ពលរដ្ឋដាំត្រកួននៅតាមបណ្ដោយមហាវិថីសម្ដេចតេជោហ៊ុនសែន (ផ្លូវ៦០ម៉ែត្រ) បានប្រទះឃើញសាកសពមនុស្សម្នាក់នៅក្នុងបឹងកំប្លោក ខណៈសមត្ថកិច្ចសន្និដ្ឋានថា សាកសពនេះគឺត្រូវបានគេយកមកពីម្ដុំទួលទំពូង ដើម្បីយកមកផ្លុងចោលនៅទីនោះ។
នាយនគរបាលប៉ុស្តិ៍ចាក់អង្រែក្រោម ខណ្ឌមានជ័យ លោក ស៊ូ សារុំ បានឱ្យដឹងនៅថ្ងៃទី១៥ ខែកញ្ញា ឆ្នាំ២០២២ ថាសពនេះត្រូវបានគេស្គាល់អត្តសញ្ញាណថាជាជនជាតិចិន ដែលត្រូវបានប្រទះឃើញដោយអ្នកដាំត្រកួន កាលពីថ្ងៃទី១២ ខែកញ្ញា។ ហើយតាមរយៈការស្រាវជ្រាវ សមត្ថកិច្ចបានរកឃើញថា សាកសពនេះទំនងជាត្រូវបាននាំយកពីសង្កាត់ទួលទំពូងទី២ ខណ្ឌចំការមន ដើម្បីយកមកផ្លុងចោលនៅទីតាំងនោះ។
លោកបន្តប្រាប់វីអូឌីយ៉ាងខ្លីថា៖ «ជនជាតិចិនបានយកសពមកចោលនៅទីនេះ»។
ទាក់ទិននឹងករណីនេះ នាយប៉ុស្តិ៍នគរបាលទួលទំពូង២ លោក អ៊ុក សាវឿន ក៏បានបញ្ជាក់ថា សាកសពជនជាតិចិននោះអាចនឹងត្រូវបាននាំចេញពីតំបន់ក្នុងដែនសមត្ថកិច្ចរបស់លោក។
ទោះជាយ៉ាងណា នាយប៉ុស្តិ៍នគរបាលរូបនេះពុំបានផ្តល់ព័ត៌មានលម្អិតបន្ថែមទៀតឡើយ។
មេបញ្ជាការកងរាជអាវុធហត្ថខណ្ឌចំការមន លោក ភួង សុភ័ក្រ្ត បានលើកឡើងថា សមត្ថកិច្ចកាលពីពេលកន្លងទៅ ក៏បានស្រាវជ្រាវករណីយកសាកសពចេញពីតំបន់ទួលទំពូងនេះផងដែរ។
លោកថា៖ «យើងបានធ្វើការស្រាវជ្រាវស្វែងរកសាកសពនេះអស់រយៈពេលប៉ុន្មានថ្ងៃដែរ ដែលយើងទើបតែរកឃើញនៅពេលនេះ»។
យោងតាមបណ្ដាញសារព័ត៌មានក្នុងស្រុក «ព័ត៌មានទាន់ហេតុការណ៍» បានរាយការណ៍ថា សាកសពជនជាតិចិននេះ ដំបូងឡើយ ត្រូវបានគេប្រទះឃើញធ្លាក់ពីលើអាគារខុនដូជាន់ទី៣មួយកន្លែង នៅវេលាម៉ោងប្រមាណ២រំលងអធ្រាត្រ ឈានចូលថ្ងៃទី១១ ខែកញ្ញា ឆ្នាំ២០២២ តាមបណ្ដោយផ្លូវលេខ១៦៧ ដោយបន្ទាប់មក គេក៏ប្រទះឃើញជនជាតិចិនដូចគ្នាដឹកតាមរថយន្ដចេញទៅបាត់ ដោយគេគិតថាដឹកទៅសង្គ្រោះនៅមន្ទីរពេទ្យ។
ទោះជាយ៉ាងណា សន្តិសុខយាមនៅអគារនោះបានឱ្យដឹងនៅថ្ងៃព្រហស្បតិ៍ម្សិលមិញថា ខ្លួនមិនបានដឹងអំពីហេតុការណ៍នេះឡើយ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Dead Body Dumped in Phnom Penh’s Boeng Tompun Lake