ប្រជាពលរដ្ឋចំនួន១០០គ្រួសារ នៅឃុំចំនួន២ នៃស្រុកមេមត់ ខេត្តត្បូងឃ្មុំ បានស្នើសុំបណ្ណកម្មសិទ្ធិដីធ្លីពីអាជ្ញាធរខេត្ត ក្រោយពីដីនេះបានកាត់ឆ្វៀលចេញពីគម្រោងដីក្រុមហ៊ុនឯកជនអស់រយៈពេល៦ឆ្នាំមកហើយ ប៉ុន្តែពលរដ្ឋនៅមិនទាន់ទទួលបានបណ្ណកម្មសិទ្ធិស្របច្បាប់នៅឡើយ។
កាលពីថ្ងៃទី១៩ ខែតុលា ឆ្នាំ២០២២ ពលរដ្ឋជាង២០០នាក់ តំណាងឱ្យពលរដ្ឋ១០០គ្រួសារ មកពីឃុំអន្លូង និងឃុំជាំក្រវៀន ស្រុកមេមត់ បាននាំគ្នាប្រមូលផ្តុំឈរលើកបដា និងដាក់ញត្តិនៅរដ្ឋបាលខេត្តត្បូងឃ្មុំ ដើម្បីសុំឱ្យរដ្ឋបាលខេត្តនេះដោះស្រាយដីធ្លី និងពន្លឿនការចេញបណ្ណកម្មសិទ្ធិដីធ្លីជូនពួកគេ។
លោក ផុន សុផល អះអាងថាជាពលរដ្ឋរស់នៅឃុំជាំក្រវៀន ប្រាប់វីអូឌីនៅថ្ងៃព្រហស្បតិ៍នេះថា ពលរដ្ឋ៦៤០គ្រួសារ ដែលមានដីសរុប១ ៩៦៣ហិកតា មានជម្លោះជាមួយក្រុមហ៊ុន ម៉ែន សារ៉ុន ចាប់តាំងពីឆ្នាំ២០១១មក ខណៈពលរដ្ឋបានកាន់កាប់ និងអាស្រ័យផលលើដីនោះតាំងពីឆ្នាំ២០០៦ជាបន្តបន្ទាប់ ហើយក្រោយពីមានជម្លោះនៅឆ្នាំ២០១៦ រដ្ឋាភិបាលចេញអនុក្រឹត្យមួយកាត់ឆ្វៀលដីនោះជូនពលរដ្ឋវិញ។
ពលរដ្ឋរូបនេះឱ្យដឹងថា មានពលរដ្ឋ១០០គ្រួសារប៉ុណ្ណោះកំពុងដាក់សំណើទៅអាជ្ញាធរ ដើម្បីស្នើសុំពន្លឿនការចេញបណ្ណសិទ្ធិលើដីសរុប៣៩៦,៩ហិកតា ខណៈពលរដ្ឋផ្សេងទៀតមិនបានចូលរួមស្នើសុំបណ្ណកម្មសិទ្ធិនេះទេ។
លោក ផុន សុផល បន្តថា ពួកគាត់សុំឱ្យអាជ្ញាធរពន្លឿនការចេញបណ្ណកម្មសិទ្ធិ ដោយសារបារម្ភពីសុវត្ថិភាពដីធ្លី ក្រោយឮថា តំបន់នោះ រដ្ឋាភិបាលគ្រោងទៅអភិវឌ្ឍ និងមានជនមួយចំនួនអះអាងថាដីតំបន់នោះជាដីរបស់ខ្លួន។
លោកបន្ថែមថា៖ «នៅពេលថ្មីៗនេះ ក៏មានខាងទាហានចុះវាស់វែងបាញ់ថ្នាំក្រហម ដោយអ្នកខ្លះថាធ្វើផ្លូវ អ្នកខ្លះថារាវមីន ធ្វើឱ្យពលរដ្ឋមានការព្រួយបារម្ភពីផលប៉ះពាល់ដីធ្លីរបស់ពួកគាត់។ ហើយមួយទៀត លេចឮថាតំបន់មួយទៀត គេទុកធ្វើបន្ទាយទាហាន និងមួយទៀត ដីពួកយើងហ្នឹង វានៅជិតតំបន់ដីដែលរដ្ឋាភិបាលប្រកាសបង្កកសម្រាប់តំបន់សេដ្ឋកិច្ចពិសេស។ អ៊ីចឹងយើងដឹងស្រាប់ហើយ កន្លែងណាឱ្យតែមានការអភិវឌ្ឍអ៊ីចឹង វាតែងតែមានមានជម្លោះដីធ្លីកើតឡើង។ អ៊ីចឹងពលរដ្ឋគាត់ចេះតែបារម្ភ អ៊ីចឹងបានជាពួកយើងស្នើសុំពន្លឿនចេញប្លង់កម្មសិទ្ធិ ដើម្បីបញ្ចប់ជម្លោះ និងជាភស្តុតាងមួយសម្រាប់ពួកគាត់នៅពេលដែលមានបញ្ហា»។
ពលរដ្ឋម្នាក់ទៀត លោក ប៊ុន ចែម ឱ្យដឹងថា គ្រួសារលោកមានដី៦ហិកតា បានកាន់កាប់និងអាស្រ័យផលតាំងពីឆ្នាំ២០១១ ដែលបច្ចុប្បន្នពោរពេញដោយដំណាំស្វាយចន្ទី ប៉ុន្តែដីនេះ អាជ្ញាធរពាក់ព័ន្ធពុំទាន់បានចេញបណ្ណកម្មសិទ្ធិជូននៅឡើយទេ។ ពលរដ្ឋរូបនេះបន្តថា លោកកំពុងបារម្ភពីការរឹបអូស និងការកើតមានជម្លោះផ្សេងៗ ខណៈអាជ្ញាធរថា ដីតំបន់នោះកំពុងមានជម្លោះ មិនអាចចេញបណ្ណកម្មសិទ្ធិបានឡើយ។
លោកបន្ថែមថា៖ «ដីនេះ ពីដំបូងឡើយ ខ្ញុំដាំដំឡូងមី ដាំស្រូវ ប៉ុន្តែឥលូវនេះ ដាំចន្ទី ធំៗអស់ហើយ បាន៧ឆ្នាំហើយ។ ខ្ញុំបារម្ភថា ខ្លាចថ្ងៃមុខទៅ គេមកឈូសឆាយយកអស់ ព្រោះលេចឮដំណឹងថា គេបម្រុងយកកន្លែងហ្នឹងធ្វើបន្ទាយទាហាន។ ហើយបើយើងមានបណ្ណកម្មសិទ្ធិ វាស្រួលដែរ យើងចង់លក់ដូរអី ក៏វាស្រួលដែរ»។
ក្នុងញត្តិដាក់ទៅរដ្ឋបាលខេត្តត្បូងឃ្មុំ បានឱ្យដឹងថា កន្លងមក អាជ្ញាធរពាក់ព័ន្ធបានចុះវាស់វែង និងកំណត់អត្តសញ្ញាណម្ចាស់ដីជាច្រើនលើកច្រើនសាហើយ ប៉ុន្តែអាជ្ញាធរទាំងនោះមិនបានចេញបណ្ណកម្មសិទ្ធិជូនពលរដ្ឋឡើយ ក្រោមហេតុផលថា ដីនោះកំពុងមានជម្លោះ។
ញត្តិដដែលបន្តថា កាលពីខែកញ្ញា ឆ្នាំ២០២២ អ្នកភូមិបានដាក់សំណើសុំឱ្យរដ្ឋបាលស្រុកមេមត់ជួយដោះស្រាយករណីនេះដែរ ប៉ុន្តែអភិបាលស្រុកបដិសេធដោះស្រាយឱ្យពលរដ្ឋ។
ប្រធានរដ្ឋបាលខេត្តត្បូងឃ្មុំ លោក សេង ជ័យវុឌ្ឍ មានប្រសាសន៍ថា រដ្ឋបាលខេត្តបានទទួលញត្តិ និងសំណូមពររបស់ប្រជាពលរដ្ឋហើយ ប៉ុន្តែលោកថា ដីតំបន់នោះមួយចំនួន គឺរដ្ឋាភិបាលត្រូវការសម្រាប់អភិវឌ្ឍ ដោយមិនអាចចេញបណ្ណកម្មសិទ្ធិ ឬឱ្យពលរដ្ឋអភិវឌ្ឍនៅនឹងកន្លែងបានឡើយ។
លោកបន្ថែមថា៖ «ស.ជ.ណ បានលើកឡើងហើយថា ពួកគាត់ត្រូវតែរើចេញ! មាន៣ទីតាំងដែលគាត់អាចជ្រើសរើស។ ហើយពួកគាត់សុំនៅទីតាំងដដែល ហើយទីតាំងដដែល យើងឱ្យម៉េចកើត!»
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ដែលឃ្លាំមើលរឿងនេះ បានទទូចដល់អាជ្ញាធរពាក់ព័ន្ធនៅខេត្តត្បូងឃ្មុំ ចុះស្រាវជ្រាវដោះស្រាយ និងពន្លឿនការចេញបណ្ណកម្មសិទ្ធិដីធ្លីជូនប្រជាពលរដ្ឋ ដើម្បីធានាពីសុវត្ថិភាពនៃការកាន់កាប់ដីធ្លីរបស់ពួកគាត់។
មន្ត្រីសង្គមស៊ីវិលរូបនេះបន្តថា ការពន្យារពេលមិនដោះស្រាយ និងចេញបណ្ណកម្មសិទ្ធិជូនពលរដ្ឋនេះ បានធ្វើឱ្យពលរដ្ឋទាំងនោះគ្មានដីធ្លីគ្រប់គ្រាន់សម្រាប់បង្កបង្កើនផល ហើយបានធ្វើឱ្យពួកគេបារម្ភ និងបង្កផលប៉ះពាល់ដល់ជីវភាពគ្រួសារពលរដ្ឋទាំងនោះផងដែរ។
លោកបន្ថែមថា៖ «ប្រសិនជានៅតែបន្តអូសបន្លាយ មិនចេញបណ្ណកម្មសិទ្ធិជូនពួកគាត់ទៀត វានឹងបង្កើនភាពព្រួយបារម្ភ និងភាពភ័យខ្លាចរបស់ប្រជាពលរដ្ឋកាន់តែកើនឡើង។ ហើយវាបង្ហាញពីហានិភ័យ ឬអសុវត្ថិភាពនៃការគ្រប់គ្រង ការកាន់កាប់ដីធ្លីរបស់ប្រជាពលរដ្ឋដែលកំពុងប្រើប្រាស់ជាក់ស្តែងផងដែរ។ អ៊ីចឹង ខ្ញុំស្នើដល់អាជ្ញាធរពាក់ព័ន្ធចុះដោះស្រាយជូនប្រជាពលរដ្ឋនេះ គួរតែត្រូវបានពន្លឿន ហើយចាត់ជាអាទិភាពផងដែរ ព្រោះថាដីធ្លីគឺជាអាយុជីវិតរបស់ប្រជាពលរដ្ឋនៅជនបទ»៕