ក្រុមអ្នកជំនាញអាជ្ញាធរជាតិអប្សរា បានយកផ្ទៃមុខអប្សរាដែលរបេះជ្រុះធ្លាក់ពីរូបរាង នៅប្រាសាទតាព្រហ្ម ទៅបិទភ្ជាប់ឡើងវិញ ក្រោយស្ថានភាពថ្មមានសភាពស្ងួត។
យោងតាមទំព័រហ្វេសប៊ុករបស់អាជ្ញាធរជាតិអប្សរា បានឱ្យដឹងនៅរសៀលថ្ងៃសុក្រនេះថា ផ្ទៃមុខអប្សរានៅចំណុចដើមត្រាង នៃបរិវេណប្រាសាទតាព្រហ្ម បានរបេះធ្លាក់នៅព្រឹកថ្ងៃទី៣០ ខែកញ្ញា ដោយមិនមានការបែកបាក់អ្វីទេ ដោយសារធ្លាក់ទើរនឹងឫសឈើ និងត្រូវបានក្រុមភ្នាក់ងារទេសចរណ៍របស់អាជ្ញាធរជាតិអប្សរា រាយការណ៍ទៅក្រុមជំនាញ និងបាននាំទៅរក្សាទុក។
តែយ៉ាងណា ប្រភពដដែលបន្តថា នៅរសៀលថ្ងៃសុក្រនេះ ក្រុមអ្នកជំនាញអាជ្ញាធរជាតិអប្សរា និងស្ថាប័នឥណ្ឌា ដែលសហប្រតិបត្តិការជួសជុលប្រាសាទតាព្រហ្ម បានយកផ្ទៃមុខអប្សរាដែលរបេះជ្រុះធ្លាក់ពីរូបរាង មកបិទភ្ជាប់ឡើងវិញ ក្រោយស្ថានភាពថ្មមានសភាពស្ងួត។
លោក ស្រ៊ាង គឹមស្រ៊ុន សាស្ត្រាចារ្យភូគព្ភសាស្ត្រ នៃវិទ្យាស្ថានគុកោសល្យរាជធានីភ្នំពេញ មានប្រសាសន៍ថា រូបចម្លាក់នៅប្រាសាទតាព្រហ្ម កម្រនឹងបែកបាក់ណាស់ ទាល់តែមានអ្វីមួយ ឬមនុស្សទៅប៉ះ។ ទោះយ៉ាងណា លោកថា ដោយសារអាយុកាល អាកាសធាតុ ទឹក ឬខ្យល់ ជួនកាលអាចបណ្ដាលឱ្យមានការរបេះធ្លាក់។
បន្ទាប់ពីពិនិត្យមើលផ្ទៃមុខអប្សរាដែលរបេះជ្រុះនោះ លោក ស្រ៊ាង គឹមស្រ៊ុន បាននិយាយថា ឫសឈើដែលដុះចូលផ្ទៃមុខអប្សរា ជាហេតុធ្វើឱ្យរបេះធ្លាក់។ លោកបានបន្ថែមថា មន្ត្រីជំនាញអាចបិទភ្ជិតផ្ទៃមុខអប្សរាដោយប្រើស៊ីម៉ងត៍បាន៕