រដ្ឋបាលរាជធានីភ្នំពេញ មិនទាន់អនុញ្ញាតឱ្យក្រុមយុវជនធ្វើបាតុកម្មនៅទីលានប្រជាធិបតេយ្យ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ដោយលើកហេតុផលថា ត្រូវរៀបចំសណ្តាប់ធ្នាប់កិច្ចប្រជុំកំពូលអាស៊ាន។
ការបដិសេធនេះធ្វើឡើងក្រោយពីក្រុមយុវជនជួបប្រជុំជាមួយមន្ត្រីរដ្ឋបាលរាជធានីភ្នំពេញ នៅរសៀលថ្ងៃសុក្រនេះ ជុំវិញការស្នើសុំធ្វើបាតុកម្មនៅទីលានប្រជាធិបតេយ្យ។
យុវជន អ៊ំ ឈុម ប្រាប់វីអូឌីក្រោយជួបជាមួយតំណាងរដ្ឋបាលរាជធានីភ្នំពេញថា អាជ្ញាធរនៅមិនទាន់អនុញ្ញាតឱ្យក្រុមយុវជនធ្វើបាតុកម្មនៅទីលានប្រជាធិបតេយ្យនោះទេ ក្រោមហេតុផលថា រៀបចំសណ្តាប់ធ្នាប់ និងរក្សាសន្តិសុខសម្រាប់ការប្រជុំអាស៊ាននៅពេលខាងមុខនេះ ហើយក្រុមយុវជនត្រូវអនុវត្តតាមការសម្រេចរបស់អាជ្ញាធរនេះដែរ។
លោក អ៊ំ ឈុម បានចាត់ទុកករណីអាជ្ញាធរមិនឱ្យធ្វើបាតុកម្មនេះថាមានចេតនាពន្យារពេល និងរឹតត្បិតការតស៊ូមតិដែលធានាដោយច្បាប់ជាតិ និងអន្តរជាតិ។ យ៉ាងណា លោកថា រដ្ឋបាលរាជធានីភ្នំពេញ ឱ្យក្រុមយុវជនដាក់ពាក្យស្នើធ្វើបាតុកម្មម្តងទៀត ក្រោយចប់ប្រជុំអាស៊ាន។
លោកបន្ថែមថា៖ «យើងនៅតែរក្សារគោលជំហរធ្វើបាតុកម្មនេះ ទោះបីត្រូវរង់ចាំយូរយ៉ាងណាក៏ដោយ គឺយើងនៅតែធ្វើ អត់បញ្ឈប់ទេ។ ហើយពេលក្រោយ យើងអត់មានការស្នើទៀតទេ យើងគ្រាន់តែជូនដំណឹង គឺយើងធ្វើតែម្តង»។
អភិបាលរងរាជធានីភ្នំពេញ លោក កើត ឆែ បញ្ជាក់ថា រដ្ឋបាលរាជធានីភ្នំពេញ មិនបានហាមក្រុមយុវជនមិនឱ្យធ្វើបាតុកម្មនោះទេ ប៉ុន្តែរង់ចាំការជួបពិភាក្សាជាមួយស្ថាប័នពាក់ព័ន្ធផ្សេងទៀត ដែលក្រុមយុវជនបានដាក់ពាក្យស្នើសុំធ្វើបាតុកម្មនេះ។
លោកបន្ថែមថា៖ «គ្មានពីណាមិនអនុញ្ញាតឱ្យគាត់ទេ សិទ្ធិសម្តែងមតិ អ្នកណាក៏អនុញ្ញាតដែរ ប៉ុន្តែស្ថានភាពពួកគាត់បានដាក់ពាក្យទៅដល់ស្ថាប័នពាក់ព័ន្ធហើយ អ៊ីចឹងរង់ចាំសួរទៅស្ថាប័នពាក់ព័ន្ធទាំងនោះថាគាត់ឆ្លើយយ៉ាងម៉េចសិន»។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា បើសិនរដ្ឋបាលរាជធានីភ្នំពេញ មានចេតនាបង្កការលំបាក និងភាពស្មុគស្មាញដល់ក្រុមយុវជនដែលស្នើសុំធ្វើបាតុកម្មដោយអហិង្សានោះ គឺជាការរំលោភលើសិទ្ធិរបស់ប្រជាពលរដ្ឋ ហើយទង្វើនេះផ្ទុយពីច្បាប់ជាតិ និងច្បាប់អន្តរជាតិ ។
មន្ត្រីសិទ្ធិរូបនេះបន្តថា តាមច្បាប់ស្តីពីការធ្វើបាតុកម្មដោយសន្តិវិធី គឺប្រជាពលរដ្ឋគ្រាន់តែជូនដំណឹងពីការសុំធ្វើបាតុកម្ម ឬការជួបជុំគ្នាដោយសន្តិវិធីនៅទីលានប្រជាធិបតេយ្យ ដោយមិនចាំបាច់មានការយល់ព្រមពីរដ្ឋបាលរាជធានីភ្នំពេញ ក៏ពួកគេអាចជួបជុំបានដែរ ប៉ុន្តែការជួបជុំនោះត្រូវធ្វើឡើងក្រោមមនុស្ស២០០នាក់។
លោកបន្តថា៖ «ការជូនដំណឹង វាខុសពីការសុំច្បាប់! បើការជូនដំណឹង មានកម្មវត្ថុ មានកាលបរិច្ឆេទ អំពីគោលបំណងនៃការជូនដំណឹង និងការជួបជុំ មានតែប៉ុណ្ណឹង! ប៉ុន្តែបើខុសគ្នាបន្តិចបន្តួច យើងជជែកគ្នាបាន។ តែបើសិនជាឱ្យកែចុះកែឡើង វាហាក់ដូចជាមានភាពរឹតត្បិតមួយ ដែលនាំឱ្យប៉ះពាល់ដល់សេរីភាពក្នុងការជួបជុំដោយសន្តិវិធី ដែលធានាដោយច្បាប់ស្តីពីបាតុកម្មដោយសន្តិវិធី និងរដ្ឋធម្មនុញ្ញ ក៏ដូចជាបទដ្ឋានអន្តរជាតិ»។
យ៉ាងណា ក្នុងកំណត់ហេតុក្នុងកិច្ចប្រជុំរវាងក្រុមយុវជន និងមន្ត្រីរដ្ឋបាលរាជធានីភ្នំពេញ នៅថ្ងៃទី២៨ ខែតុលានេះ បានឱ្យដឹងថា ក្រុមយុវជនបានស្នើសុំជួបជុំគ្នាសម្តែងមតិដោយសន្តិវិធី នៅទីលានប្រជាធិបតេយ្យ រយៈពេល៣ថ្ងៃ ចាប់ពីថ្ងៃទី៤ ដល់ថ្ងៃទី៦ ខែវិច្ឆិកា ឆ្នាំ២០២២ ដោយមានអ្នកចូលរួមមិនលើសពី២០០នាក់។
កំណត់ហេតុដដែលនេះបញ្ជាក់ថា ក្រុមយុវជនយល់ព្រមពន្យារពេលរហូតដល់ខែធ្នូ ឆ្នាំ២០២២ ដើម្បីរង់ចាំការផ្តល់ព័ត៌មានពីការដាក់ញត្តិនៅក្រសួងអប់រំ និងក្រសួងមហាផ្ទៃ ក្រោយរដ្ឋបាលរាជធានីភ្នំពេញជួបពិភាក្សាជាមួយក្រសួងទាំងពីរ។
កំណត់ហេតុបញ្ជាក់ថា ប្រសិនបើក្នុងករណីពុំទាន់ទទួលបានព័ត៌មាននៅថ្ងៃទី៧ ខែធ្នូ ឆ្នាំ២០២២ ក្រុមយុវជនអាចដាក់ពាក្យស្នើសុំម្តងទៀតទៅរដ្ឋបាលរាជធានីភ្នំពេញ។
ការស្នើសុំធ្វើបាតុកម្មរបស់ក្រុមយុវជនទាំងនេះ ធ្វើឡើងក្រោយពីក្រសួងអប់រំ យុវជន និងកីឡា គ្រោងបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ខណៈក្រសួងមហាផ្ទៃបានក្រើនរំឭកដល់មន្ត្រីក្រោមឱវាទ និងវិស័យឯកជនទទួលស្គាល់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្តសម្រាប់បម្រើក្នុងជីវភាពប្រចាំថ្ងៃ បន្ទាប់ពីរកឃើញថា មន្ត្រីថ្នាក់ក្រោមជាតិ និងវិស័យឯកជនមួយចំនួន មិនទាន់ទទួលស្គាល់តម្លៃក្នុងការប្រើប្រាស់បណ្ណស្នាក់នៅអចិន្ត្រៃយ៍របស់ជនបរទេសអន្តោប្រវេសន្តទាំងនោះ។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំង២ភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យនិងដោះស្រាយយ៉ាងហ្មត់ចត់ពីអង្គការរដ្ឋ។
ចំណែកមាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខណ្ឌនៃច្បាប់ ខណៈមាត្រា៤១ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម៕