ក្រុមការងារហិរញ្ញវត្ថុ (FATF) ដែលជាអង្គការអន្តររដ្ឋាភិបាល បានដាក់ប្រទេសកម្ពុជាទៅក្នុង «បញ្ជីប្រផេះ» នៃបណ្ដាប្រទេសដែលមិនមានការត្រួតពិនិត្យនិងទប់ស្កាត់ប្រកបដោយប្រសិទ្ធភាពចំពោះការលាងលុយកខ្វក់ និងហិរញ្ញប្បទានភេរវកម្ម ក្នុងឆ្នាំ២០១៧។
ប្រទេសកម្ពុជាត្រូវបានវាយតម្លៃថាបានអនុលោមតាមតែចំណុចខ្លះប៉ុណ្ណោះនៃលក្ខណៈវិនិច្ឆយបច្ចេកទេសចំនួន២០របស់ FATF។ កាលបរិច្ឆេទផុតកំណត់សម្រាប់ប្រទេសកម្ពុជាក្នុងការបង្ហាញពីវឌ្ឍនភាពរបស់ខ្លួន គឺនៅខែក្រោយនេះហើយ [ខែតុលា] ហើយរហូតមកដល់ពេលនេះ ចំណាត់ថ្នាក់របស់ខ្លួនបានធ្លាក់ចុះដល់លេខ៨ហើយ។
ប្រសិនបើពិន្ទុរបស់កម្ពុជានៅខែក្រោយនេះ គឺដូចគ្នានឹងរបាយការណ៍កាលពីខែសីហា ប្រទេសកម្ពុជានឹងនៅតែស្ថិតក្រោមការឃ្លាំមើលយ៉ាងដិតដល់របស់ FATF។
គិតត្រឹមខែសីហា ឆ្នាំ២០២២ ប្រទេសកម្ពុជា និងប្រទេសចំនួន២០ផ្សេងទៀត រួមទាំងមីយ៉ាន់ម៉ា និងហ្វីលីពីន ស្ថិតក្នុងបញ្ជីប្រផេះ ខណៈមានតែប្រទេសអ៊ីរ៉ង់ និងកូរ៉េខាងជើង ប៉ុណ្ណោះ ដែលស្ថិតក្នុងបញ្ជីខ្មៅ។
នៅក្នុងការត្រួតពិនិត្យ កាលពីខែសីហា ឆ្នាំ២០២២នេះ ប្រទេសកម្ពុជាបានស្នើសុំឱ្យពិនិត្យចំនួន១០ចំណុច ហើយក្នុងនោះមាន៥ចំណុចត្រូវបានកំណត់ថាមានអនុលោមភាព ឬមានអនុលោមភាពខ្លាំង។ លក្ខណៈវិនិច្ឆយបច្ចេកទេសចំនួន៥ផ្សេងទៀតដែលត្រូវបានពិនិត្យ ត្រូវបានកំណត់ថានៅតែមានចំណុចត្រូវកែលម្អ។
យោងតាមបាយការណ៍ចុងក្រោយបានឱ្យដឹងថា កម្ពុជានៅតែត្រូវការការកែលម្អបទប្បញ្ញត្តិរបស់ខ្លួន និងការទប់ស្កាត់ការលាងលុយកខ្វក់ក្នុងវិស័យធនាគារ ស្ថាប័នមិនរកប្រាក់ចំណេញ អចលនទ្រព្យសម្ភារមានតម្លៃ និងកាស៊ីណូ។
របាយការណ៍នោះបាននិយាយទៀតថា ប្រទេសកម្ពុជាបានបង្កើតច្បាប់ជាមូលដ្ឋានចំពោះឧស្សាហកម្មទាំងនេះ ប៉ុន្តែនៅតែមានចន្លោះប្រហោងដែលត្រូវដោះស្រាយ ដូចជាការបង្កើនការត្រួតពិនិត្យដោយយកចិត្តទុកដាក់ ការបង្កើនប្រសិទ្ធភាពនៃបទប្បញ្ញត្តិ និងការផាកពិន័យធ្ងន់ជាងមុន។
របាយការណ៍បន្តទៀតថា កម្ពុជាក៏ត្រូវពង្រឹងកិច្ចសហប្រតិបត្តិការជាមួយរដ្ឋាភិបាលបរទេស ដើម្បីស៊ើបអង្កេតករណីលាងលុយកខ្វក់។
អង្គការឃ្លាំមើលអន្តរជាតិ (Global Witness) បានចោទប្រកាន់អស់រយៈពេលជាងមួយទសវត្សរ៍ថា ឥស្សរជនកម្ពុជាគ្រប់គ្រងឧស្សាហកម្មផ្សេងៗគ្នា រាប់ចាប់ពីការកាប់ឈើខុសច្បាប់ និងវិស័យនិស្សារណកម្ម រហូតដល់ឧស្សាហកម្មផ្សេងទៀត។ ថ្មីៗនេះ ការស៊ើបអង្កេតរបស់វិទ្យុអាស៊ីសេរី បានឱ្យដឹងថា ឧក្រិដ្ឋជនជាជនជាតិចិនម្នាក់ដែលស្ថិតក្នុងបញ្ជីតាមដានរបស់ប៉ូលិសអន្តរជាត Interpol មានទំនាក់ទំនងជិតស្និទ្ធនឹងឧកញ៉ា រិទ្ធី សំណាង និងបានបើកអាជីវកម្មរួមគ្នាពាក់ព័ន្ធនឹងការជួញដូរមនុស្ស និងប្រតិបត្តិការឆបោកតាមអ៊ីនធឺណិត។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន និងអគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា លោក រស់ ភីរុណ មិនបានឆ្លើយតបនឹងសំណើសុំការអត្ថាធិប្បាយឡើយ។
បន្ទាប់ពីប្រទេសកម្ពុជាត្រូវបានទម្លាក់មកនៅចំណាត់ថ្នាក់ទាបបំផុត ក្នុងរបាយការណ៍ស្តីពីការជួញដូរមនុស្សរបស់សហរដ្ឋអាមេរិក មន្រ្តីរដ្ឋាភិបាលបានសម្តែងការព្រួយបារម្ភអំពីចំណាត់ថ្នាក់នៅក្នុងបញ្ជីរបស់ FATF ដោយហេតុថា ប្រសិនបើកម្ពុជាធ្លាក់ក្នុងបញ្ជីខ្មៅនៃការលាងលុយកខ្វក់ វាអាចនឹងប៉ះពាល់ដល់លំហូរនៃការផ្ទេរប្រាក់ចូលនិងចេញពីប្រទេសកម្ពុជា៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Anti-Money Laundering Policies Reviewed Ahead of Next Month’s Deadline