រដ្ឋបាលរាជធានីភ្នំពេញ មិនអនុញ្ញាតឱ្យក្រុមយុវជនប្រមូលផ្ដុំគ្នាលើសពី៥នាក់ នៅមុខក្រសួងមហាផ្ទៃ នៅថ្ងៃទី១៩ ខែកញ្ញា ឆ្នាំ២០២២ ដើម្បីទាមទារឱ្យក្រសួងបញ្ឈប់ការផ្ដល់បណ្ណស្នាក់នៅអចិន្ត្រៃយ៍ និងការផ្តល់សិទ្ធិពេញលេញដល់ជនបរទេសក្នុងការប្រកបអាជីវកម្មនៅកម្ពុជា។
យុវជនមកពីខេត្តសៀមរាប លោក ថេល ធីលែន បានឱ្យដឹងនៅថ្ងៃព្រហស្បតិ៍នេះថា កាលពីថ្ងៃម្សិលមិញ ពួកគាត់បានទៅជួបអភិបាលរងនៃរដ្ឋបាលរាជធានីភ្នំពេញ លោក មាន ចាន់យ៉ាដា ដើម្បីពិភាក្សាគ្នាជុំវិញគម្រោងស្នើសុំការអនុញ្ញាតឱ្យពួកគាត់ចំនួន១០០នាក់ ប្រមូលផ្ដុំគ្នាធ្វើកូដកម្ម ឬបាតុកម្មដោយអហិង្សានៅមុខក្រសួងមហាផ្ទៃ នៅថ្ងៃទី១២ ខែកញ្ញា ឆ្នាំ២០២២នេះ ដើម្បីទាមទារក្រសួងបញ្ឈប់ការផ្ដល់បណ្ណស្នាក់នៅអចិន្ត្រៃយ៍ ការផ្ដល់សិទ្ធិពេញលេញដល់ជនបរទេស ជាពិសេសជនជាតិវៀតណាម ក្នុងការប្រកបអាជីវកម្មនៅកម្ពុជា។
ប៉ុន្តែលោកអះអាងថា ក្នុងជំនួបនោះ អាជ្ញាធររាជធានីភ្នំពេញមិនអនុញ្ញាតឱ្យពួកគាត់ជួបជុំគ្នាលើសពី៥នាក់នោះទេ ដើម្បីកុំឱ្យប៉ះពាល់ដល់សណ្តាប់ធ្នាប់សាធារណៈ។ តែយ៉ាងណា លោកថា ក្រុមយុវជនក៏បានសម្រេចលើកពេលទៅដាក់ញត្តិនៅក្រសួងមហាផ្ទៃ ទៅថ្ងៃទី១៩ ខែកញ្ញា វិញផងដែរ។
លោក ថេល ធីលែន និយាយថា៖ «ការស្នើសុំរបស់យើង គេច្រានចោល! ពាក់ព័ន្ធនឹងបញ្ហាហ្នឹង គេលើកពីបញ្ហាផ្លូវច្បាប់ សណ្ដាប់ធ្នាប់! ដល់អ៊ីចឹងទៅគេអត់ឱ្យយើងជួបជុំទេ គេឱ្យយើងយកញត្តិទៅដាក់វិញ ត្រឹមគ្នា៥នាក់ចុះ។ ពាក់ព័ន្ធនឹងការជួបជុំហ្នឹង យើងប្ដូរយុទ្ធសាស្ត្រមកវិញ ដោយយើងប្រមូលស្នាមមេដៃការចូលរួមរបស់មហាជនវិញ ឥលូវពួកគាត់កំពុងចូលរួមហើយ ហើយកាលបរិច្ឆេទនៃការដាក់ញត្តិហ្នឹង គឺនៅថ្ងៃចន្ទ ទី១៩ ខែកញ្ញា ឆ្នាំ២០២២»។
យុវជនម្នាក់ទៀតមកពីខេត្តកណ្តាល លោក ផុន រស្មី បាននិយាយថា ពួកគាត់នឹងធ្វើតាមការណែនាំរបស់រដ្ឋបាលរាជធានីភ្នំពេញ ដោយមិនធ្វើការជួបជុំមនុស្សលើសពី៥នាក់។ តែយ៉ាងណា លោកថា បើសិនជាពួកគាត់ដាក់ញត្តិទៅក្រសួងមហាផ្ទៃឱ្យជួយដោះស្រាយ តែក្រសួងមិនដោះស្រាយ នោះពួកគាត់នឹងនាំគ្នាជួបជុំដោយសន្តិវិធីនៅទីលានប្រជាធិបតេយ្យ ដើម្បីធ្វើការតវ៉ាបន្តទៀត។
លោកនិយាយថា៖ «បើសិនជាខាងក្រសួងមហាផ្ទៃគាត់យល់ព្រមនឹងសំណើរបស់ក្រុមយុវជនយើង វាជាការល្អ ប៉ុន្តែបើច្រានចោលនូវសំណើទាំងអស់ហ្នឹង គឺនៅតែមានការជួបជុំគ្នាមិនលើសពី១០០នាក់ នៅទីលានប្រជាធិបតេយ្យ ក្នុងគោលបំណងរឿងសុំលុបការបង្កើតភាសាវៀតណាមនៅសាកលវិទ្យាល័យភូមិន្ទភ្នំពេញ និងបណ្ណស្នាក់នៅអចិន្ត្រៃយ៍ដល់ជនអន្តោប្រវេសន្ត»។
អភិបាលរងរាជធានីភ្នំពេញ លោក មាន ចាន់យ៉ាដា សុំមិនធ្វើការបកស្រាយជុំវិញបញ្ហានេះ ដោយលោកបង្វែរឱ្យសួរទៅអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី វិញ ប៉ុន្តែលោក ម៉េត មាសភក្តី មិនលើកទូរសព្ទ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ការដែលអាជ្ញាធររាជធានីភ្នំពេញមិនអនុញ្ញាតឱ្យក្រុមយុវជនជួបជុំគ្នាដោយសន្តិវិធី គឺផ្ទុយពីរដ្ឋធម្មនុញ្ញ និងលិខិតតុបករណ៍អន្តរជាតិដែលបានចែងពាក់ព័ន្ធនឹងការប្រមូលផ្តុំដោយសន្តិវិធី។ ករណីនេះ លោកថា កម្ពុជានឹងនៅតែរងការរិះគន់ថា លទ្ធិប្រជាធិបតេយ្យនៅកម្ពុជាកាន់តែរួមតូច។
លោកមានប្រសាសន៍ថា៖ «បើសិនជាមានការរឹតត្បិត វានៅតែមានការរិះគន់នូវចំណុចដែលមានការរឹតត្បិត ហើយធ្វើឱ្យលំហសេរីភាពជាមូលដ្ឋានរបស់ប្រជាពលរដ្ឋ និងលទ្ធិប្រជាធិបតេយ្យកាន់តែរួមតូច អ៊ីចឹងបញ្ហាហ្នឹងក៏វាប៉ះពាល់ដល់កម្ពុជាយើងដែរ បញ្ហាវានៅតែបន្តតាមដាន ឃ្លាំមើលរិះគន់ទៅលើសេរីភាពជាមូលដ្ឋានហ្នឹង»។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ។
ចំណែកមាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខណ្ឌនៃច្បាប់ ខណៈមាត្រា៤១ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម៕