គ្រួសារសពរបស់បុរសម្នាក់នៅរាជធានីភ្នំពេញ អះអាងថា បងប្រុសខ្លួនស្លាប់អាចបណ្ដាលមកពីការធ្វើទារុណកម្មធ្ងន់ធ្ងរ មិនមែនស្លាប់ព្រោះជំងឺ និងដួលក្នុងបន្ទប់ទឹកដូចការលើកឡើងរបស់សមត្ថកិច្ចឡើយ ដោយសារនៅលើដងខ្លួននិងដៃមានស្នាមជាំ ហើយមានរបួសជាច្រើនថែមទៀតផង។
ការអះអាងនេះកើតឡើងក្រោយមានបុរសឈ្មោះ ហាយ ប៊ុណ្ណា អាយុជាង៣០ឆ្នាំ ត្រូវបានសមត្ថកិច្ចសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ចាប់ខ្លួនកាលពីថ្ងៃទី២៥ ខែសីហា ឆ្នាំ២០២២ ក្នុងនាមជាជនសង្ស័យ ដោយចោទពាក់ព័ន្ធករណីលួច។ សមត្ថកិច្ចអះអាងថា លោក ហាយ ប៊ុណ្ណា ស្លាប់នៅមន្ទីរពេទ្យរុស្ស៊ី កាលថ្ងៃទី៣ ខែកញ្ញា ប៉ុន្តែគ្រួសារថា ការស្លាប់បងប្រុសរបស់ខ្លួនបណ្ដាលមកពីការធ្វើទារុណកម្ម បន្ទាប់ពីមានការចាប់ឃុំខ្លួនគាត់ជាច្រើនថ្ងៃ។
អ្នកស្រី ហាយ ចាន់នី ដែលអះអាងជាប្អូនរបស់សពលោក ហាយ ប៊ុណ្ណា បានប្រាប់វីអូឌីនៅថ្ងៃអង្គារនេះថា នៅពេលដែលសមត្ថកិច្ចចាប់ខ្លួនបងប្រុសអ្នកស្រីទៅនោះ គឺគាត់មានសុខភាពធម្មតា ដោយគ្មានរបួសស្នាមនៅដៃ និងលើដងខ្លួនឡើយ។ ប៉ុន្តែបន្ទាប់ពីយកបងប្រុសគាត់ទៅឃុំខ្លួនបាន២ថ្ងៃ ស្រាប់តែបងរបស់គាត់ឈឺ ហើយបញ្ជូនទៅសង្គ្រោះបន្ទាន់នៅមន្ទីរពេទ្យ រហូតដល់ថ្ងៃទី៣ ខែកញ្ញា បងគាត់ក៏ស្លាប់ដោយមានស្នាមរបួសនៅដៃ និងជាំនៅលើដងខ្លួន។
អ្នកស្រីថា៖ «ដៃបងខ្ញុំខាងស្ដាំហ្នឹង វាជាំឡើងខ្មៅ! ហើយមួយទៀត ខាងឆ្វេងកន្លែងឆ្អឹងជំនី ក្រោមក្លៀកមួយកន្លែងដែរ។ គ្រួសារខ្ញុំដឹងតែថាធ្វើទារុណកម្មហើយ ព្រោះអីបងខ្ញុំមិនដែលប្រកាច់ បងខ្ញុំមិនដែលឈឺអីទេ យកបងខ្ញុំទៅតែ២ថ្ងៃ ទៅអ៊ីចឹង។ បងខ្ញុំនៅផ្ទះដើរដោះតែអាវទេ។ និយាយទៅ មិនដែលពាក់អាវម៉េចទេ សូម្បីសែងបងខ្ញុំមក [យកសពមក] ក៏ដោះអាវដែរ»។
អ្នកស្រី ហាយ ចាន់នី បន្តថា នៅពេលបញ្ជូនទៅមន្ទីរពេទ្យបង្អែកខណ្ឌព្រែកព្នៅ សមត្ថកិច្ចក៏មិនបានឱ្យម្ដាយរបស់គាត់ជិះរថយន្តទៅជាមួយដែរ។ ភាពមិនប្រក្រតីទាំងនេះ អ្នកស្រីស្នើទៅរដ្ឋាភិបាលជួយរកយុត្តិធម៌ ដោយបើកការស៊ើបអង្កេតឱ្យបានច្បាស់លាស់ ដោយសារគ្រួសាររបស់គាត់នៅមិនទាន់អស់ចិត្តចំពោះការបកស្រាយរបស់សមត្ថកិច្ចឡើយ។
អ្នកស្រីថា៖ «បើសមត្ថកិច្ចមានភស្តុតាងអីឱ្យមើលសមនឹងរបួសបងខ្ញុំ អាហ្នឹងខ្ញុំទទួលយកបាន ប៉ុន្តែនេះប្រាប់មិនសមហេតុផលនឹងរបួសបងខ្ញុំ។ ខ្ញុំសួរ មនុស្សប្រកាច់មានកម្លាំងអត់? ពេលបងខ្ញុំប្រកាច់ គាត់ឱ្យកាមេរ៉ាតែកន្លែងបងខ្ញុំប្រកាច់ហ្នឹង តែសមត្ថកិច្ចម្នាក់ទៀត គាត់ថាកាមេរ៉ាតាំងពីយកបងខ្ញុំចូល និងតាំងពីសែងបងខ្ញុំចេញ ប៉ុន្តែអត់បានយក២ហ្នឹងឱ្យខ្ញុំឃើញទេ ឃើញតែចំណុចបងខ្ញុំប្រកាច់។ ពេលប្រកាច់ មានកាមេរ៉ាដើរដល់កន្លែងប្រកាច់ នេះអត់មានទេ ឱ្យមើលតែកន្លែងចានបង្គន់ហ្នឹង»។
អធិការនគរបាលខណ្ឌព្រែកព្នៅ លោក ឈិន គឹមធុយ បានបដិសេធចំពោះការចោទប្រកាន់ថា ការស្លាប់របស់លោក ហាយ ប៊ុណ្ណា ដោយសារសមត្ថកិច្ចធ្វើទារុណកម្ម។ លោកនៅតែអះអាងថា ការស្លាប់របស់ជនសង្ស័យរូបនេះ គឺដោយសារជំងឺប្រចាំកាយរបស់គាត់។
លោកថា៖ «គាត់មានជំងឺប្រចាំកាយគាត់ផ្សេងទៀត គ្មានទាក់ទងការ [ធ្វើទារុណកម្ម] ទេ ខ្ញុំរាយការណ៍ជូនព្រះរាជអាជ្ញាត្រឹមត្រូវណាស់។ ឥលូវខ្ញុំកំពុងធ្វើការបកស្រាយបំភ្លឺ មិនមែនធ្វើទារុណកម្ម តើមានហេតុផលណាទៅធ្វើទារុណកម្មគាត់? អត់មានតាំងពីថ្ងៃដំបូងបញ្ជូនគាត់ទៅពេទ្យ! គ្រាន់តែមានអាការមិនស្រួល ពេទ្យបង្អែកប្រចាំសង្កាត់ព្រែកព្នៅ ហើយទៅពេទ្យលោកសង្ឃ និងចុងក្រោយពេទ្យរុស្ស៊ី រឿងមិនមែនទើបកើតណា! វាកើតយូរហើយ»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ចាត់ទុកការបកស្រាយរបស់សមត្ថកិច្ចជាការការពារខ្លួនតែប៉ុណ្ណោះ ក្រោយពីមានការចោទប្រកាន់ពីក្រុមគ្រួសារ។ លោកបន្តថា ទោះបីសមត្ថកិច្ចចេញបំភ្លឺហើយក្ដី ប៉ុន្តែមិនមែនមានន័យថារឿងនេះត្រូវបញ្ចប់ទេ។ លោកបញ្ជាក់ថា កាលណាមានជនជាប់ឃុំស្លាប់ មិនថានៅក្នុងពន្ធនាគារ ឬក្នុងមន្ទីរឃុំឃាំងបណ្ដោះអាសន្នរបស់នគរបាលយុត្តិធម៌ឡើយ វាជាករណីសង្ស័យ ដែលទាមទារឱ្យមានការស៊ើបអង្កេតច្បាស់លាស់។
លោក អំ សំអាត ថាករណីជនជាប់ឃុំស្លាប់អំឡុងពេលឃុំខ្លួនបានកើតច្រើនករណី ហើយបញ្ហានេះកំពុងស្ថិតនៅក្នុងភាពចម្រូងចម្រាស ដែលទាមទារឱ្យគណៈកម្មការប្រឆាំងនឹងអំពើទារុណកម្ម ស៊ើបអង្កេតចំពោះរឿងនេះ ដើម្បីផ្ដល់យុត្តិធម៌ដល់ជនរងគ្រោះ។
លោកថា៖ «អ៊ីចឹងវាទាមទារឱ្យមានការបង្កើតគណៈកម្មការឯករាជ្យស៊ើបអង្កេតដោយតម្លាភាពនិងយុត្តិធម៌ ដើម្បីស្វែងរកការពិត ទាំងជនរងគ្រោះ ទាំងគ្រួសារជនរងគ្រោះ ឬអ្នកពាក់ព័ន្ធ វាមិនមែនស្ថិតនៅក្រុមគ្រួសារគាត់ចោទប្រកាន់ មន្ត្រីដែលពាក់ព័ន្ធឆ្លើយថាអត់ អាហ្នឹងមិនមែនជាដំណោះស្រាយទេ ជាការដោះសារយករួចខ្លួនទេ។ អ្វីដែលសំខាន់ត្រូវមានការស៊ើបអង្កេតដោយតម្លាភាព និងយុត្តិធម៌»។
ករណីស្រដៀងនេះ កាលពីថ្ងៃទី៣ ខែមេសា ឆ្នាំ២០២១ មន្ត្រីនគរបាលស្រុកសង្កែ ខេត្តបាត់ដំបង បានចាប់ខ្លួនលោក ពេជ្រ ធារ៉េត អាយុ៣១ឆ្នាំ រស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ ក្រោយពីមានតម្រុយថា គាត់ជាអ្នករៀបចំគម្រោងសម្លាប់ប្រពន្ធដោយឆក់ខ្សែភ្លើង។ ប៉ុន្តែជនសង្ស័យរូបនោះបានស្លាប់នៅថ្ងៃដដែល ក្រោយពីបញ្ជូនចេញពីអធិការដ្ឋាននគរបាលស្រុកសង្កែ យកទៅសង្គ្រោះនៅមន្ទីរពេទ្យ។
បន្ទាប់ពីហេតុការណ៍នេះ គ្រួសារលោក ពេជ្រ ធារ៉េត បានប្ដឹងមន្ត្រីនគរបាលស្រុកសង្កែ ទៅក្រសួងមហាផ្ទៃ ដើម្បីរកយុត្តិធម៌ ដោយចោទមន្ត្រីនគរបាលស្រុកថាបានធ្វើទារុណកម្មសាច់ញាតិរបស់ខ្លួនរហូតដល់ស្លាប់។ ប៉ុន្តែរហូតមកទល់ពេលនេះ យុត្តិធម៌សម្រាប់គ្រួសារលោក ធារ៉េត នៅមិនទាន់មាននៅឡើយ បើទោះបីជាគណៈកម្មាធិការជាតិប្រឆាំងទារុណកម្មនៃក្រសួងមហាផ្ទៃ បានវាយតម្លៃជំហានដំបូងថា ការស្លាប់របស់ជនសង្ស័យរូបនេះអាចជាប់ពាក់ព័ន្ធនឹងការធ្វើទារុណកម្ម។
រដ្ឋធម្មនុញ្ញកម្ពុជា មាត្រា៣៨ ចែងថា ការបង្ខិតបង្ខំ ការធ្វើបាបលើរូបរាងកាយ ត្រូវហាមឃាត់ និងត្រូវផ្ដន្ទាទោសតាមច្បាប់។ ចំណែកមាត្រា២១០ នៃក្រមព្រហ្មទណ្ឌចែងថា «ទារុណកម្ម ឬអំពើឃោរឃៅដែលប្រព្រឹត្តទៅលើបុគ្គលណាមួយ ត្រូវផ្ដន្ទាទោសដាក់ពន្ធនាគារពី៧ឆ្នាំ ទៅ១៥ឆ្នាំ»៕
