ប្រធានក្រុមប្រឹក្សាជំនុំជម្រះនៃតុលាការកំពូល សម្រេចប្រគល់លិខិតឆ្លងដែនដល់អតីតអ្នករាយការណ៍ព័ត៌មានអាស៊ីសេរី លោក យាង សុធារិន្ទ ដើម្បីយកទៅប្រើប្រាស់វិញ ដោយសម្អាងថា ជនជាប់ចោទរូបនេះចូលរួមសហការជាមួយតុលាការនៅគ្រប់នីតិវិធី។
កាលពីថ្ងៃទី២៦ ខែតុលា ឆ្នាំ២០២២ តុលាការកំពូលបានបើកសវនាការលើបណ្តឹងសាទុក្ខសុំដកលិខិតឆ្លងដែនទៅប្រើប្រាស់វិញរបស់លោក យាង សុធារិន្ទ ហៅ យាង សុជាមេត្តា អតីតអ្នករាយការណ៍ព័ត៌មានអាស៊ីសេរី ដោយនឹងប្រកាសសាលដីកានៅថ្ងៃសុក្រនេះ។
នៅក្នុងបន្ទប់សវនាការនាព្រឹកថ្ងៃសុក្រនេះ ប្រធានក្រុមប្រឹក្សាជំនុំជម្រះ លោក គង់ ស្រ៊ីម បានសម្រេចប្រគល់លិខិតឆ្លងដែនឱ្យទៅលោក យាង សុធារិន្ទ កាន់កាប់វិញ ដោយសម្អាងថា ជនជាប់ចោទរូបនេះតែងចូលរួមសហការជាមួយតុលាការនៅគ្រប់នីតិវិធី និងបងស្រីឈឺធ្ងន់នៅស្រុកកំណើត [ទឹកដីកម្ពុជាក្រោម] ហើយសន្យាថានឹងបង្ហាញខ្លួននៅចំពោះមុខតុលាការគ្រប់ពេលកោះហៅ។
តែយ៉ាងណា ប្រធានក្រុមប្រឹក្សាជំនុំជម្រះ ក៏បានព្រមានដែរថា ក្នុងករណីដែលជនជាប់ចោទគេចវេះមិនចូលខ្លួនធ្វើតាមការសន្យា នៅពេលតុលាការកោះហៅ លោកអាចប្រឈមនឹងការចាប់ខ្លួនដាក់ពន្ធនាគារជាថ្មីទៀត។
លោក សំ ចំរើន មេធាវីការពារក្តីឱ្យលោក យាង សុធារិន្ទ បានប្រាប់អ្នកសារព័ត៌មាននៅខាងមុខតុលាការកំពូល ថាកូនក្ដីរបស់លោកមិនស្ថិតនៅក្រោមការត្រួតពិនិត្យរបស់តុលាការទៀតទេ។
លោកថា៖ «ខ្ញុំយល់ថា ការទទួលបានលិខិតឆ្លងដែនមកប្រើប្រាស់វិញ វាជាសញ្ញាមួយនៅក្នុងដំណើរការរឿងក្ដីនេះតែប៉ុណ្ណោះ។ អត់ទេ! កូនក្ដីអត់ស្ថិតនៅក្រោមការត្រួតពិនិត្យទៀត។ គាត់អាចធ្វើដំណើរចេញ-ចូលក្រៅប្រទេសបាន គាត់អត់ជាប់បម្រាមទៀតណា»។
លោក យាង សុធារិន្ទ ហៅ យាង សុជាមេត្តា និងលោក អ៊ួន ឈិន អ្នករាយការណ៍ព័ត៌មានវិទ្យុអាស៊ីសេរី ត្រូវបានសមត្ថកិច្ចចាប់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧ នៅផ្ទះសំណាក់ ម៉ារឌី ក្នុងខណ្ឌមានជ័យ រាជធានីភ្នំពេញ និងបានដកហូតលិខិតឆ្លងដែនរបស់អ្នកទាំង២។ អ្នកទាំង២ ត្រូវរងការចោទប្រកាន់ពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចឱ្យអន្តរាយការការពារជាតិ»។ គិតពីថ្ងៃដែលសមត្ថកិច្ចចាប់ខ្លួនមកដល់ពេលនេះ សំណុំរឿងព្រហ្មទណ្ឌមួយនេះបានអូសបន្លាយជិត៥ឆ្នាំទៅហើយ។
កាលពីថ្ងៃទី៧ ខែមេសា ឆ្នាំ២០២២ ចៅក្រមជំនុំជម្រះនៃសាលាដំបូងរាជធានីភ្នំពេញ លោក ពេជ្រ វិជ្ជាធរ បានច្រានចោលម្តងរួចហើយ នៅបន្ទាប់ពីលោក យាង សុធារិន្ទ តាមរយៈមេធាវីការពារសិទ្ធិរបស់ខ្លួន ដាក់សំណើសុំលិខិតឆ្លងដែននេះដើម្បីយកទៅប្រើប្រាស់ ហើយកាលពីថ្ងៃទី១២ ខែកក្កដា ជនជាប់ចោទ បានធ្វើបណ្តឹងសាទុក្ខ ប្តឹងមកតុលាការកំពូលបន្ត ក្រោយពីសភាស៊ើបសួរនៃតុលាការថ្នាក់កណ្តាលបដិសេធជាថ្មីទៀត កាលពីខែមិថុនា ឆ្នាំ២០២២ ចំពោះការស្នើសុំដកលិខិតឆ្លងដែននេះ៕