សហភាពអឺរ៉ុប កាលពីថ្ងៃពុធម្សិលមិញ បានស្នើឱ្យកំណត់តម្លៃឧស្ម័នរបស់រុស្ស៊ី បន្ទាប់ពីលោក វ្លាឌីមៀរ ពូទីន (Vladimir Putin) បានគំរាមកាត់ផ្តាច់ការផ្គត់ផ្គង់ថាមពលទាំងអស់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។
ទាក់ទិននឹងករណីនេះ អឺរ៉ុបបានចោទប្រកាន់រុស្ស៊ីថាបានប្រើប្រាស់ការផ្គត់ផ្គង់ថាមពលជាអាវុធក្នុងការតបតចំពោះការដាក់ទណ្ឌកម្មរបស់លោកខាងលិចលើទីក្រុងមូស្គូ ចំពោះការឈ្លានពានអ៊ុយក្រែន។ រុស្ស៊ីបានបន្ទោសថា ទណ្ឌកម្មទាំងនោះបានបង្កបញ្ហាចំពោះការផ្គត់ផ្គង់ឧស្ម័ន។
ខណៈមានភាពតានតឹងកាន់តែខ្លាំងឡើង លោក ពូទីន បាននិយាយថា កិច្ចសន្យាអាចនឹងត្រូវលុបចោលក្នុងករណីមានការកំណត់តម្លៃ ហើយបានព្រមានកាត់ផ្តាច់ការផ្គត់ផ្គង់។
ទោះយ៉ាងណា សហភាពអឺរ៉ុបគ្រោងនឹងជំរុញឱ្យមានការកំណត់តម្លៃលើឧស្ម័នរបស់រុស្ស៊ី។
ជាមួយគ្នានេះដែរ រដ្ឋមន្ត្រីថាមពលសហភាពអឺរ៉ុបគ្រោងនឹងបើកកិច្ចប្រជុំបន្ទាន់មួយនៅថ្ងៃសុក្រ ក្នុងសប្តាហ៍នេះផងដែរ។
ប្រធានគណៈកម្មការអឺរ៉ុប លោកស្រី អឺស៊ូឡា វ៉ុនឌែរ ឡេយែន (Ursula von der Leyen) បានប្រាប់អ្នករាយការណ៍ព័ត៌មានថា៖ «យើងនឹងស្នើសុំកំណត់តម្លៃលើឧស្ម័នរបស់រុស្ស៊ី […] យើងត្រូវកាត់បន្ថយប្រាក់ចំណូលរបស់រុស្ស៊ី ដែលលោក ពូទីន ប្រើប្រាស់ដើម្បីឈ្លានពានអ៊ុយក្រែន»។
ប្រភពដែលដឹងអំពីបញ្ហានេះបានប្រាប់ទីភ្នាក់ងារសារព័ត៌មាន Reuters កាលពីថ្ងៃពុធម្សិលមិញថា ប្រទេសហូឡង់ដែលតែងតែជំទាស់នឹងការកំណត់តម្លៃឧស្ម័ន ក៏នឹងគាំទ្រចំពោះការកំណត់តម្លៃឧស្ម័នរបស់រុស្ស៊ីផងដែរ។
ទោះយ៉ាងណា រដ្ឋមន្ត្រីរបស់សាធារណរដ្ឋឆែក (Czech) បាននិយាយថា ការកំណត់តម្លៃឧស្ម័នរបស់រុស្ស៊ីនេះគួរតែដកចេញពីរបៀបវារៈសម្រាប់កិច្ចប្រជុំនៅថ្ងៃសុក្រនេះ។
គួរបញ្ជាក់ថា សាធារណរដ្ឋឆែក កំពុងសម្របសម្រួលការពិភាក្សាក្នុងនាមជាប្រធានប្តូរវេនរបស់សហភាពអឺរ៉ុប។
ថ្លែងនៅក្នុងវេទិកាសេដ្ឋកិច្ចនៅទីក្រុងវ្លាឌីវូស្តុក (Vladivostok) លោក ពូទីន បាននិយាយថា៖ «យើងនឹងមិនផ្គត់ផ្គង់អ្វីទាំងអស់ ប្រសិនបើវាផ្ទុយនឹងផលប្រយោជន៍របស់យើង»។
លោកបន្ថែមថា៖ «យើងនឹងមិនផ្គត់ផ្គង់ឧស្ម័ន ប្រេង ធ្យូងថ្ម។ យើងនឹងមិនផ្គត់ផ្គង់អ្វីទាំងអស់»។
ជាធម្មតា អឺរ៉ុបនាំចូលឧស្ម័នប្រហែល ៤០% និងប្រេងប្រហែល ៣០% ពីរុស្ស៊ី៕