លោកនាយករដ្ឋមន្រ្តី ហ៊ុន សែន នៅថ្ងៃសុក្រនេះ បានអំពាវនាវឱ្យមនុស្សមួយចំនួនដែលបន្តគាំទ្រលោក សម រង្ស៊ី ហើយចង់រួចខ្លួនពីបម្រាមតុលាការ អាចផ្ដាច់ខ្លួនពីពេលនេះបាន ដោយលោកធានាក្នុងការផ្ដល់ជូននូវសេរីភាព តាមរយៈការស្នើសុំព្រះរាជទានលើកលែងទោសពីព្រះមហាក្សត្រ ប៉ុន្តែលោកថា ការដើរចេញពីស្ថាបនិកមេបក្សជំទាស់នេះត្រូវធ្វើដោយមានភាពស្មោះត្រង់ជាមួយគ្នា។
ការថ្លែងដូច្នេះរបស់លោកនាយករដ្ឋមន្រ្តី ហ៊ុន សែន ធ្វើឡើងក្នុងពេលដែលលោកចុះជួបពលរដ្ឋនៅតំបន់អភិវឌ្ឍន៍រុនតាឯក ក្នុងស្រុកបន្ទាយស្រី ខេត្តសៀមរាប នៅថ្ងៃទី២១ ខែតុលានេះ។
ប្រធានគណបក្សប្រជាជនកម្ពុជារូបនេះបានព្រមានជាថ្មីទៀតថា ចំពោះមន្រ្តីបក្សជំទាស់ទាំងអស់ គឺមានតែលោក សម រង្ស៊ី ម្នាក់ទេដែលជាសត្រូវពិតរបស់លោក។ ដោយឡែក មនុស្សដទៃផ្សេងទៀត លោកថា គឺមិនមានបញ្ហាអ្វីដែលត្រូវចោទឡើយ ប៉ុន្តែប្រសិនបើអ្នកដែលនៅក្បែរលោក សម រង្ស៊ី ចង់មានសេរីភាព និងផុតពីបម្រាមតុលាការ ត្រូវផ្តាច់ខ្លួនចេញពីលោក សម រង្ស៊ី ចាប់ពីពេលនេះទៅ នោះពួកគេនឹងទទួលបានការលើកលែងទោស តាមរយៈសំណើរបស់នាយករដ្ឋមន្រ្តី ថ្វាយព្រះមហាក្សត្រ ដើម្បីសុំព្រះរាជទានលើកលែងទោស។
លោកបន្តថា៖ «បើយើងមិនកម្ចាត់អាមួយហ្នឹង ទើបវាចម្លែក! ខ្ញុំកម្ចាត់តែអាមួយហ្នឹងទេ ខ្ញុំអត់កម្ចាត់អ្នកណាផ្សេងទេ។ អ៊ីចឹងអ្នកដទៃបំបែកខ្លួនចេញមក ខ្ញុំអាចនឹងពិនិត្យលើកលែងទោសឱ្យអ្នកឯង ប៉ុន្តែឱ្យបែកចេញពីអាមួយហ្នឹង។ សូមពិនិត្យទៅ ព្រោះខ្ញុំមានអំណាច ដើម្បីនឹងចុះហត្ថលេខាស្នើសុំព្រះមហាក្សត្រលើកលែងទោស ក៏ប៉ុន្តែក្នុងលក្ខខណ្ឌដែលអ្នកឯងបំបែកចេញពីអាមួយហ្នឹង។ ខ្ញុំប្រកាសគោលនយោបាយរបស់ខ្ញុំ»។
ក្រៅពីការអំពាវនាវនេះ លោក ហ៊ុន សែន ក៏បានព្រមានប្តឹងទៅតុលាការ ចំពោះគណបក្សនយោបាយណាដែលមានចំណងទាក់ទងជាមួយលោក សម រង្ស៊ី ដើម្បីរំលាយចេញពីសង្វៀននយោបាយបន្តទៀត ដូចដែលធ្លាប់បានធ្វើរួចហើយចំពោះគណបក្សសង្រ្គោះជាតិ។
បើតាមលោកនាយករដ្ឋមន្រ្តី នៅចំពោះមុខនេះ លោកក្តាប់ព័ត៌មានបានថាមានបក្សនយោបាយមួយ ដែលលោកមិនបានបញ្ជាក់ចំឈ្មោះ ថាកំពុងមានទំនាក់ទំនងជាមួយនឹងលោក សម រង្ស៊ី ហើយលោកក៏ព្រមានដែរថា បក្សនយោបាយនោះត្រូវមានការប្រុងប្រយ័ត្នខ្លួន បើមិនចង់មានវាសនាដូចគណបក្សសង្រ្គោះជាតិ។
ឆ្លើយតបរឿងនេះ លោក ម៉ែន សុថាវរិន្រ្ទ មនុស្សដែលស្និទ្ធនឹងលោក សម រង្ស៊ី អះអាងថា នៅចំពោះមុខនេះ សហស្ថាបនិកគណបក្សសង្រ្គោះជាតិ មិនមានទំនាក់ទំនងជាមួយបក្សនយោបាយណាមួយនៅក្នុងប្រទេសកម្ពុជាទេ រួមទាំងគណបក្សភ្លើងទៀន ដែលលោកជាស្ថាបនិកនៃគណបក្សនេះផង។
ប៉ុន្តែអតីតអ្នកតំណាងរាស្រ្តរូបនេះលើកឡើងជាចម្ងល់វិញថា៖ «មានគណបក្សប្រជាជន ហើយជាជំនិតជិតលោក ហ៊ុន សែន ទៀត ទាក់ទងមកលោក សម រង្ស៊ី អាហ្នឹងម៉េចដែរឥលូវនេះហ្នឹង? ខ្ញុំមានភស្តុតាងទៀត ឥលូវរំលាយគណបក្សប្រជាជនកម្ពុជាវិញហ្អី? ឬម៉េច? មានអ្នកជិតដិតលោក ហ៊ុន សែន បំផុត ទាក់ទងមកលោក សម រង្ស៊ី មានសំឡេង និងមានទាំងសាក្សីទៀត។ ប៉ុន្តែបើអ៊ីចឹងអាហ្នឹងត្រូវរំលាយគណបក្សប្រជាជនហើយ បើអ៊ីចឹងនោះ»។
បើតាមលោក ម៉ែន សុថាវរិន្រ្ទ មកដល់ពេលនេះ លោកនៅមិនទាន់ដឹងថាតើជំហរអ្នកនយោបាយផ្សេងទៀតដែលធ្លាប់បម្រើនយោបាយជាមួយលោក សម រង្ស៊ី នោះ ពួកគេសម្រេចចិត្តបែបណានៅឡើយទេ។ ប៉ុន្តែលោកមានជំនឿដោយមុតមាំថា អ្នកដែលមានឆន្ទៈនយោបាយខាងប្រជាធិបតេយ្យ ទំនងជាមិនចាកចេញតាមការអំពាវនាវរបស់លោក ហ៊ុន សែន នេះទេ។
លោកបន្តថា៖ «ខ្ញុំមិនជឿថាមានអ្នកចុះចូលទេ ពីព្រោះសកម្មជនម្នាក់ៗមានមនសិការជាតិរបស់គេ។ ហើយគេមើលឃើញច្បាស់ណាស់ពីទង្វើរបស់លោក ហ៊ុន សែន»។
មួយរយៈពេលចុងក្រោយនេះ គេសង្កេតឃើញមានអតីតមន្រ្តីគណបក្សសង្រ្គោះជាតិដែលត្រូវបានតុលាការរំលាយមួយចំនួន ដែលទៅបង្កើតបក្សនយោបាយថ្មី រួមមាន លោក ជីវ កក្តា, លោក កង គឹមហាក់ និងលោក ខឺយ ស៊ីនឿន ជាដើម បានចុះចូលជាមួយនឹងគណបក្សប្រជាជនកម្ពុជា។ ជាថ្នូរនឹងការផ្ដាច់ខ្លួននេះ ពួកគេទទួលបានងារជាឯកឧត្តម មានឋានៈស្មើរដ្ឋមន្រ្តី និងអនុរដ្ឋលេខាធិការ។
ដោយឡែក កាលពីថ្ងៃទី២៥ ខែកក្កដា ឆ្នាំ២០២២ អតីតតំណាងរាស្រ្តគណបក្សជំទាស់ចំនួន៣រូបដែលកំពុងរស់នៅដោយនិរទេសខ្លួននៅក្រៅប្រទេស ដូចជា លោក ហេង ដាណារ៉ូ, លោក គង់ សភា និង អ៊ូ ច័ន្ទឬទ្ធិ បានស្នើសុំលោក ហ៊ុន សែន ជួយអន្តរាគមន៍ដើម្បីបានលើកលែងទោស។ ក៏ប៉ុន្តែលិខិតស្នើសុំរបស់អ្នកទាំង៣រូបនេះមិនទាន់ឃើញមានការឆ្លើយតបបែបណាពីលោកនាយករដ្ឋមន្រ្តីនៅឡើយទេ គិតមកដល់ពេលនេះ។
សម្រាប់លោក សេក សុជាតិ ស្ថាបនិកអង្គការអភិវឌ្ឍន៍ផ្នត់គំនិត ទទួលស្គាល់ថា អ្វីដែលលោក ហ៊ុន សែន អារកាត់ហើយនេះ ប្រាកដណាស់ លោកនឹងមិនបោះបង់គោលជំហររបស់លោកទេ ក្នុងការឈានទៅកម្ចាត់គូប្រកួតរបស់ខ្លួន។
លោកបន្តថា៖ «ទម្លាប់នៃការធ្វើនយោបាយរបស់លោកនាយករដ្ឋមន្រ្តី គឺគាត់នឹងមិនដកថយ ហើយនឹងធ្វើអ្វីៗសព្វបែបយ៉ាង ដើម្បីរក្សានូវសិទ្ធិនិងអំណាចរបស់គណបក្សគាត់។ ហើយទាំងអស់នេះ ខ្ញុំជឿជាក់ថា ប្រសិនជាមានព្រឹត្តិការណ៍ណាមួយកើតឡើង គឺលោកនាយករដ្ឋមន្រ្តីនឹងធ្វើពិតប្រាកដមែន»។
ស្របពេលដែលលោកនាយករដ្ឋមន្ត្រី ហ៊ុន សែន ព្រមានកម្ចាត់អង្គការចាត់តាំងផង និងអំពាវនាវឱ្យអ្នកនៅក្បែរលោក សម រង្ស៊ី ផ្តាច់ខ្លួនផង នៅថ្ងៃនេះដែរ លោកនាយករដ្ឋមន្រ្តីក៏បានកោះប្រជុំបន្ទាន់មួយនៅក្នុងខេត្តសៀមរាប ជាមួយកងកម្លាំងប្រដាប់អាវុធគ្រប់ប្រភេទ សមាជិកគណបក្សប្រជាជនកម្ពុជា និងក្រុមប្រឹក្សាឃុំ-សង្កាត់ ប៉ុន្តែបានបិទផ្លូវ ដោយមិនឱ្យសមាជិកក្រុមប្រឹក្សាឃុំ-សង្កាត់ជាប់ឆ្នោតមកពីគណបក្សនយោបាយផ្សេងចូលរួមឡើយ។
កិច្ចប្រជុំដែលលោកនាយករដ្ឋមន្រ្តីលើកឡើងថាសម្រាប់តែគណបក្សប្រជាជនកម្ពុជានេះ ហាក់ស៊ីគ្នាទៅនឹងអ្វីដែលលោកបានអះអាងកាលពីថ្ងៃព្រហស្បតិ៍ម្សិលមិញថា ការចុះតាមមូលដ្ឋានរបស់លោកលើកនេះ គឺដើម្បីរៀបចំយុទ្ធសាស្រ្ត ដើម្បីកម្ចាត់អ្នកដែលនៅគាំទ្រចលនាអង្គការចាត់តែង ដែលដឹកនាំដោយលោក សម រង្ស៊ី។
បើតាមលោក ម៉ែន សុថាវរិន្រ្ទ បើទោះជានៅពេលនេះ លោកនាយករដ្ឋមន្រ្តីថ្លែងសារព្រមានម្តងហើយម្តងទៀតក្តី ទំនងជាសារនយោបាយរបស់លោក ហ៊ុន សែន នៅពេលនេះអាចនឹងត្រូវប្រែប្រួលវិញ ក្រោយពីមានព្រឹត្តិការណ៍ដ៏សំខាន់មួយនឹងកើតឡើងនៅក្នុងខែវិច្ឆិកា ឆ្នាំ២០២២ ខាងមុខនេះ។
បើជាទោះបែបណា សភាអឺរ៉ុបធ្លាប់បានព្រមានកម្ពុជាម្តងរួចមកហើយកាលពីដើមខែឧសភា ឆ្នាំ២០២២ ដោយតម្រូវឱ្យសមាជិករបស់ខ្លួនត្រូវតាមដានដោយដិតដល់អំពីដំណើរការនៃការបោះឆ្នោតនៅក្នុងប្រទេសកម្ពុជា ទាំងការបោះឆ្នោតថ្នាក់ឃុំសង្កាត់ឆ្នាំ២០២២ និងការបោះឆ្នោតថ្នាក់ជាតិឆ្នាំ២០២៣ ខាងមុខនេះ។
តាមរយៈសមាជិកដែលមាន២៧ប្រទេស សភាអឺរ៉ុបព្រមានពីការផ្តាច់ប្រព័ន្ធអនុគ្រោះពន្ធ ដែលហៅកាត់ថា EBA ទំាងស្រុងចេញពីកម្ពុជា បន្ថែមលើការអនុគ្រោះពន្ធដែលកំពុងព្យួរ ២០% កាលពីលើកមុនផង ប្រសិនបើការបោះឆ្នោតទាំងពីរលើនេះមិនអាចធានាបានពីសេរី ត្រឹមត្រូវ និងយុត្តិធម៌នោះទេ៕