យ៉ាងហោចណាស់ ពលរដ្ឋជាង១០គ្រួសារ ត្រូវបានជម្លៀសទៅទីទួលសុវត្ថិភាព និងពលរដ្ឋជាង១៥០គ្រួសារទៀត ព្រមទាំងដំណាំស្រូវមួយចំនួន បានរងផលប៉ះពាល់ដោយសារជំនន់ទឹកភ្លៀងនៅឃុំចំនួន៤ ក្នុងស្រុកមង្គលបូរី ខេត្តបន្ទាយមានជ័យ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី មានប្រសាសន៍នៅថ្ងៃទី២០ ខែកញ្ញា ឆ្នាំ២០២២នេះថា បើតាមព័ត៌មានបឋម ឃុំចំនួន៤ដែលរងផលប៉ះពាល់ដោយសារជំនន់ទឹកភ្លៀងក្នុងខេត្តបន្ទាយមានជ័យនោះ រួមមាន ឃុំសឿ ឃុំចំណោម ឃុំរហាត់ និងឃុំបត់ត្រង់។ លោកបន្តថា គិតត្រឹមថ្ងៃម្សិលមិញ ក្រុមការងារជំនាញដែលសហការជាមួយអាជ្ញាធរមូលដ្ឋាន បានចុះដល់កន្លែងកើតហេតុ និងបានជួយសង្គ្រោះប្រជាពលរដ្ឋដែលរងគ្រោះចំនួន១៣គ្រួសារ ក្នុងចំណោម១៥៧គ្រួសារ ទៅកាន់ទីទួលសុវត្ថិភាព ខណៈដំណាំស្រូវបានរងប៉ះពាល់ជាង២ ៥៦៣ហិកតា ។
មន្ត្រីជាន់ខ្ពស់រូបនោះបញ្ជាក់ថា គិតត្រឹមថ្ងៃនេះ ប្រជាពលរដ្ឋចំនួន១៣គ្រួសារនោះបានត្រលប់ទៅស្នាក់នៅផ្ទះរបស់ខ្លួនវិញហើយ ដោយសារទឹកជំនន់មិនទាន់ហក់ឡើងដល់ចំណុចប្រកាសអាសន្ននៅឡើយ។
ទោះជាបែបនេះក្តី លោក សុទ្ធ គឹមកុលមុនី អំពាវនាវទៅប្រជាពលរដ្ឋ ក្រុមគ្រូពេទ្យ និងកងកម្លាំងចម្រុះនៅតាមមូលដ្ឋាន ត្រូវសហការគ្នា ដើម្បីទប់ស្កាត់កុំឱ្យប៉ះពាល់ធ្ងន់ធ្ងរដល់សុខភាព ដំណាំស្រូវ ទ្រព្យសម្បត្តិ និងអាយុជីវិតប្រជាពលរដ្ឋ ជាពិសេសក្មេងៗនៅតំបន់នោះផងដែរ។
អ្នកនាំពាក្យ និងជាអភិបាលរងខេត្តបន្ទាយមានជ័យ លោក លី សារី សុំមិនធ្វើការបកស្រាយជុំវិញបញ្ហានេះ ដោយលោកជាប់រវល់ប្រជុំ។ ចំណែក អភិបាលស្រុកមណ្ឌលបូរី លោក រ័ត្ន ដាស៊ីណង់ មិនអាចទាក់ទងសុំការបំភ្លឺបានទេ នៅព្រឹកថ្ងៃនេះ។
កាលពីថ្ងៃទី១៨ ខែកញ្ញា ឆ្នាំ២០២២នេះ អភិបាលស្រុកមង្គលបូរី លោក រ័ត្ន ដាស៊ីណង់ ធ្លាប់បានប្រាប់កាសែតក្នុងស្រុកថា នៅស្រុកមង្គលបូរី រងផលប៉ះពាល់ដោយទឹកជំនន់មានចំនួន១៩ភូមិ ប៉ះពាល់ពលរដ្ឋចំនួន១៥៧គ្រួសារ និងមានពលរដ្ឋម្នាក់បានស្លាប់ដោយសារការលង់ទឹក ខណៈពលរដ្ឋ១៣គ្រួសារទៀតត្រូវបានជម្លៀសរកទីទួលសុវត្ថិភាព។
លោកបញ្ជាក់ថា ចំពោះស្ថានភាពទឹកនៅស្រុកមង្គលបូរីវិញ នៅតែបន្តហក់ឡើងខ្លាំងដោយទឹកជំនន់ធ្លាក់ពីស្រុកបវេល ខេត្តបាត់ដំបង ហូរផ្នែកខាងក្រោម ប៉ះពាល់ប្រជាពលរដ្ឋរស់នៅតាមដងស្ទឹង មានឃុំសឿ ឃុំចំណោម ឃុំរហាត់ទឹក និងឃុំបត់ត្រង់ ដែលរងផលប៉ះពាល់ធ្ងន់ធ្ងរ ខណៈពលរដ្ឋរងគ្រោះត្រូវបានជម្លៀសទៅរកទីទួលសុវត្ថិភាពថែមទៀតផង៕