម្ពុជា ដែលក្នុងនោះ អាជ្ញាធរថាមនុស្សរាប់ពាន់នាក់អាចនឹងត្រូវបានគេបោក និងជួញដូរចូលមកកម្ពុជា។
ទាក់ទិនករណីនេះ វៀតណាម រួមនឹងប្រទេសចំនួន៩ផ្សេងទៀត ក៏បានស្នើក្នុងការផ្តល់កិច្ចសហប្រតិបត្តិការដល់កម្ពុជា ក្នុងការប្រយុទ្ធប្រឆាំងនឹងការជួញដូរមនុស្ស។
ទោះជាយ៉ាងណា សមាគមសម្ព័ន្ធខ្មែរចិននៅកម្ពុជា ដែលមានអ្នកឧកញ៉ា ពុង ឃាវសែ ជាប្រធាន កាលពីខែមុន ក៏ធ្លាប់បានចេញសេចក្តីថ្លែងការណ៍មួយជំទាស់នឹងប្រព័ន្ធផ្សព្វផ្សាយអន្តរជាតិដែលចាត់ទុកកម្ពុជាថាជាជម្រកសម្រាប់ក្រុមឧក្រិដ្ឋជន ខណៈខ្លួនថាការដែលទទួលបានការវិនិយោគក្លែងក្លាយ គឺជារឿងដែលមិនអាចចៀសផុតឡើយ ប៉ុន្តែវាមិនបានតំណាងឱ្យសេដ្ឋកិច្ចកម្ពុជាទាំងមូលនោះទេ។
យោងតាមគេហទំព័ររបស់សមាគមកាលពីពេលកន្លងទៅ ក្នុងនោះគេសង្កេតឃើញមានការដាក់ឈ្មោះសមាជិកឯកជន ដែលរួមមានឧកញ៉ា ដួង ឈីវ, សមាជិកព្រឹទ្ធសភា លោក ឡាវ ម៉េងឃីន, ប្រធានក្រុមប្រឹក្សាភិបាលធនាគារវឌ្ឍនៈ លោកឧកញ៉ា សំ អាង, រដ្ឋមន្ត្រីក្រសួងដែនដី លោក ជា សុផារ៉ា, អតីតរដ្ឋមន្ត្រីក្រសួងកសិកម្ម លោក ចាន់ សារុន, តំណាងរាស្រ្ត លោក ឈាង វុន, សមាជិកព្រឹទ្ធសភា លោក កុក អាន, លោកឧកញ៉ា លី យ៉ុងផាត់ និងលោកឧកញ៉ា ខូវ គឹមបាក់។
ទោះជាយ៉ាងណា បន្ទាប់ពីចេញសេចក្តីថ្លែងការណ៍កាលពីខែមុន បញ្ជីសមាជិកទាំងអស់នេះត្រូវបានដកចេញពីគេហទំព័រវិញ៕
រាយការណ៍បន្ថែមដោយ លោក ភិន រតនា
បកប្រែនិងសម្រួលចេញពីអត្ថបទដើមភាសាអង់គ្លេស៖ Accounts of Trafficking in Cambodia Escalate in Regional Media
