កូដករណាហ្គាវើលដ៍ជាច្រើននាក់ បន្តធ្វើកូដកម្មដោយយកកន្ទេលមុងនិងតង់ទៅបោះនៅមុខក្រុមហ៊ុន ដើម្បីសម្រាកនៅទីនោះទាមទារដំណោះស្រាយការងារ ក្រោមការឃ្លាំមើលពីកងកម្លាំងនិងសន្តិសុខរក្សាសណ្ដាប់ធ្នាប់ក្រុងភ្នំពេញជាច្រើនាក់ផងដែរ។
សមាជិកសហជីពម្នាក់ដែលត្រូវក្រុមហ៊ុនណាហ្គាបញ្ឈប់ពីការងារ កញ្ញា វ៉ាន់ រីណា ប្រាប់វីអូឌីនៅថ្ងៃសៅរ៍នេះថា ពួកគាត់ប្រមាណ ១០០នាក់ នៅបន្តនាំគ្នាធ្វើកូដកម្មខាងមុខក្រុមហ៊ុនណាហ្គា ដោយយកចង្ក្រានចានឆ្នាំងទៅចម្អិនអាហារសម្រាប់បរិភោគ ព្រមទាំងមានយកកន្ទេលតង់មកជាមួយផងដែរ។
កញ្ញាបញ្ជាក់ថា នៅរសៀលនាថ្ងៃដដែលនេះ មិនទាន់មានការប៉ះទង្គិចជាមួយកម្លាំងសន្តិសុខការពារឱ្យក្រុមហ៊ុនណាហ្គាវើលដ៍ទេ ដោយក្រុមសន្តិសុខទាំងស្លៀកស៊ីវិល និងឯកសណ្ឋានបាននាំគ្នាតាមឃ្លាំមើលពួកគាត់ បើទោះជាពួកគាត់មិនមានវិវាទជាមួយក៏ដោយ។
កញ្ញាបន្តថា ៖«បោះតង់គម្រោងគេងតែមិនដឹងថា ពួកគេយើងបានគេងឬអត់ទេព្រោះយប់មិញពេលដែលយើងបោះតង់ថាគេងនោះ យើងត្រូវបានក្រុមខាងខណ្ឌចម្ការមន និងខាងសណ្ដាប់ធ្នាប់អីហ្នឹង គាត់ឱ្យយើងរំសាយនៅចន្លោះម៉ោង ៦ កន្លះ ពួកខ្ញុំក៏រំសាយដែរ។ សមត្ថកិច្ចមិនមានជំហរការពារពលរដ្ឋទេ គាត់ការពារថៅកែដែលមានលុយទៅវិញ»។
កញ្ញា វ៉ាន់ រីណា ចាត់ទុកការរារាំងនិងចេញការពារក្រុមហ៊ុនដែលរំលោភច្បាប់ ហើយមកធ្វើទុក្ខបុកម្នេញលើពួកគាត់ ដែលគ្រាន់តែទាមទារដំណោះស្រាយ និងឱ្យថៅកែគោរពច្បាប់ថា ជារឿងអយុត្តិធម៌។
កញ្ញាថា៖«ពួកយើងរងភាពអយុត្តិធម៌ពីថៅកែហើយ យើងក៏រងភាពអយុត្តិធម៌ពីគ្រប់ស្ថាប័នពាក់ព័ន្ធសូម្បីតែសមត្ថកិច្ចដែលមានតួនាទីការពារសន្តិសុខជូនប្រជាពលរដ្ឋបែរជាគាត់ថាយើងធ្វើនឹងខុសច្បាប់។ ខ្ញុំមិនដឹងថា គាត់យកច្បាប់អីមកនិយាយទេ នៅពេលដែលគាត់មានតួនាទីជាអ្នកអនុវត្តហើយមកចោទពលរដ្ឋខ្លួនឯង មិនការពារហើយ គំរាមទៀត»។
ការពីម្សិលមិញ សមាជិកសហជីពក្រុមហ៊ុនណាហ្គាវើលដ៍ម្នាក់បាក់ធ្មេញដួលសន្លប់ និងមួយចំនួនទៀតរងរបួស ក្រោយប៉ះទង្គិចជាមួយកម្លាំងសន្តិសុខរបស់ក្រុមហ៊ុនណាហ្គាវើលដ៍ អំឡុងពេលប្រមូលផ្ដុំគ្នាតវ៉ានៅពីមុខក្រុមហ៊ុន ខណៈកូដករមួយរូបត្រូវក្រុមអាជ្ញាធរដេញស្ទាក់រារាំងមិនឱ្យចូលទៅកន្លែងតវ៉ា។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
យ៉ាងណា បុគ្គលិកដែលចេញធ្វើកូដកម្មជិត៩ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕