លោកនាយករដ្ឋមន្ត្រី ហ៊ុន សែន ថ្លែងថា លោកធ្លាប់ទទួលទានអាហារជាមួយមេដឹកនាំខ្មែរក្រហម នៅផ្ទះរបស់លោក ប៉ុន្តែរូបលោកមិនអាចធ្វើសកម្មភាពនេះជាមួយនឹងមេដឹកនាំអតីតគណបក្សសង្គ្រោះជាតិដែលនិរទេសខ្លួននៅក្រៅប្រទេស លោក សម រង្ស៊ី បានឡើយ។
ការថ្លែងខាងលើនេះ ដោយលោកនាយករដ្ឋមន្ត្រីបានធ្វើឡើង ខណៈរូបលោកបានអញ្ជើញទៅប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោត នៅក្រុងតាខ្មៅ ខេត្តកណ្ដាល កាលពីព្រឹកថ្ងៃព្រហស្បតិ៍ម្សិលមិញ ដោយលោកក៏បានហៅលោក សម រង្ស៊ី ថាជាអ្នកនយោបាយក្បត់ជាតិ៣ជំនាន់ដែលផ្សព្វផ្សាយមនោគមវិជ្ជាដ៏គ្រោះថ្នាក់ក្នុងប្រទេសផងដែរ។
ជាមួយគ្នានេះ លោក ហ៊ុន សែន បានបន្ថែមថា លោកក៏នឹងកម្ចាត់ចោលនូវអង្គការចាត់តាំងមនោគមវិជ្ជាជ្រុលនិយមដែលបង្កើតឡើងដោយលោក សម រង្ស៊ី ខណៈរូបលោកក៏នឹងមិនលើកលែងទោសឱ្យជនក្បត់នេះផងដែរ។
ទាក់ទិននឹងករណីនេះ លោកថា៖ «ខ្ញុំបាននិយាយហើយថា បើខ្ញុំចុះហត្ថលេខា[លើកលែងទោស]ឱ្យទៀត ខ្ញុំកាត់ដៃខ្ញុំគ្រវាត់ចោល»។
លោក ហ៊ុន សែន បន្ទាប់មកទៀត ក៏បានធ្វើការប្រៀបធៀបលោក សម រង្ស៊ី ទៅនឹងមេដឹកនាំខ្មែរក្រហមដែលលោកបានជួបកាលពីអតីតកាល ដែលក្នុងនោះ លោកបានថ្លែងថា រូបលោកធ្លាប់វាយគ្នាសឹងតែពាក់កណ្ដាលជីវិតជាមួយនឹងមេដឹកនាំខ្មែរក្រហម ដែលរួមមាន ខៀវ សំផន, នួន ជា, អៀង សារី និងអ្នកដទៃទៀត ប៉ុន្តែនៅទីចុងបំផុត រូបលោកនៅតែអាចទទួលទានបាយជាមួយពួកគបាននៅផ្ទះរបស់លោក។
ទោះជាយ៉ាងណា លោកបញ្ជាក់ថា សកម្មភាពខាងលើនេះ គឺមិនអាចធ្វើទៅរួចជាមួយលោក សម រង្ស៊ី ឡើយ។
លោកបន្តថា៖ «ខ្ញុំធ្លាប់ធ្វើចលនារំលាយចោលអង្គការចាត់តាំងនយោបាយ និងយោធារបស់ខ្មែរក្រហម ខ្ញុំធ្វើបានជោគជ័យ»។
លោកបន្ថែមថា៖ «ឥលូវខ្ញុំនឹងបន្តធ្វើ តាមរយៈការអំពាវនាវចំពោះប្រជាពលរដ្ឋដែលយល់ខុសអំពីជនក្បត់ជាតិនេះ [លោក សម រង្ស៊ី] ឱ្យងាកចេញពីជនក្បត់ជាតិនេះ»។
ឆ្លៀតក្នុងឱកាសនេះ លោក ហ៊ុន សែន ក៏បានធ្វើការគំរាមទៅកាន់បក្សនយោបាយណាដែលផ្សារភ្ជាប់នឹងជនក្បត់ជាតិនេះ ក៏នឹងត្រូវតែប្តឹងទៅតុលាការដើម្បីរំលាយចោលផងដែរ។
គួរបញ្ជាក់ថា លោក សម រង្ស៊ី តាមរយៈទំព័រហ្វេសប៊ុកផ្លូវការរបស់ខ្លួន កាលពីចុងសប្តាហ៍កន្លងទៅ បានចេញជាវីដេអូមួយដោយជំរុញឱ្យមានការផ្លាស់ប្ដូរដោយសន្តិវិធីនៅកម្ពុជា នៅឆ្នាំ២០២៣ ខណៈសកម្មភាពនេះត្រូវបានចាត់ទុកដោយលោក ហ៊ុន សែន ថាជាផែនការផ្តួលរំលំរាជរដ្ឋាភិបាលស្របច្បាប់។
ជាការឆ្លើយតប លោក ហ៊ុន សែន ថា៖ «បើអ្នកឯងមានកម្លាំង សូមអញ្ជើញ យើងគ្មានជម្រើសក្រៅពីការការពារជាតិ ការពាររាជានិយម ការពាររាជបល្ល័ង្ក ការពាររដ្ឋធម្មនុញ្ញ ការពាររាជរដ្ឋាភិបាល។ យើងគ្មានជម្រើសទេ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Hun Sen Says Meals With Khmer Rouge More Palatable Than With Rainsy