សង្រ្គាមរវាងរុស្ស៊ីនិងអ៊ុយក្រែន និងការកើនឡើងនៃអតិផរណា បានធ្វើឱ្យកុមារប្រហែល៤លាននាក់នៅអឺរ៉ុបខាងកើត និងអាស៊ីកណ្ដាល រស់នៅក្នុងភាពក្រីក្រ។ នេះបើយោងតាមទីភ្នាក់ងារអង្គការសហប្រជាជាតិទទួលបន្ទុកកិច្ចការកុមារ ដែលត្រូវបានទីភ្នាក់ងារសារព័ត៌មាន Al Jazeera យកមកចុះផ្សាយនៅថ្ងៃទី១៧ ខែតុលា ឆ្នាំ២០២២នេះ។
អង្គការយូនីសេហ្វ (UNICEF) បានលើកឡើងនៅថ្ងៃចន្ទនេះថា៖ «កុមារកំពុងតែទទួលបន្ទុកធ្ងន់បំផុតនៃវិបត្តិសេដ្ឋកិច្ចដែលបណ្ដាលមកពីសង្គ្រាមនៅអ៊ុយក្រែន»។
អង្គការនេះបន្តទៀតថា៖ «ជម្លោះ និងការកើនឡើងនៃអតិផរណា បានធ្វើឱ្យកុមារ៤លាននាក់នៅអឺរ៉ុបខាងកើត និងអាស៊ីកណ្ដាល រស់នៅក្នុងភាពក្រីក្រ ដែលកើនឡើង១៩ភាគរយចាប់តាំងពីឆ្នាំ២០២១»។
អង្គការនេះបានទាញការសន្និដ្ឋានរបស់ខ្លួនពីការសិក្សាទិន្នន័យពី ២២ប្រទេស។
កុមារនៅក្នុងប្រទេសរុស្ស៊ី និងអ៊ុយក្រែន បានរងផលប៉ះពាល់ខ្លាំងបំផុតចាប់តាំងពីទីក្រុងមូស្គូបើកការវាយប្រហារប្រទេសជិតខាងមួយនេះ កាលពីខែកុម្ភៈ ឆ្នាំ២០២២។
អង្គការ UNICEF បានរកឃើញថា៖ «ប្រទេសរុស្ស៊ីមានកុមារជិត ៣/៤ [នៃកុមារ៤លាននាក់ដែលរស់នៅក្នុងភាពក្រីក្រ] ដោយសារសង្រ្គាមនៅអ៊ុយក្រែន។ ហើយបច្ចុប្បន្ននេះ មានកុមារបន្ថែមចំនួន២,៨លាននាក់រស់នៅក្នុងគ្រួសារដែលមានជីវភាពស្ថិតនៅក្រោមបន្ទាត់ភាព
ក្រីក្រ»។
អង្គការនេះបន្ថែមថា ប្រទេសអ៊ុយក្រែនមានកុមារកន្លះលាននាក់រស់នៅក្នុងភាពក្រីក្រ ខណៈប្រទេសរូម៉ានីមាន១១០ ០០០នាក់។
លោកស្រី អាហ្វសាន ខាន់ (Afshan Khan) នាយកប្រចាំតំបន់របស់អង្គការ UNICEF ប្រចាំនៅអឺរ៉ុប និងអាស៊ីកណ្តាល បាននិយាយថា៖ «កុមារទូទាំងតំបន់កំពុងត្រូវបានបំផ្លិចបំផ្លាញដោយសង្រ្គាមនេះ [អ៊ុយក្រែន និងរុស្ស៊ី]»។
លោកស្រីបន្ថែមថា៖ «ប្រសិនបើយើងមិនគាំទ្រកុមារនិងគ្រួសារទាំងនេះនៅពេលនេះទេ ការកើនឡើងនៃភាពក្រីក្ររបស់កុមារស្ទើរតែនឹងបណ្ដាលឱ្យបាត់បង់ជីវិត បាត់បង់ការសិក្សា និងបាត់បង់អនាគត»។
ទីភ្នាក់ងារនេះបានលើកឡើងថា គ្រួសារកាន់តែក្រីក្រកាន់តែមានការលំបាកក្នុងការចំណាយលើអាហារនិងប្រេងឥន្ធនៈ ដែលធ្វើឱ្យមិនមានប្រាក់គ្រប់គ្រាន់សម្រាប់ការថែទាំសុខភាព និងការអប់រំរបស់កុមារ។
ទីភ្នាក់ងារនេះបន្ថែមថា ពួកគេក៏មានហានិភ័យនៃអំពើហិង្សា ការកេងប្រវ័ញ្ច និងការរំលោភបំពានច្រើនផងដែរ។
អង្គការនេះបានអំពាវនាវឱ្យចាត់វិធានការដើម្បីដោះស្រាយបញ្ហានេះ រួមទាំងការផ្តល់អត្ថប្រយោជន៍ជាសាច់ប្រាក់ជាសកលសម្រាប់កុមារ និងការការពារការចំណាយសង្គម ជាពិសេសសម្រាប់កុមារ និងគ្រួសារដែលងាយរងគ្រោះបំផុត។
លោកស្រី Afshan Khan បានមានប្រសាសន៍ថា៖ «វិធានការរឹតត្បិតនឹងប៉ះពាល់ដល់កុមារភាគច្រើន ដែលធ្វើឱ្យកុមារកាន់តែធ្លាក់ទៅក្នុងភាពក្រីក្រ និងធ្វើឱ្យគ្រួសារដែលជួបការលំបាករួចទៅហើយកាន់តែមានភាពលំបាកថែមទៀត»។
លោកស្រីបន្ថែមថា៖ «យើងត្រូវការពារ និងពង្រីកកិច្ចគាំពារសង្គមសម្រាប់គ្រួសារដែលងាយរងគ្រោះ មុនពេលស្ថានភាពកាន់តែអាក្រក់ទៅៗ»៕