ក្រសួងអប់រំ ផ្អាកដំណើរការគ្រឹះស្ថានសិក្សាទាំងរដ្ឋនិងឯកជនជាបណ្ដោះអាសន្ននៅរាជធានីភ្នំពេញ រយៈពេល៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែវិច្ឆិកា ឆ្នាំ២០២២ ដើម្បីកាត់បន្ថយការកកស្ទះចរាចរណ៍ អំឡុងពេលកិច្ចប្រជុំកំពូលអាស៊ាន។
សេចក្តីជូនដំណឹងរបស់ក្រសួងអប់រំ យុវជន និងកីឡា ចុះថ្ងៃទី១២ ខែកញ្ញា ឆ្នាំ២០២២នេះ បានលើកឡើងថា ដើម្បីកាត់បន្ថយនូវការកកស្ទះចរាចរណ៍ កាត់បន្ថយការរំខានដល់ប្រជាពលរដ្ឋក្នុងរាជធានីភ្នំពេញ ក៏ដូចជាសម្រួលដល់ក្បួនរថយន្តរបស់គណៈប្រតិភូ ក្នុងអំឡុងពេលកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅខែវិច្ឆិកាខាងមុខនេះ ក្រសួងសម្រេចផ្អាកដំណើរការសិក្សានៅគ្រឹះស្ថានសិក្សាសាធារណៈ និងឯកជនគ្រប់កម្រិត ជាបណ្ដោះអាសន្ន នៅរាជធានីភ្នំពេញ ចាប់ពីថ្ងៃទី១០ ដល់ថ្ងៃទី១២ ខែវិច្ឆិកា។
គួរបញ្ជាក់ថា កម្ពុជាក្នុងនាមជាប្រធានអាស៊ានប្តូរវេន នឹងទទួលរៀបចំកិច្ចប្រជុំកំពូលអាស៊ាន លើកទី៤០ និងទី៤១ និងកិច្ចប្រជុំពាក់ព័ន្ធ ចាប់ពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ ៕
